二零二零年四月二十六日
出去食飯見到豬鞍有時都會叫嚟食，因為自己比較少整，平時連豬排都整得嚡，豬鞍咁厚應該駕馭不了。
某日喺HKTVMall買嘢依盒有追加優惠，之前喺AEON見個樣幾霸氣已經想試，有好多口味選擇，最後㨂咗最穩陣又大眾化嘅BBQ味。
根據包裝指示先煎香兩面，佢表面有海量醃料，好容易煎燶，已經細火同不停反都黑曬，要剪走啲燶先可以繼續下一步。封鎖表面肉汁後就可以入焗爐，160度焗45分鐘。
萬眾期待，切開唔算話好多汁，食落少少嚡但絕對可接受，肉質肉味都唔錯，唔會太鹹，調味重parika香料味。
無伏，但烹調時間頗長，未至於好食到要再買。購自HKTVMall，追加優惠$69.9。
二零二零年四月二十六日
好多年前喺大昌買過一款韓國出嘅Pizza餃，茄醬香濃仲做到拉絲效果，不過好快就無入貨，去過唔同超市凍肉舖想搵返都無。
偶然喺HKTVMall見到有Pizza餃賣，喚起咗我心入面久遠嘅記憶，立即買包試下。
打開一包12隻，大約麻將大少少咁上下size，三角形白雪雪咁。後面包裝指示將啲餃放入水煮7分鐘，睇到我黑人問號.jpg，明明我係想食幅圖嗰種香噴噴煎餃，唔理佢自己煎返熱佢算。一邊煎一邊煮其他嘢食，一不留神就煎到炭咁黑XD 下次會試下用焗爐焗，應該都可以。
依隻餃餡料包有海量芝士，唔太鹹，真係好似食咁Pizza，感覺好豐富，食得滿足。
非常推薦大家買又未至於，一試無妨啦。
*購自HKTVMall，星期二閃購價 $40
二零二零年四月二十六日
某日碌開IG，見到有人推薦阿信屋一款雞肉漢堡，覺得幾吸引，點知去到得返同系列嘅海鮮煎餅，無理由兩手空空而回，姑且買包試下。
打開包裝整返熱就食得，一包13件，食落彈牙，好似八爪丸嘅味道。同想像中嘅煎餅唔太一樣，不過幾特別，連我奄尖嘅媽媽都話唔錯，如果見到個漢堡都會試下。
購自阿信屋，折後約$28。
二零一九年二月十五日
經過聖誕同新年一輪暴食後，望住自己體重節節上升塊面越來越圓，決定的起心肝減少食無謂食物，希望脹卜卜情況唔會持續落去。奈何我班好同事永遠有我心，見到有新出甜筒下午茶預埋我一份，盛情難卻，食左先算:P
港式奶茶甜筒 $11@| $20/2
甜筒包裝設計用心，有茶餐廳味道；雪糕奶味重，茶味有但未算香濃，同之前限定口味一樣，個筒超級香脆，加左好多分。
可能食過其他品牌嘅奶茶味比較出色，依一支就相形見拙了，考慮埋個價錢就不過不失啦，上次個芝士奶蓋烏龍茶口味有驚喜啲～
各大便利均有代售
二零一八年十二月九日
對於要排隊的事不算熱衷，喜茶芝士奶蓋飲品且在早兩個月嚐過，而近來大熱的麵包在網上看過便算。周六北上尋歡按摩，好友當天不在狀態唯有和她暫時分道揚鑣，再會合時突然送上一個來自喜茶的麵包，甚驚喜窩心。
小芋頭條
為隆重其事，隔天特意用焗爐低溫翻熱。麵包烘到微脆，切開原來幾乎全是芋泥，味道天然不過甜，有濃濃的奶芋香。說它味道非常突出又不是，香港倒是比較少見以芋頭做餡的西式包點。
帶著好友滿滿的心意，無價。
二零一八年八月二十四日
近來啲台式飲品又興返真係估佢唔到，仲記得當年第一次飲貢茶嘅奶蓋係幾咁驚為天人，每次補習都整一杯珍珠奶杯真係好爽！
一直都欣賞啲公司會與時並進，雀巢連甜筒口味都追上潮流，真係要俾返個Credit佢哋個R&D Dept哈哈！喺網上見到啲報導已經好想試，不過行左兩間七仔都搵唔到，點知第二日同事就買左返嚟勁開心！
芝士奶蓋烏龍茶甜筒$11@
