二零一七年十月二十八日
夏威夷遊記好好醜醜都叫做打曬，喺度一定要多謝同高度讚揚一齊去嘅旅伴。需知道要搵一個夾嘅人去旅行好唔容易，話就話同佢識左十年，但要對足二十四小時又另外一回事！
好彩八日七夜瞓埋同一張床無嗌過交，兩個咁9嘅人一齊，7事一發不可收拾，日日都笑到肚痛，係近大半年最放鬆開心嘅日子！
廢人如我唔識揸車又唔識睇地圖，一上車就淨係喺度un un腳食薯片(題外話：Lays BBQ勁好食)，辛苦曬優秀嘅你！!
最後返到嚟仲要送埋啲咁sweet嘅嘢俾我，搞到我喺地鐵又喊又笑，唔講連我自己都以為同你拍緊拖呀！所有回憶在心中，特此一記！希望將來睇返依啲遊記都可以令你回心微笑，愛你多謝你。
二零一七年十月二十七日
由Kona Island飛返去Honolulu，明明夏威夷出曬名一年四季都陽光普照風光明媚，係我地去到嗰日傾盆大雨落足成日，連個host都話喺夏威夷五年都未試過，唯有用美食同行街慰藉心靈。
第二日搭車去奧巴馬每年都要去嗰度渡假嘅海灘Lanikai，果然係水清沙幼，極多日本同韓國遊客，兩條友悠閒地喺個沙灘度坐左個幾鐘，望海望人(有個肥哥哥鍥而不捨地想爬上塊衝浪板超可愛HAHA)寫postcard～
睇夠搭返Uber出去食poke，雖然個樣好似嘔吐物，但食落幾有水準:9
夜晚返就係左去傳說中威基基海灘睇日落，似屯門黃金海岸，泊左好多靚遊艇，係浪漫嘅！
題外話：細個有無玩過酒店大亨！？次次抽到夏威夷都要諗下買唔買Hotel Waikiki，我終於嚟左喇XD
一眨眼已經最後一晚，飲嘢作結，時間都過得太快T_T 好想繼續chill落去...
總括嚟講夏威夷本島商業味濃但又有啲過時，都係Kona好玩啲！
二零一七年十月二十二日
為配合我地環島行程，喺小木屋度住左兩晚就要轉地方。當日玩左成日食埋晚飯入黑先到，搵左好一陣子先成功泊底架車抵達。
第二間AirBnB睇相已經覺得好raw好rustic，去到比我想像中仲要原野feel！話說姐姐我好驚家禽，點知個泰山咁嘅樣嘅host養左五隻自由走動嘅鵝，殺我一個措手不及。佢地成日全家出動走嚟走去，又會阻住條路，嚇到我每一步都小心翼翼唔敢呼吸，諗返起先覺得搞笑。
間屋係用木搭成，喺正公路旁邊，啲車好似會喺你頭頂經過，仲有唔同昆蟲/動物嘅叫聲，要挑燈去廁所同沖涼(一齊!!!!!!!XDDD)，有啲似細個去camp咁，初初有少少唔慣。
不過第二朝朦朧之中見到個景，嘩係咪發夢，靚到要爬起身影底佢唔係講笑！原來間房係睇到日出，加埋條一望無際嘅海岸線，藍藍白白、朦朦朧朧，感覺好平靜。
除左間樹屋之外，仲有一個廳同廚房都係包埋嘅，廳放左啲meditation/心靈書籍，加埋背後塊大象神掛布，好有靈氣，某日浮潛完後都喺嗰度hea左成個下晝。
住左兩晚總括嚟講都唔錯，不過比較多蚊同去廁所都要著鞋有啲麻煩，港女勿往。
二零一七年十月二十三日
今個旅程上天下海咩都玩齊，嚟到Kona Island最後一日，見價錢差唔多(好似係)，豪氣啲join左個deluxe tour去浮潛，不過話就話deluxe，其實都唔知同其他有咩分別哈哈，應該只係個午餐豐盛啲！
