【何文田】《嘉多利餅屋》-人氣流心開心果麻糬布甸包

二零二五年一月二十一日

一直以來都好喜歡嘉多娜的出品，無論是厚切餐肉滑蛋包、法包、Q餅、咖啡鬆餅、各式迷你包/bagel，以至蛋撻、鳳梨酥、曲奇，到後期的爆紅的布甸包等，全部出品都難得的平均又好味。

作為開心果愛好者，得知嘉多娜有新品後已默默記下想試；另一半是日剛好遇到出爐時間，下班後給我帶回來，真是讓人又驚又喜。

流心開心果麻糬布甸包 $13@/ $25/2

布甸包用了麻糬波波的煙韌外皮，中間布甸軟滑，面頭開心果醬超濃郁，直接加了好多分，不過覺得還是用以前的外皮更為合襯。

早前另一半都買了開心果燒餅給我，因為嘴饞沒拍照，新鮮熱辣的食好香好好味，個人認為更值得一試。

《嘉多利餅屋》

地址：何文田窩打老道69號地下C2號舖

【深水埗】《ohm... Cafe and Bar》-得意趣怪甜品雞尾酒

二零二三年三月十一日

好友由瑞士回港數星期，一早約好要由朝玩到晚；吃畢雞煲後意猶未盡，由西九龍走到另一端的ohm，周六晚上九時多門可羅雀，想不到尚算有名的小店會如此冷清，希望大家留港消費時都多多光顧小店。

Vodka soda $95

食完麻辣想要點清新的清一清味蕾，先來一杯伏特加梳打，青檸味濃好refreshing，正合心意。

豆腐花 $128

翻著其菜單發現有幾款招牌甜品雞尾酒供應，豆腐花本來就是另一半所愛，就點來試試；飲品以伏特加做基底，加上薑味烈酒、豆漿、椰子水和豆腐花，甜甜的易入口，不過略嫌椰水味太搶，還原度差一點。

紫米露 $128

另一款同樣是以香港傳統糖水做概念，用Bacardi 8 years冧酒做底，面頭甜薯泡沫令整杯更滑溜順喉，像真度高，有趣。

日式柚子芝士蛋糕 $58

菜單上的兩款芝士蛋糕皆點上，芝士香濃滑溜，個人較喜歡柚子的清新感，焙茶口味其實也好吃，但留在午後享受也許更合襯。

可能因為客人不多，可以和店員有傾有講，氣氛愉快融洽，過了一個盡興的晚上。

《ohm... Cafe and Bar》

地址：深水埗汝州街152號地舖

電話：6146 7930

【深水埗】《ALIVE EATERY by Alive Food》-鹹食比甜食更驚喜

二零二二年八月十二日

做甜品有一手的好友生日，思前想後，未知那一處地方還能令她感驚艷，最後還是自肥的選來一直想試的Alive。

它搬舖前後都未曾一訪，新店能容納大約二十人，地方小小雅緻，尤其喜歡它的歐陸式裝飾燈光，令人感到格外溫暖。

雙重芝士烤南瓜三文治 $98

三文治比想像中大份，面頭滿佈金黃芝士，望落非常吸引。中間南瓜存在感頗低，帶濕潤感，芝士份量非常慷慨，拉絲微鹹，食得滿足。

啤酒意大利走地春雞 2 courses lunch $158 (+$10)

半隻雞肉肉質嫩滑，調味豐富，醃得好入味；伴上的薯仔和紅蘿蔔烤得脆脆的，比許多專做西菜的餐廳更用心。

焦糖法國奶油酸種麵包布甸 $78

當初就是被這甜品吸引而到訪，滿心期待。布甸焦糖外層有少少脆，麵包索滿蛋汁，食落軟綿綿富蛋香；檸檬雪葩清香味濃，單吃美味，但配布甸不算融合，覺得雲呢拿味雪糕/忌廉會更合襯，整體未算好喜歡。

