2021年8月31日 星期二

〖巴塞隆拿。觀光〗-魔幻趣味:巴特略之家Casa Batlló

二零一九年六月十九日

Casa Batlló係Gaudi另一傑作,幾年前喺網上見到佢嘅圖片已經俾佢吸引,超現實又魔幻,親身嚟到更覺興奮!

同其他付費景點一樣,我哋喺網上買定飛,喺預定時間出席,省卻唔少排隊嘅時間同煩惱,一去到馬上狗衝入內,好方便。

入場時提供聲音導賞機,一邊行一邊聽講解,更能了解每個設計細節。Casa Batlló樓高六層,連埋天檯天井,好多細節位,顏色運用、線條運用,睇住Gaudi點樣將自己嘅諗法套入建築,再以不同形態呈現,連我依啲門外漢都睇到嘖嘖稱奇、目不暇給,實在不得不佩服依位奇才。

雖然入場費唔平,但係好值得入內參觀呢!

2021年8月30日 星期一

〖巴塞隆拿。美食〗《La Torna》 - 市場內的小驚喜

二零一九年六月十九日

食完少少麵包蛋糕開咗個胃,喺Santa Caterina Market行咗個圈之後又食過。

今次揀嘅餐廳喺Google/ Trip Advisor上同樣屬於高評分,舖頭位於市場入面,一排櫈圍住毎開房式廚房,可以睇住廚師烹調食物,係幾過癮。

Fried potatoes
薯仔淋醬同樣係巴塞名菜,每間餐廳味道又有少少唔同。炸薯仔撈埋蒜味蛋黃醬同辣醬,唔會點出事。

Cheese baked eggplants
嚟到見到芝士半融狀態,賣相吸引。茄子焗到軟綿綿,夾埋肉碎一齊食惹味。

Portobello, fried eggs and foie gras pate
大啡菇juicy,炒得好香,加上松露油同入口即溶嘅肝醬,口感豐富。

Grilled veggies
燒過嘅蔬菜係比一般多一陣甜焦香,尤其係翠肉瓜依啲水份多嘅,好味!

Meatballs
肉丸肉質結實,略鹹,比較一般。

飲飽食醉,再喺四圍遊蕩下,依度每一個地區都有其獨特之處,每轉一個彎都似有新嘅驚喜等緊我哋,有趣。

2021年8月28日 星期六

〖巴塞隆拿。美食〗《Hofmann》 - 米芝連主廚主理:金牌牛角包

二零一九年六月十九日

好友提起一間由米芝連女主廚開設嘅pastry shop好出名,是日特意無食早餐去會一會佢。小店座落一條小巷內,門面低調仲有少少暗,真係行過咗都唔知。

除咗最出名嘅牛角包之外,仲有朱古力、蛋糕、果醬、曲奇等等售賣,全部都好精緻吸引,拎去送禮亦得體。

行完一圈後買咗榛子味牛角包同Poma Blanca蛋糕淺嚐;牛角包酥香鬆化,榛子味道略甜,個人對於有吉士餡嘅食品好揀擇,相信原味會更得我歡心。

另外件蛋糕白雪雪純潔可愛,食落原來係蘋果白朱古力芝士口味,口感幼滑清香。

可能本身香港都有唔少精緻又好味嘅甜品店,整體美味但無令人驚艷,行開附近可以一試。

2021年8月27日 星期五

〖巴塞隆拿。觀光〗-世界文化遺產聖家堂:聞名不如見面

二零一九年六月十七日

提到巴塞隆拿觀光,聖家堂係第一個浮現喺腦袋嘅景點,一幢教堂起咗百幾年到到今時今日都未起好,真係令人好好奇究竟有幾巴閉。

我哋預早網上預約好門票入場,網上有好多教學分享,只要喺指定時段嚟到就得,方便快捷。嚟自世界各地嘅遊客都慕名而來,去到人山人海,入場前仲有個小型安檢,大約十分鐘左右就可成功入內。

我哋一人拎咗一個導賞收音機,邊行邊聽講解,上至雕刻雕塑下至玻璃窗顏色圖案,每一個細節位都有周詳考慮,每一個地方都隱藏著唔同意義,一方面不禁讚歎前人當年大膽又前衛嘅構想,另一方面亦佩服確實實行嘅恆心。

聖家堂果然有佢嘅過人魅力之處,睇得我哋津津有味,有生之年希望見證到佢真係完全完工嘅一日,到時再嚟多次!

