二零一八年十二月十日
拿了下午的假行街美甲，陪母親大人看診後再會合好友已近三時，肚子餓得咕嚕作響，得先填飽才有力氣去血拼。
來了中學時期已屹立在此的EXP，午市套餐有六款選擇，一飯一意粉一湯麵一冷麵兩薄餅，全部劃一收費，價錢包括一杯鮮榨果汁。
勁果薑 (跟餐)
用上鮮橙、甘荀和生薑製成，整杯以橙味作主導，薑則完全嚐不出來；聞說沒額外加糖，但甜度還是頗高。
韓式豬腩肉薄餅 $98
薄餅新鮮熱辣，餡料用上泡菜、豬腩肉、京蔥和芝士，口味配合得來又挺創新。
燒雞肉茄汁意粉 $98
意粉煮得彈牙入味，雞肉煙燻過，惟那醬汁不知為何帶點罐頭食品的感覺，扣了少許分數。
可能早兩日吃過相近但較高質的食品，這兒不過不失罷了。不過食物不是重點，吃飽和好友辦正經事逛街去。
《EXP》
地址：九龍塘達之路80號又一城UG層23號舖
電話：2265 8298
二零一八年十一月七日
出發前得知友想食人蔘雞，二話不說上網爬文睇下大家有咩推薦，發現大大小小嘅食店可其多，配合行程就試依間喺弘大米芝蓮推薦嘅。
平日夜晚七點半左右嚟到大約等二十分鐘，期間見到唔少旅行團嚟依到食(唔係大團)，初初都有啲擔心會唔會伏，不過一場嚟到，一試無妨。
人蔘土雞湯 14,000Won
雞入面釀入糯米、紅棗、同一條小人蔘，雖然好似煲左好耐但雞肉神奇地都一啲都唔韌，湯底清香唔肥膩，平時唔特別好依味嘅我都密密食，天寒地凍呷一口寧舍滿足。
脆皮炸雞 13,000Won
雖然依度最出名係食人蔘雞，但自己食曬一大碗又好似有啲悶，見佢有其他嘢食就叫嚟試下。大大籃炸雞皮脆肉嫩，肉質結實彈牙，新鮮炸起熱辣辣，無上脆漿食起嚟唔膩，調味得宜，好食，仲惹嚟唔少艷羨目光。
食完個人暖笠笠，戰鬥力滿滿再摶殺過，YEAH！
二零一八年十二月九日
對於要排隊的事不算熱衷，喜茶芝士奶蓋飲品且在早兩個月嚐過，而近來大熱的麵包在網上看過便算。周六北上尋歡按摩，好友當天不在狀態唯有和她暫時分道揚鑣，再會合時突然送上一個來自喜茶的麵包，甚驚喜窩心。
小芋頭條
為隆重其事，隔天特意用焗爐低溫翻熱。麵包烘到微脆，切開原來幾乎全是芋泥，味道天然不過甜，有濃濃的奶芋香。說它味道非常突出又不是，香港倒是比較少見以芋頭做餡的西式包點。
帶著好友滿滿的心意，無價。
二零一八年十二月八日
感激好友陪我癲，周六早上九時在旺角看電影早場，完場過來吃薄餅，吃畢還有深圳下場，由朝玩到晚，行程好不豐富。
店家位於電影院旁，十一時半剛開門到來可以直行直入，環境開揚帶點小清新，坐得舒適。
Crabcakes with lime mayo $115
成品色彩繽紛，沾醬做得清新開胃，可惜主角蟹餅幾乎只嚐到胡椒的味道，不太討喜。
Calamari squid ink pasta $148
魷魚鮮味，意粉質感彈牙，醬汁帶芥末獨有的微酸，朋友們覺得怪怪，我倒覺得不錯。
Truffle e fungi $188
薄餅新鮮焗起，餅底酥脆帶麵粉香，面頭舖滿不同種類的菇菌，黑松露香味撲鼻，加上海量的拉絲芝士，獨自鯨吞三大件仍覺滿足。
The Pantry's pancakes $125
三件班戟製作需時，質感鬆軟綿密，帶淡淡的芝士香氣，空氣感重，配上焦糖牛油和楓糖，每一口都是幸福的味道。