想不到鹹的比甜食更有驚喜，連好友也讚有心思，是近來少有想推薦他人的餐廳。

《ALIVE EATERY by Alive Food》

地址：深水埗汝州街131號地舖

電話：2638 2626

【大角咀】《想甜嚐甜》-多款特色心太軟

二零二二年八月五日 

開心星期五相約好友去到大角咀食串燒，見時間尚早有少許意猶未盡，食埋甜品渡過完滿一夜。

Jacob橙心太軟配乳酪雪糕 $60 曾經食過一間名牌橙皮朱古力，天然橙香配上苦甜朱古力，香氣甜度恰到好處，自此以後對於橙味朱古力尤其喜愛。見小店提供多款心太軟口味選擇，選來心儀的滿心歡喜地期待着，一切，咦？ ！說好的流心呢？冇嘅。不過撇除太熟有少少失望之外，蛋糕朱古力味香濃，配埋微酸嘅乳酪雪糕甚是匹配。好友嘅開心果味倒有驚喜，切開如泉湧之餘果仁香自然，好好食，下次會encore。

玄米小丸子紅豆鮮奶 $45

另一半怕太飽滯，選來簡單一點嘅糖水。配料有紅豆、小丸子、咖啡果凍、椰果、玄米脆脆等等，好食但沒大驚喜。

整體食物水準以上，惟其中一個店員比較嚴肅，令人有壓力，如果可以寛容少少更好哈哈。

《想甜嚐甜》

地址：大角咀嘉善街18號利奧坊二期地下G703號舖

電話：6892 1597

【黃大仙】《大街小館》-滋潤暖胃

二零二一年七月三日

食過佐敦分店留下良好印象，人在附近就嚟總店試下。由黃大仙中心行過去大約十分鐘，唔算遠但天氣熱都足以令人大汗疊細汗。星期六七點幾一個堂食客都無，環境比較雜亂擠逼，相比下佐敦店光猛整齊一啲。

椰皇燉蛋白湯圓 $52

面頭椰奶帶椰青水清香，燉蛋白震騰騰，滑溜之餘奶味濃郁，除芝麻湯圓外仲加入咗我最鍾意嘅小丸子，食完一個超飽超滿足。

質素同樣不錯，不過地點唔就腳，下次想再食都係會去返佐敦。

《大街小館》

地址：黃大仙銀鳳街16號地舖

電話：2326 6603

【大角咀】《Black Sugar Coffee》-商場綠洲：食輕食、嘆咖啡

二零二一年八月

三年前同好友飛韓國，十一月十幾度嘅氣溫底下佢都成日拎個風扇仔出嚟吹。依家炎炎夏日，搵個盡量唔使暴露於室外嘅地方，chill chill地食個lunch。

思前想後諗起早幾年食過嘅Black Coffee Sugar喺奧海城開咗分店，閒日十二點左右嚟到唔使等位，小店樓底高，天然採光， 木色黃燈加半開房式設計令人感覺溫暖。

Pesto Chicken Penne $128

香草醬味香濃，雞胸肉嫩滑，最後凍咗再食都唔覺油膩。

Avocado and Egg Toast $98

蛋炒得滑身，牛油果醬份量慷慨，伴上嘅沙律亦新鮮，感覺健康無負擔。

Homemade Waffle with Ice-cream $88

窩夫炮製時已飄來陣陣烘焙香氣，外觀無太花巧，窩夫係美式質感，微暖狀態下蛋香味突出；而雪糕用上Movenpick，香濃幼滑，不過略嫌楓糖合桃味太甜，有少少膩。

《Black Sugar Coffee》

地址：大角咀海庭道18號奧海城二期地下G16號舖

電話：3162 8229

【油麻地】《嘉多利天然酵母手作麵包店》-超人氣布甸包

二零二一年八月四日

自從得知嘉多利係良心小店後，間唔中都會幫襯支持一下。無論鬆餅、鳳梨酥定迷你麵包系列，全部有水準，食得出師傳嘅用心。是日早早食完晚餐，途經嘉多利見門外依舊有條長長嘅人龍，見距離布甸包開賣時間不遠，就湊湊熱鬧，最後等咗差不多四十分鐘先到手。