上面層奶蓋有淡淡清香嘅忌廉芝士味，下面係芝士同茶味扭紋，茶味唔算香濃，而個威化筒異常脆富牛油香，總括嚟講都幾驚喜好食，試得過啊！
二零一八年九月十六日
依家便利店成日都會入唔同國家嘅貨，食雪糕唔再局限於雀巢維記阿波羅，唔同口味應有盡有。某日睇到個post盛讚依個桃味雪糕餡餅，日本貨普遍有保證，加上包裝好有少女味貌似吸引，就買嚟試下。
Mimona 夏味 $16.9
依個系列以春夏秋冬四個時節做主題，夏味係桃加白朱古力，聲稱果汁果肉達36%！食落桃味濃但有少少人工，似平時食桃味乳酪隻味；而出面塊皮好食過Monka，唔會好韌有少少威化香。
不過可能我期望好高，最後食完覺得整體一般，唔會翻啅。
購自OK便利店
二零一六年九月二十五日
早前聖安娜出左一系列阿華田口味蛋糕，一向對聖安娜印象麻麻嘅我都無特別試，至哥女友某次買左返嚟覺得有驚喜，無論係慕絲杯定切餅兩者阿華田味皆濃郁，加埋上面塊餅真係錦上添花，廿蚊雞係會令我回頭。
有過之前食阿華田甜品嘅好經驗，麥當勞一出阿華田雪糕我已經勁想試，不過留意返新產品喺甜品站先至有，普通麥當勞期間限定係熱焦糖口味，想試的話唔好去錯。
嗰日喺東涌行完山，見到東薈城有賣就二話不説去排，可能因為星期日，條隊橫跨晒成個門口，得一個店員姐姐又收錢又整嘢食真係做都做唔切。排左十分鐘左右終於到我，阿華田系列有新地筒、新地、麥旋風同double新地四款選擇，價錢分別為$5.5、$8.5、$15.8同$17.5，而雪糕有紐紋同全阿華田揀，配搭有彈性。
一路排隊一路掙扎，唔知究竟買新地定麥旋風好，不過見到店員攪完杯麥旋風後會將成包機智豆車喺面，感覺又甜又唔夾，所以最後都係買左阿華田新地。人多做得求其，到手時覺得杯雪糕好似細杯過出面，但脆脆份量就好夠，急不及待試一啖，阿華田味係幾濃，同時奶味亦重，食兩啖就已經覺得有少少膩，唔會話想追住食，而面頭脆脆叫脆糖好似比較合適，會痴牙，一般般，諗諗下如果佢落餅碎應該會好味好多，依家總括食一次就夠，唔試都無損失。
想知邊度有甜品站：http://www.mcdonalds.com.hk/ch/restaurant-locator.html
二零一六年九月十日
平時已經成日出街食，多數高鹽高糖又多油，所以無論街外家內我都盡量少食即食麵。早兩個星期同事話我知佢近來食左一個好辣嘅韓國麵，誇張程度係佢老婆食左兩啖就要放棄俾埋佢，而平時譚仔食開大辣嘅佢食左一個半之後都有啲頂唔順，聽完絕對勾起我對依個麵嘅興趣，即刻要買個嚟試。
其實「三養」早幾年已經成日上全球十大最辣即食麵排行榜，而佢嘅杯麵上年喺香港亦曾經掀起過一陣試熱潮。上星期喺街見到巴士車身有登廣告，依家就連百佳都有引入，睇黎佢誓要打入香港市場。
我買嘅時候芝士味得返最後一大包，入面有五個，盛惠$28.9，價錢仲平過辛辣麵。懷著興奮心情返到屋企拿拿臨試煮，拆開包裝就係得一包醬同一包芝士粉，後面全部都係韓文，見到個數字"3"我就當佢係要煮三分鐘，水滾放個麵落去計時撈起，質感啱啱好。
心入面太淆底所以開始只係落左三分一包醬，撈一撈後最期待嘅時刻到來，第一啖：味道甜甜地，係辣但係無嘢喎，再加多少少醬先，第二啖：辣味夠，麵質煙韌彈牙，正當我感到滿意之際......媽呀原來佢係會越食越辣，食多幾啖先慢慢攻擊你，到尾段真心辣到眼水鼻水一齊流，搞到我本身已經好潤嘅嘴唇就變到更加性感，食完都仲辣左三個字啊唔係講笑！真係幾過癮，鐘意食辣不容錯過！
P.S.我本身譚仔食開四小架咋:P
