2018年3月28日 星期三

🌺Aloha Hawaii🌺 -淺遊檀香山

二零一七年十月二十七日

由Kona Island飛返去Honolulu,明明夏威夷出曬名一年四季都陽光普照風光明媚,係我地去到嗰日傾盆大雨落足成日,連個host都話喺夏威夷五年都未試過,唯有用美食同行街慰藉心靈。

第二日搭車去奧巴馬每年都要去嗰度渡假嘅海灘Lanikai,果然係水清沙幼,極多日本同韓國遊客,兩條友悠閒地喺個沙灘度坐左個幾鐘,望海望人(有個肥哥哥鍥而不捨地想爬上塊衝浪板超可愛HAHA)寫postcard~

睇夠搭返Uber出去食poke,雖然個樣好似嘔吐物,但食落幾有水準:9

夜晚返就係左去傳說中威基基海灘睇日落,似屯門黃金海岸,泊左好多靚遊艇,係浪漫嘅!
題外話:細個有無玩過酒店大亨!?次次抽到夏威夷都要諗下買唔買Hotel Waikiki,我終於嚟左喇XD


一眨眼已經最後一晚,飲嘢作結,時間都過得太快T_T 好想繼續chill落去...

總括嚟講夏威夷本島商業味濃但又有啲過時,都係Kona好玩啲!

2018年3月22日 星期四

【青衣】《OS Plus》-質素遠追不上價錢

二零一八年二月十八日

來到不宜拜年的赤口,趁中午和老爸來個父女約會,吃中餐吃得膩了,想起青衣城二期仍有不少店舖未試,來到一上電梯的第一間西餐廳,有少許開房式位置,當日光照進來時感覺舒適溫暖。

假日有大約五款午餐可選,價錢包餐湯餐飲和甜品,價錢近百或以上,不喜歡的也可散點。

碳燒香草牛仔扒 $138
主菜擺盤不錯,有格仔炭烤紋令人食慾大增,可惜兩塊薄牛扒味道確實一般,肉質粗糙無味,質素只比大家樂早餐高一點點,令人失望。

卡邦尼意粉 $108
見鄰座吃得津津有味,不在午市套餐內的也來一客。來到有隻生蛋黃和芝士碎,感覺對辦,煙肉和洋蔥炒得香,可是不知為何有陣現成白汁味,和自己做的還是沒法相提並論。

是日甜品是一件如嘉頓瑞士卷般的迷你蛋糕,沒為我們送上也懶得去問。可能沒點上店家的招牌生蠔,以這價錢來說倒是一般般,難怪旁邊的食肆皆客似雲來,但這店還能隨時招呼客人入座,短期來不會再試了。

《OS Plus》
地址:青衣青衣城2期2樓222號舖
電話:3622 3788

2018年3月15日 星期四

【大角咀】《老掌櫃東北菜館》-過足片皮鴨癮

二零一八年二月一日

有些朋友沒見一陣子,心裡總會泛起絲絲掛念,畢竟人生多過一半的時間也有他們的影子,一同經歷高高低低,無可取替。

由奧運站走過來大約十分鐘,但人生路不熟兜了個大圈始到達。店家不大,周四晚上也人頭湧湧,我們一行七人擠在一張六人的窄長檯,親密得很,人多聚會不算合適。

口水雞 $68
雞件不像一般的多骨少肉,口水汁帶辣惹味,蒜蓉下得重手,好吃但那味道停留在口腔內超級久,揮之不去。

雞絲粉皮 $58
麻醬香濃,滑溜的粉皮下面放了不少青瓜絲,多添一份清新的口感。

酸辣土豆絲 $58
吃東北菜當然要來個炒薯條,有別我們一般對薯仔認知的綿密口感,口感爽脆,開胃可口。

京燒羊肉 $128
羊肉帶肥,面頭燒得香脆,味濃,喜歡的會好喜歡,怕的朋友耍手兼擰頭。

北京填鴨(一隻) $298
千呼萬喚,填鴨終於在最後出場。一隻分開兩碟上檯,皮脆而鬆化,肉帶有肉汁不柴,用餅皮包著青瓜和京葱同吃,吃得眾人滿意。

素三鮮(10隻) $40
點的餸菜比較多肉,就來個清一點的選擇,素餃調味相對淡,不過不失。

四川擔擔麵 $42
起初望落湯頭清淡,原來醬料都窩藏在底,略拌過後就較為對辦,不過那天顧著吃其他沒嚐到,嗅起來挺香就是了。

麻醬冷麵 $58
滿滿的一盤份量十足,有雞蛋、青瓜、肉絲等,配料多且豐富,麵質彈牙有勁。

到最後顧著聊天忘了為甜品拍照,不過三款都是扣分位。高力豆沙沒嚐但看樣子油油的一般;豆沙鍋餅皮太薄且黏牙,還有鹹鹹的怪味;拔絲地瓜最為恐怖,侍應替我們一手將所有蕃薯全倒進水內,完全做不到拔絲效果,蕃薯自身也沒甚味道,令人失望。