法式布甸包 $15

布甸包目測比女仔手心還要大，黃色布甸部份非常滑溜，食到雲呢拿香，仲有丁點酸酸地吊起個味。法包有輕微拉扯感，有麵粉香，鹹鹹甜甜非常滋味。見網上有人分享室溫、雪凍同焗熱三種食法，因為唔知會唔會/幾時再食，我三種都試過，個人最鍾意熱食，外層焗到卜卜脆，入面半流心，係幾有驚喜。

大大件又有質素，先賣$15一個，難怪人龍不絕。

《嘉多利天然酵母手作麵包店》

地址：油麻地碧街54號地舖

電話：29888018

【長沙灣】《Contrast》-黑白對比型格Cafe

二零二一年六月二十九日

放假日子樂得自在，朝早首先睇場《手捲煙》，然後去食傳說中香港第一嘅沙嗲牛肉麵，散步途經關注咗好耐嘅咖啡店驚見無人排隊，明明唔肚餓都照入去坐下。

小店裝潢以黑白兩色為主調，轉角位一邊全部用上玻璃牆身，採光度十足，有少少花花草草做裝飾，檯與檯之間唔算太逼，令人感覺舒服放鬆。

竹炭糯米窩夫配自家製牛奶雪條 $96

四件窩夫有著黑色外貌，唔係走外脆內軟路線，食落有少少煙韌，微甜有蛋香，伴隨嘅牛奶雪條冰感重，有奶味不過不算幼滑，而打發忌廉香濃，比起雪糕更得我歡心。

望見旁人嘅全日早餐個樣都甚吸引，有機會亦想試試其鹹食。

《Contrast》

地址：長沙灣福榮街512-518號依時大廈地舖

電話：2337 7220

【新蒲崗】《窩子》-三顧茅廬

二零二一年四月二十六日

古有劉備三顧茅廬，今有我三訪窩子，之前曾幾次想去，可惜一係太夜一係公休，與其無緣。是日行完山落到黃大仙，特意走到新蒲崗覓食，雖然人多要等但目標明確，決意一試。

星期六下午到來等咗大約二十分鐘，比想像中快，裝潢帶點懷舊味道，本來坐喺出餐通道有少少擠逼，好彩後來調咗檯，爸爸即刻開心返。

自家製喇沙汁炒扁意粉配虎蝦 $118

喇沙汁椰味同香料味皆香濃，意粉炒得入味，雪藏蝦肉味道一般，食到底有啲油，幸而調味對胃，越食越想食。

慢煮手撕豬腩窩夫三文治 $98

有時喺街都怕食手撕豬，因為多數好嚡，依到嘅手撕豬腩做得軟腍，燒烤醬惹味，底下窩夫亦做得出色，有蛋香之餘又脆口，鹹鹹甜甜，食得過癮。

自家製草莓醬梳乎厘鬆餅 $88

嚟依度其中一個原因係有朋友盛讚其梳乎厘鬆餅，講到咁好味一定要叫一客試下。梳乎厘鬆餅震騰騰，軟綿綿又有蛋香，面頭焦糖脆脆香甜，唔使點佢個果醬已夠美味。

整體不俗，但始終未超越到我心目中最好食嘅梳乎厘鬆餅店，可惜其已結業，回憶中嘅美味最難取替。

《窩子》

地址：新蒲崗仁愛街36號地下

電話：2796 0001

【佐敦】《大街小館》-好食價錢又佛心

二零二一年四月二十八日

平日少行入內街，某日由佐敦行去油麻地時發現小店，原來位置都幾方便，悄悄收入口袋擇日光顧。

小店裝潢簡單簡潔，比一般糖水舖坐得鬆動，夜晚七點半左右嚟到剛好唔使等位。

黑糖芋圓仙草凍 $38

嚟到一心想食芋圓，但依度嘅無論質地同味道(地瓜、紫薯、玫瑰)都唔太合口味，反而其他配料有驚喜：小丸子糯米味重，煙煙韌韌；玄米茶雪糕濃郁奶滑，真係有炒米香；紅豆大粒起沙；仙草同黑糖珍珠亦係水準之上。