2021年8月24日 星期二

【油麻地】《嘉多利天然酵母手作麵包店》-超人氣布甸包

二零二一年八月四日

自從得知嘉多利係良心小店後,間唔中都會幫襯支持一下。無論鬆餅、鳳梨酥定迷你麵包系列,全部有水準,食得出師傳嘅用心。是日早早食完晚餐,途經嘉多利見門外依舊有條長長嘅人龍,見距離布甸包開賣時間不遠,就湊湊熱鬧,最後等咗差不多四十分鐘先到手。


法式布甸包 $15
布甸包目測比女仔手心還要大,黃色布甸部份非常滑溜,食到雲呢拿香,仲有丁點酸酸地吊起個味。法包有輕微拉扯感,有麵粉香,鹹鹹甜甜非常滋味。見網上有人分享室溫、雪凍同焗熱三種食法,因為唔知會唔會/幾時再食,我三種都試過,個人最鍾意熱食,外層焗到卜卜脆,入面半流心,係幾有驚喜。

大大件又有質素,先賣$15一個,難怪人龍不絕。

《嘉多利天然酵母手作麵包店》
地址:油麻地碧街54號地舖
電話:29888018

2021年8月20日 星期五

【尖沙咀】《Sensory ZERO》-高檔商場內的清新

二零二一年六月十三日

爸生意上有往來嘅朋友喺尖沙咀短租咗一個地方,趁有時間親身去支持一下。出發前先到附近搵咗間良心小店食午餐,小店喺連卡佛入面,星期日下午一點半大約等咗二十至三十分鐘。

小店地方佔地四四方方,檯排得密但係檯面面積大,加上樓底高,坐落唔會覺得壓逼,頭頂海量烏絲燈增添時尚感。

M5+和牛藜麥沙律 $168
牛肉已預先切開一片片,顏色粉嫩,牛肉肉味香濃,加上油花足,腍身有油香;沙律用上柚子味汁醬,甜甜酸酸的好清新開胃。

慢煮雞胸藜麥沙律 $82
雞胸肉味道清淡,幸而不乾柴,蔬菜沙律底同樣清新,健康味美。

蒲燒三層鰻魚滑蛋飯 $128
適逢禁食澱粉質嘅一個星期,只可遠觀不可褻玩,純粹開心分享一下。

食完門口仲有唔少人等緊,趕快還檯出發去,如果想坐耐啲可能要搵過另一個地方嚕。

《Sensory ZERO》
地址:尖沙咀廣東道3號海港城馬哥孛羅香港酒店G樓連卡佛
電話:2118 6090

2021年8月18日 星期三

【將軍澳】《出爐》-靚仔明爐燒味

二零二一年六月二十七日

難得去到將軍澳,決定去早前告急嘅黃色foodcourt度支持一下,第一次去唔熟路,兜咗一大個圈先搵到。上到去見到有粉麵、茶記、燒味、漢堡、石燒等唔同種類嘅食店,大概每人都可以搵到啱口味嘅。

雙拼燒味飯 $55
被人哋燒味飯吸引,自己都嚟一份;叉燒偏瘦但唔柴,帶少少蜜糖香,而燒腩仔肥瘦均勻,皮有少少脆口,飯粒粒粒分明,好好味講唔上,不過不失吧。

《出爐》
地址:將軍澳唐俊街18號The Parkside1樓日日・食良
電話:從缺

2021年8月16日 星期一

【長沙灣】《Contrast》-黑白對比型格Cafe

二零二一年六月二十九日

放假日子樂得自在,朝早首先睇場《手捲煙》,然後去食傳說中香港第一嘅沙嗲牛肉麵,散步途經關注咗好耐嘅咖啡店驚見無人排隊,明明唔肚餓都照入去坐下。

小店裝潢以黑白兩色為主調,轉角位一邊全部用上玻璃牆身,採光度十足,有少少花花草草做裝飾,檯與檯之間唔算太逼,令人感覺舒服放鬆。

竹炭糯米窩夫配自家製牛奶雪條 $96
四件窩夫有著黑色外貌,唔係走外脆內軟路線,食落有少少煙韌,微甜有蛋香,伴隨嘅牛奶雪條冰感重,有奶味不過不算幼滑,而打發忌廉香濃,比起雪糕更得我歡心。

望見旁人嘅全日早餐個樣都甚吸引,有機會亦想試試其鹹食。

《Contrast》
地址:長沙灣福榮街512-518號依時大廈地舖
電話:2337 7220