【佐敦】《Terrible baby》-只飲雞尾酒

二零二一年八月二十七日

是日happy friday，近近地去逸東小酙一下。平時多數幫襯food court嘅花樣年華，想坐得舒服啲就上咗Terrible Baby，樓底高，望住子彈電梯上上落落，氛圍輕鬆自在。

Siu Siu Pink $95/ Let's go for one bro $95

用上唔少西柚味元素，酸酸甜甜，夏天飲好消暑。另一杯聽落吸引，味道好似軟糖，較甜，口味少女，唔算喜歡。

Angus Beef Burger $160

原本叫咗五成熟，嚟到Well done但怕麻煩無出聲。漢堡扒食落比較乾，肉質一般，只係加咗茄汁芥辣無咩heart，賣依個價錢超進取；伴上薯條炸得唔算乾身脆口，本來諗住食完一輪先再叫，好彩哈哈。

未夠七點，坐咗一個鐘都無又未飲完，侍應就埋嚟問會唔會叫多杯，答唔會就即刻遞張單埋嚟，感覺都幾差幾掃興。

《Terrible baby》

地址：佐敦彌敦道380號香港逸東酒店4樓

電話：2710 1866

【新蒲崗】《MUM 日常野菜料理》-洗滌心靈

二零二一年九月十三日

之前小店喺逸東明明近在咫尺，卻成日被其他店舖吸引，估唔到搬去咗新蒲崗先有機會幫襯。小店裝潢簡單，以半自助形式落單，點菜後坐定定就有得食。

三品日常定食 $100

信田卷入面有紅蘿蔔、豆角同粟米芯，外面用腐皮包住，有少少日式醬油味；蘿蔔冬菇車麩關東煮，餸菜全部入味鮮味，加上旁邊嘅柚子胡椒醬畫龍點睛；赤味噌田樂豆腐豆味濃，味道相對普通。

定食包麥茶同一碗五穀雜炊飯，女仔剛好夠飽，食完感覺無負擔，同好友出發去試姐妹裙嚕！

《MUM 日常野菜料理》

地址：新蒲崗仁愛街34號地下B號舖

電話：從缺

【黃大仙】《大街小館》-滋潤暖胃

二零二一年七月三日

食過佐敦分店留下良好印象，人在附近就嚟總店試下。由黃大仙中心行過去大約十分鐘，唔算遠但天氣熱都足以令人大汗疊細汗。星期六七點幾一個堂食客都無，環境比較雜亂擠逼，相比下佐敦店光猛整齊一啲。

椰皇燉蛋白湯圓 $52

面頭椰奶帶椰青水清香，燉蛋白震騰騰，滑溜之餘奶味濃郁，除芝麻湯圓外仲加入咗我最鍾意嘅小丸子，食完一個超飽超滿足。

質素同樣不錯，不過地點唔就腳，下次想再食都係會去返佐敦。

《大街小館》

地址：黃大仙銀鳳街16號地舖

電話：2326 6603

【油麻地】《Liberty Coffee & Wine》-大雨下的早午餐

二零二一年六月二十日

落大雨費事四圍去，搵咗附近一間一直想試嘅coffee shop食 brunch，一點左右幸運地唔使等，剛好坐到Bar檯位置，有少少自然光，望住窗外風景進食甚寫意。

Latte

咖啡拉花均稱，綿滑順喉。

英式早餐 $108

食All Day Breakfast就係想要大堆頭嘅豐盛感，依度嘅全部都細細件比較精緻，視覺上未能震撼到我。食材全部NMIC，質素的確唔錯，係牛角包唔算好鬆化，整體食得出有心機做。

鮮茄全素肉醬扁意粉 $88

份量偏少，蕃茄甜甜酸酸，感覺清爽，用上素肉無咁膩，中我口味。

見有唔少人都因無訂座而摸門釘，有興趣到訪可以先留毎位，免得白行一趟。

《Liberty Coffee & Wine》

地址：油麻地窩打老道33號翠園大廈地舖

電話：6608 5231

【大角咀】《Black Sugar Coffee》-商場綠洲：食輕食、嘆咖啡

二零二一年八月

三年前同好友飛韓國，十一月十幾度嘅氣溫底下佢都成日拎個風扇仔出嚟吹。依家炎炎夏日，搵個盡量唔使暴露於室外嘅地方，chill chill地食個lunch。

思前想後諗起早幾年食過嘅Black Coffee Sugar喺奧海城開咗分店，閒日十二點左右嚟到唔使等位，小店樓底高，天然採光， 木色黃燈加半開房式設計令人感覺溫暖。

Pesto Chicken Penne $128

香草醬味香濃，雞胸肉嫩滑，最後凍咗再食都唔覺油膩。

Avocado and Egg Toast $98

蛋炒得滑身，牛油果醬份量慷慨，伴上嘅沙律亦新鮮，感覺健康無負擔。

Homemade Waffle with Ice-cream $88

窩夫炮製時已飄來陣陣烘焙香氣，外觀無太花巧，窩夫係美式質感，微暖狀態下蛋香味突出；而雪糕用上Movenpick，香濃幼滑，不過略嫌楓糖合桃味太甜，有少少膩。

《Black Sugar Coffee》

地址：大角咀海庭道18號奧海城二期地下G16號舖

電話：3162 8229