依個價錢大碗又豐富好味，真係佛心，食得滿意！

《大街小館》

地址：佐敦吳松街93-103號德利樓地下C舖

電話：6891 1801

【大角咀】《芋圓一》－大大碗台式糖水

二零二一年一月三十日

行完山想食個甜品，星期六下午四點全場爆滿，一方面戥小店開心，一方面覺得政苦無謂，六點禁堂食唔知扼殺咗幾多小店生存機會。

黑糖薑汁芋圓湯圓 $38

糖水大大碗，一個人要食晒一碗有難度。薑汁香濃唔太甜，有齊蕃薯、紫薯、芋頭，當中以芋頭味最為突出，不過質感略嫌未夠咬口，未係我心中最出色嘅口感。

沿路途經唔少舖頭都關門大吉，希望同路人頂得住，一齊捱過去。

《芋圓一》

地址：大角咀角祥街48號地舖

電話：3618 9974

【旺角】《Happy Roller》－濃茶香卷蛋

二零二零年七月十七日

早有聞說這家傳統餅店卧虎藏龍，由年輕一代接手後兼售舊舖沒有的卷蛋，以少甜少油做賣點，希望大家能健康地享用甜品。

伯爵茶卷蛋

一條卷蛋大約分到五件，蛋糕輕盈軟綿，忌廉滑溜，內內外外都富佛手柑的香氣，用上稀少糖做成，的確比一般吃到少甜，吃畢整件都毫無膩感，出色。

《Happy Roller》

地址：旺角廣東道1000號地下

電話：2771 3495

【長沙灣】《甜一刻》－不畏強權

二零一九年十月十二日

早前新聞報導小店免費派發糖水後被人滋擾，不齒惡勢力恃勢凌人，即使地點不就腳都決意光顧，支持同路人。周六晚上八時多到達，店有大半滿，以糖水店來說也頗受歡迎。

最佳拍檔 $43
Menu印得密密麻麻，另有一些只寫在牆上的期間限定沒標示價錢，看得人有點眼花繚亂。隨便點個港式配搭，有雪糕、芒果、水晶珠、紅豆等，涼粉比一般吃到質感更好，其餘的都各在其位，口味較甜。

芒果芋圓冰 $43
天氣熱，另一款選來個冰凍的選擇，千呼萬喚等了近大半小時才上桌，配料有芒果、芋圓、小丸子、水晶珠及芒果冰底；芋圓較實不軟糯，冰底芒果味濃，感覺真材實料但過甜，小丸子是整頓唯一較為滿意的。

小店價錢比附近同類型的店舖進取，不論環境或味道也一般般，支持的是其理念和不畏強權的精神，其餘各方面也有進步空間，期待再臨可以樂見其改變。

《甜一刻》
地址：深水埗福榮街218號美居中心62號舖地下
電話：3568 6757

【旺角】《廿人木糰子專賣店》－煙韌控天堂

二零一九年七月二十三日

作為一個煙韌食物的愛好者，得知旺角有一糰子專賣店時早已心思思想試，是日吃畢晚飯後仍有胃納，目標明確地前往一試。

餐牌上有約十二款由寒天、白玉、紅豆湯、雪糕組合而成的甜點，個人喜歡芋頭又喜歡丸子，選擇也就呼之欲出。

寒天焙茶 $26
成品到手時是滿滿的一大碗，份量絕不欺場。牛乳寒天帶有淡淡奶味，質感有點像杏仁豆腐，雪凍效果更佳；芋泥球綿密有芋香，感覺天然少添加；重點的小丸子和小芋圓煙韌有趙口，吃得過癮；而甜味主要來自焙茶雪糕，雪糕稠密有黏性，茶味清香。

小店價格合理，質素確實令人驚喜，兩個人飯後分吃一碗又飽又滿足，會再戰。

《廿人木糰子專賣店》
地址：旺角洗衣街39號金雞廣場地下8號舖
電話：6996 7980