朝早八點九集合，絕大部份團友都係上左年紀，雖知道白人好容易曬傷，但唔知係咪因為啲防曬免費提供，佢地搽防曬嘅狼死程度真係嚇我一跳，厚到成個土著咁推都推唔勻，好貪心XD
今次總共去左三個地點，水好清保育做得好好，喺海度個感覺自由自在，不過啲魚同珊瑚唔似熱帶地區咁多樣同色彩繽紛；另外無諗過浮潛都可以見到海龜，勁近即刻唔敢抖氣，好興奮好值得。
玩到攰攰地返上船食嘢，曬住太陽咁瞓著左，嘆到=v= 乳豬就是如此煉成的！
二零一七年十月二十二日
朝早睇完火山，揸左兩個鐘去島嘅另一邊玩返啲水上活動。去到夜晚join左個睇魔鬼魚嘅浮潛，出發前唔係太想像到係點嘅一回事，原來船公司會喺海打盞大燈，成棚人一個貼一個密密麻麻扯住條浮繩，人形魚排咁款，都唔知佢睇我定我睇佢哈哈。
落左水一陣就見到啲魔鬼魚喺身邊游過，開始唔算太近，距離大約四米左右，睇睇下我一擰個頭，嘩條魚真心喺我觸手可及嘅位置擘大個口打橫游走，好震撼但其實都驚驚地，玩左一陣悶悶地上返船(重點係隔離條友成日我批踭同將部GoPro喺人面前掩掩揚揚，煩)
上水後凍到本來已有少少唔舒服嘅好友騰騰震，依個時候必須要食亞洲嘢無誤，隨便搵左間泰國餐廳，串燒炒金邊粉青咖喱，食完個身即時暖曬，叉返滿電買埋雪糕先返歸Yeah！
同場加映：感唔感受到有熱嘢食嘅佢係幾咁開心？！
二零一七年十月二十二日
環島遊嚟到第三站：火山國家公園，嚟之前無諗過會睇火山，亦唔知睇火山應該會係點，揸左個幾鐘車過嚟，每架車入場費USD25，七日之內無限入場，有時間嚟個深度遊都算抵。
去到首先入Visitor Center拎啲基本單張，就住唔同遊覽時間佢都會有啲建議路線俾你，或者邊啲景點睇啱都可以自由選擇。
之前上網睇到有啲Tour直情會睇到流動嘅岩漿，不過要預成日我地無咁多時間只好作罷。一場嚟到點都要四圍行下，落去地面凹凸不平、滿目瘡痍，以為自己拍緊咩災難片，以為會寸草不生啦但原來又唔係，地下仲有有啲窿會不時噴下煙，好過癮。
天氣好點影啲相都咁靚，可惜時間無多，玩到咁上下要走人嚕。
二零一七年十月二十日
Kona Island基本上無咩酒店選擇，一係要住大型連鎖集團嘅渡假村，靚係靚但太貴唔啱我地budget，其餘就算叫得做hotel嗰啲都係喺電影入面見到好舊式嗰種，甩皮甩骨咪話唔嚇人，最後決定住Air BnB，感覺貼地啲又舒適啲。
因為時間太緊逼又要就返個行程，有好多地方已經無房，最後搵到一間望落去都幾雅致嘅，唔諗咁多，扑搥！
由機場揸車過去大約一個鐘，連埋泊車位一千蚊一晚。自己一間獨立屋仔，一推門入去對住飯檯，左邊係床，右邊係廚房同廁所，地方好乾淨，麻雀雖小，五臟俱全。
出發之前應承左好友會煮早餐俾佢食，本人講得出做得到，雖然只係煎雙蛋加多士，但都「脆脆地」食住先。
同其他美國鄉郊地方一樣，大部份舖頭都好早關門，第二晚一樣由我操刀：羅勒醬雞扒配薯菜，加支本地啤，大滿足。
住左兩晚瞓得好好，臨行前host仲送左啲橙同香蕉乾俾我地食，開開心心上路去！