近兩年沒光顧，再吃覺得它能保持水準，薄餅和甜品尤其有質素，下次在附近出沒也要再來回味。飽食一頓，三個人柴娃娃北上尋歡去。
《The Pantry》
地址：尖沙咀柯士甸道西1號圓方(Elements) 2樓2133號舖
電話：2348 8219
二零一八年十一月七日
覺得嚟到首爾其中一樣要做嘅嘢就係著韓服扮大長今，網上有好多唔同舖頭嘅review，最後揀左一間開幕大概半年左右嘅日月韓服，貪佢啲衫新淨啲。
小店位於景福宮附近，地方唔算好大但企理，有獨立locker放個人物品。無心水想著咩色可以叫老闆娘俾啲意見，如果十一月嚟建議著件淺色薄長袖打底，有裙擺下半身就唔洗除，唔係咁揚揚下其實幾凍。
著左韓服之後總唔能夠披頭散髮，小店提供基本編髮服務，亦可加3,000/5,000Won幫你整個fancy啲嘅髮型，加埋髮飾成個感覺更完整。
收費方面，我哋加左錢整頭，玩足四個鐘每人先係港紙百幾蚊，好抵！同閏蜜/屋企人嚟行下影啲相留念都值得，如果同另一半嘅話就考慮下佢意願，當日目睹無數眼神死嘅男伴超好笑。
Creatrip參考：http://bit.ly/2JMrapK
二零一八年十二月五日
人與人的關係實在太微妙，早前在偶然的機會下遇上一個十分合拍的朋友，無厘頭的、認真的、工作上的、家庭上的......天南地北無所不談。
是晚在海傍喝過一杯後再來晚飯，小店位於韓國街街尾，舖頭小小一眼望完：踏進門口左手邊是下單的地方，旁邊廚房雖是開放式，但油煙味幾乎嗅不出來；餘下就是大約十五個座位，靠牆還放了少許貨物，地方淺窄大家將就一下便好。
烤菇芝士牛堡 $52
漢堡扒調味濃，味道像那貴價名牌香腸，肉味倒不太嚐得出來；原隻portobello菇味濃又多汁，配上芝士、蕃茄、烤洋蔥、生菜和其秘製醬汁，超級豐富飽肚。
香辣孜然羊堡 $40
麵包烘過微暖，羊肉不算羶，孜然味恰到好處。
薯格/薯條 (跟餐+$15連飲品)
兩者皆新鮮炸起，熱辣辣外脆內軟，薯味濃郁，略嫌鹹和油了一點，不過仍是吃得滿足。
平時吃漢堡多會狼狽不堪，這兒用上牛油紙盛上，吃畢整個雙手也是乾爽的，非常驚喜！飽食後沿著回頭路一直走，不知不覺破了我個人記錄；口水多過浪花，感謝相伴。
《嘉寶漢堡》
地址：尖沙咀金巴利道78號金輝閣地下A號舖
電話：95214405
二零一八年十一月八日
本來無排到依個行程，但早兩日去睇紅葉嘅導遊強烈推薦嚟依度行下買手信，最後一日無特別地方要去，講到咁吸引無理由唔去見識下。
一出地鐵口已經有一間home plus超級市場，地方大人唔多，Lotte Mart有嘅嘢依度大抵都有，餅乾零食即食麵等，可以一次過採購。
麻浦水產市場規模唔算大，地下係賣海產，可以即買即上二樓煮；行入少少就係賣乾貨嘅地方，買左一pack要焗嘅雞泡魚乾，屋企人同朋友都讚好，幾十塊先係百五蚊左右，抵到爛。仲買左啲調左味嘅魚仔送飯，雙親一樣好鐘意，如果有多隻手所有嘢都想買多啲。
經過乾貨區之後就係賣水果同蔬菜嘅區域，有啲似行得舒服乾落乾淨版嘅街市，但量都係比較大同多，似做批發多啲。
另外市場入面亦有一間似佳寶咁嘅超市，感覺貼地，但就燈光較昏暗購物慾降至零，無點留意價錢。
