【葵芳】《牧羊少年咖啡館》-失而復得，倍感珍惜

二零二二年十二月九日

近日得知牧羊少年可以原址重開，心裡暗自高興，因早前臨別秋波之際再訪，吃得驚喜滿意，如今失而復得，將來會倍感珍惜。

韓式洋釀雞翼 $68

雞翼五大隻，炸得香脆熱辣辣，表面裹上的醬汁辣中帶甜，加上杏仁片多一份脆脆口感，各方面都恰到好處。

千島海鮮薄餅 $138

入座時見這薄餅的出現率最高，一於不執輸也來一客。菜單上有簡介薄餅餅底的由來，厚薄適中，焗起新鮮熱辣，面頭配料多口感豐富，一人半個也不膩。

日落巴黎：朱古力香蕉窩夫 $108

點主食時刻意節制，為的就是要吃窩夫做甜品。朱古力窩夫一客四件香噴噴，食落有蛋香，加上剛熟的香蕉，整件事絕對錯不了。

記得開業初期也有試過一次，印象平平，相比下真的進步很多，驚喜開心。

《牧羊少年咖啡館》

地址：葵芳興寧路12號葵青劇院地下2號舖

電話：2439 5669

【西貢】《Warm Bread》-溫飽溫暖，撫慰人心

二零二二年十月七日

出發西貢前已找來了數家餐廳要嚐新，在網上查好營業時間，興致勃勃前往，怎料剛好遇上男店主身體抱恙店休，隔天離開西貢前無論如何也要一嚐。

泰式冬蔭功班尼迪克蛋 $128

成品色彩鮮明，醃漬過的watermelon radish甜甜酸酸，和冬蔭功荷蘭醬互相呼應；兩隻蛋都做到流心效果，加上不過鹹的煙三文魚，口感更豐富。唯一挑剔的是彎形碟雖淺但小，切起上來不就手，有點狼狽。

南瓜海鮮濃湯配香烤酸種吐司 $138

湯底用爆香過的蝦頭熬出，在開房式廚房內一路烹煮，香味一路傳出，令人更期待。南瓜湯海鮮味濃郁，比想像中稀，伴上的自家製酸種吐司脆身，感覺無添加。

忙碌的店員見我們自備了生日牌，走過來輕聲地說了一聲生日快樂，親切窩心。人大了，生日不再想舖張，做什麼、吃什麼，都不太重要，有所愛的人在身邊就足夠。

《Warm Bread》

地址：西貢市場街9號地舖

電話：從缺

【西貢】《牛牛》- 沙嗲牛麵新貴

二零二二年十月六日

難得入到西貢，有好幾間想試的餐廳。中午特地吃少一點，留肚食下午茶。平日下午三點多大約等了二十分鐘，少少誇張，及後才知道小店剛在沙嗲牛肉麵群組及新假期被追捧，難怪人龍絡繹不絕。

鹽燒厚切牛脷芯 $48

牛舌切成骰子狀，食落口感軟腍無筋，有少少油，應該是炸而非燒的，好味不過沒驚喜。

沙嗲牛面頰撈麵 $50

出面少見牛面頰和撈麵食法，一場來到當然要嚐新。沙嗲汁濃稠，有花生香，牛面頰有近七至八件，非常慷慨，中間有筋膜連著，好好食，不過食到最後有點膩。

老闆和老闆娘工作雖然忙碌，但出菜前堅持抺碟，笑容滿臉，感受到他們的熱誠。

《牛牛》

地址：西貢福民路58號高富樓A座地下32號舖

電話：4611 6216

【西貢】《Kachimushi》-蛋香味濃荷蘭鬆餅

二零二二年十月六日

想不到閒日來到西貢是如此清靜舒服，好些受歡迎的小店都可以直接內進，省卻磨人的等待時間，令人心情愉悅。

小店地方比想像中小，大約容納到十至十二人，木系裝潢溫馨雅緻。

波特蘑菇 Open Toast $98

自家製Brie Truffle醬汁濃稠，大啡菇啖啖肉汁，加上現磨的parmasen芝士增添香氣，有畫龍點睛之妙，如麵包換上sour dough更完美。

雜莓 Dutch Baby $68

Dutch baby有四款口味，見到雜莓是西貢限定所以點，不過吃下雜莓就是雜莓，沒什麼特別哈哈。Pancake蛋香味濃郁不過甜，帶有牛油香氣，簡單好吃。

《Kachimushi》

地址：西貢市場街35號 

【西貢】《Little Cove Espresso》-美味用心Open Sandwich!