七人吃得飽足埋單人均百三元,比想像中相宜很多,撇除那些甜點不說整體還是美味的,有機會可以再來。

《老掌櫃東北菜館》
地址:大角咀大角咀道55-65號牡丹大廈北座地下9-12號舖(與福澤街交界)
電話:2572 8366

2018年3月9日 星期五

🌺Aloha Hawaii🌺 - AirBnB 親親大自然之泰山樹屋

二零一七年十月二十二日

為配合我地環島行程,喺小木屋度住左兩晚就要轉地方。當日玩左成日食埋晚飯入黑先到,搵左好一陣子先成功泊底架車抵達。

第二間AirBnB睇相已經覺得好raw好rustic,去到比我想像中仲要原野feel!話說姐姐我好驚家禽,點知個泰山咁嘅樣嘅host養左五隻自由走動嘅鵝,殺我一個措手不及。佢地成日全家出動走嚟走去,又會阻住條路,嚇到我每一步都小心翼翼唔敢呼吸,諗返起先覺得搞笑。

間屋係用木搭成,喺正公路旁邊,啲車好似會喺你頭頂經過,仲有唔同昆蟲/動物嘅叫聲,要挑燈去廁所同沖涼(一齊!!!!!!!XDDD),有啲似細個去camp咁,初初有少少唔慣。

不過第二朝朦朧之中見到個景,嘩係咪發夢,靚到要爬起身影底佢唔係講笑!原來間房係睇到日出,加埋條一望無際嘅海岸線,藍藍白白、朦朦朧朧,感覺好平靜。

除左間樹屋之外,仲有一個廳同廚房都係包埋嘅,廳放左啲meditation/心靈書籍,加埋背後塊大象神掛布,好有靈氣,某日浮潛完後都喺嗰度hea左成個下晝。

住左兩晚總括嚟講都唔錯,不過比較多蚊同去廁所都要著鞋有啲麻煩,港女勿往。

2018年3月7日 星期三

🌺Aloha Hawaii🌺 - 看著那海龜水中游

二零一七年十月二十三日

今個旅程上天下海咩都玩齊,嚟到Kona Island最後一日,見價錢差唔多(好似係),豪氣啲join左個deluxe tour去浮潛,不過話就話deluxe,其實都唔知同其他有咩分別哈哈,應該只係個午餐豐盛啲!

朝早八點九集合,絕大部份團友都係上左年紀,雖知道白人好容易曬傷,但唔知係咪因為啲防曬免費提供,佢地搽防曬嘅狼死程度真係嚇我一跳,厚到成個土著咁推都推唔勻,好貪心XD

今次總共去左三個地點,水好清保育做得好好,喺海度個感覺自由自在,不過啲魚同珊瑚唔似熱帶地區咁多樣同色彩繽紛;另外無諗過浮潛都可以見到海龜,勁近即刻唔敢抖氣,好興奮好值得。

玩到攰攰地返上船食嘢,曬住太陽咁瞓著左,嘆到=v= 乳豬就是如此煉成的!

2018年3月5日 星期一

🌺Aloha Hawaii🌺 - Manta Ray Tour與魔鬼魚同游

二零一七年十月二十二日

朝早睇完火山,揸左兩個鐘去島嘅另一邊玩返啲水上活動。去到夜晚join左個睇魔鬼魚嘅浮潛,出發前唔係太想像到係點嘅一回事,原來船公司會喺海打盞大燈,成棚人一個貼一個密密麻麻扯住條浮繩,人形魚排咁款,都唔知佢睇我定我睇佢哈哈。

落左水一陣就見到啲魔鬼魚喺身邊游過,開始唔算太近,距離大約四米左右,睇睇下我一擰個頭,嘩條魚真心喺我觸手可及嘅位置擘大個口打橫游走,好震撼但其實都驚驚地,玩左一陣悶悶地上返船(重點係隔離條友成日我批踭同將部GoPro喺人面前掩掩揚揚,煩)

上水後凍到本來已有少少唔舒服嘅好友騰騰震,依個時候必須要食亞洲嘢無誤,隨便搵左間泰國餐廳,串燒炒金邊粉青咖喱,食完個身即時暖曬,叉返滿電買埋雪糕先返歸Yeah!
 
同場加映:感唔感受到有熱嘢食嘅佢係幾咁開心?!