最後離開時落狗屎，十分鐘左右嘅路程好似一個鐘咁遠，大雨到傻一路行一路笑，好希望有人幫我哋影低嗰一刻有幾狼狽哈哈。總括嚟講地點尚算便利，值得過嚟行下買下手信，有機會仲可以試下啲海鮮添！
地址：首爾特别市麻浦區城山洞 533-1
交通：地鐵世界杯體育場站
二零一八年九月二十三日
昨天晚上才外遊回港，隔天早上八時已出現在北潭涌準備清理山徑；是次超級颱風山竹的破壞力驚人，沿途除了很多塌樹外，岸邊還堆積著海量的垃圾，往日供人休息的士多亦只剩一片頹垣敗瓦，一邊收拾一邊慨嘆我們平日實在製造了太多不必要的浪費。又行山又執垃圾，烈日當空下勞動了一整天，拖著餘下丁點的體力來食米線！
餐廳由一期搬到二期樓下，和同集團的其餘兩家餐廳一同採用開放式餐區，感覺更舒適寬敞，而繁忙時間大多要等位。
滑牛蘿蔔米線(蕃茄湯) $42
滑牛沒有經過太多鬆肉粉的洗禮，份量多，蘿蔔清甜但未夠入味，質感還是有點實。
炸雲吞 $28
一客六粒新鮮炸起，蝦肉爽彈大隻。
檸蜜豬扒 $21
肚子餓再多點一份小食，豬扒帶肥軟稔，炸法有點像鹽穌雞，檸蜜味淡但整體香口惹味。
初嚐米線陣之時覺得價錢貴味道又平平，但吃著吃著覺得還可以，和家人不知吃什麼時也會來一碗簡餐。現在還推出會員制，又現金券又儲分，打了個九折好划算。
《米線陣》
地址：青衣青敬路33號青衣城2期地下G32-33號舖
電話：2495 6603
二零一八年十一月二十四日
對吃芋圓的慾望是永不止息，湊巧好友提起又有空，周六晚先是在附近嚐餃子，轉個彎再來吃芋圓，簡單又滿足。
小店坐位只有八個，主力做外賣，感覺家常。甜品有八、九款，全是經典中式糖水配芋圓，有冷熱可選，除鮮奶椰汁桃膠那款賣$32之外，其餘一律售$28。
喳咋芋圓(熱) $28
各款豆類煲得稔身，椰香十足，甜度稍高；芋圓、地瓜圓和紫薯圓三款都能嚐出各自淡淡的味道，大小合適之餘質感煙韌Q彈，十分討喜。
紫米露芋圓(凍) $28 +$2綠茶圓、芝麻圓各兩粒
黑糯米略帶韌勁，甜度恰到好處，額外加的綠茶圓和芝麻圓味道皆很突出，綠茶甘苦、芝麻濃香，不過還是鍾情於最原本的味道。
越吃越滿足，暫時榮登我最喜歡的芋圓店。
《芋圓圓》
地址：太子荔枝角道88A號地下3號舖
電話：5543 0154
二零一八年十一月二十一日
登打士街一帶賣珍珠奶茶的店舖奇多，惟每次經過這店門外總是特別熱鬧，身邊幾個朋友亦不約而同地說它出品不錯，是日完成物理治療後抬頭一望，終於有機會一試！
芋圓奶茶 $21
芋圓微微煙韌且軟糯，吃到芋頭粒粒纖維，有淡淡芋香，加進奶茶內頗為合襯；怕太甜選了無糖，出奇地合口味，啜兩啜便喝完。
烏龍茶拿鐵 $25 (加芋圓+$4)
隔兩日和同事再光顧，喝表姐大推的組合；烏龍茶比奶茶的茶味更突出甘香，芋圓和之前嚐到的一樣出色，各人也表示頗為驚喜。
喝這些飲料大多會心跳加速兼手震，晚上的睡眠質素也或多或少受到影響。也好，如果常常心思思想回頭，體重定必一發不可收拾！順帶一提店員有禮，先是雙手遞上單據，又會替立即飲用的客人插入飲管，令人印象深刻。
《KOI The》
地址：旺角登打士街55號鴻達樓地下2號舖
電話：2385 8518