二零二一年十一月二十六日

是日天朗氣清，行完破邊洲、撿豬灣後決定食個靚女late lunch，揀咗一直都想試嘅Little Cove。小店人氣高企，基本上每次經過都要排隊，下晝三點左排咗大約十分鐘算是幸運，我哋入座後同樣人龍不絕。

Chocolate Beetroot Latte $38

另一半最鍾意試古靈精怪產品，見到紅菜頭朱古力咁有特色就叫咗嚟試。成品啡紅色，飲落有丁點紅菜頭味，係一杯好味嘅朱古力奶。

Pulled Pork Benedict $120

本身唔算好鍾意Pulled pork，覺得似煲湯肉，好彩依度嘅唔太嚡，燒烤醬調味得宜，流心蛋汁令成個口感更濕潤。

Chicken and Hazelnut Dukkah on Sourdough $110

原本諗住補充一下蛋白質而叫嘅雞胸，估唔到咁有驚喜。雞肉孜然、芫茜等香料味濃，肉質嫩滑，加上鹹香feta同rocket，成個口感好豐富，滿滿中東異國風情，食到最後仍然覺得美味滿足。

離開時已默默盤算住要再訪，期待！

《Little Cove Espresso》

地址：西貢海旁廣場兆日樓地下1-2號舖

電話：從缺

【荃灣】《Expresso Alchemy》-清新Coffee shop：鹹食有驚喜

二零二一年十二月一日

唔知大家有無同感，自從COVID之後時間好似飛一般流逝，唔知做咗啲咩又年尾。感覺啱啱先去完百貨公司半年一度大減價，一眨眼又有週年慶。是日同媽媽去八卦有咩優惠前先喺附近醫肚。

經過依間咖啡店不下數十次，今日終於一試。一大片落地玻璃有天然採光，幸運地坐到窗邊位，心情隨之豁然開朗。

伯爵茶鮮奶朱古力 Set+$10

店員小心翼翼奉上，見到個拉花已令人心花怒放。飲落伯爵茶味突出，配上朱古力牛奶頗為特別，順滑香濃。

宇治抺茶鮮奶 Set+$10

見其外表翠綠偷呷媽媽的一口，牛奶厚醇，抺茶味清香。

牛肉雜菌三文治伴沙律配檸檬醋醬 $88

麵包上有格仔坑紋，中間餡料份量澎湃，望落非常吸引。雜菇洋蔥炒肥牛肉夾，有少少日式感覺，頭半份好好味，之後感覺較為肥膩同略鹹，好彩沙律份量俾得極足，用嚟間場最好不過。

香煎虎蝦配露荀辣蕃茄汁意粉 $118

三隻雪藏蝦大隻彈牙，蕃茄味醬汁帶甜，意粉燴得入味又不過軟，偶爾有少少辣勁，整體惹味開胃。

藍莓蛋糕 $30

俾錢之際見到餅櫃有幾條其貌不揚嘅自家製蛋糕，興之所至要咗一件。蛋糕有手掌般大，望落同食落都好乾，目到藍莓但無味，感覺唔太新鮮，唯一可取之處就係甜度適中。

帶住滿滿戰鬥力，出發購物去。

《Expresso Alchemy》

地址：荃灣楊屋道8號如心廣場一期地下G02號舖

電話：2703 7188

【大圍】《E For Egg》-超人氣盒子吐司

二零二一年九月四日

好友新居入伙，探望佢前先醫肚。星期六下晝兩點三去到，無食嘢情況下等咗一個鐘，附近又無商場，大熱天時都幾辛苦。

煙三文魚芝士滑蛋盒子吐司 $65

多士烘得香脆，有牛油香，蛋炒得滑溜，加上不過鹹嘅煙三文魚同蜜糖芥末汁，口感豐富，食得滿足。

香蒜黑松露雜菌拉絲芝士滑蛋盒子吐司 $65

吐司端上之際黑松露味已湧出，菇菌有蒜香，多士同樣高質；另外配上嘅洋蔥圈雖然只得兩件，但炸得香脆，過下口癮。

食物品質的確唔錯又唔算貴，都想一試其招牌甜吐司，有機會再嚟。

《E For Egg》

地址：大圍城河道19-25號城河樓地舖

電話：5347 0262

【葵芳】《菓屋》-表現平平

二零二一年四月一日

食到咁上下好友話想飲啲解膩嘅飲品，經過依間木系裝潢、主打生果茶嘅茶飲店，記得網上都有幾多人推薦，見未試過又試下。

百香果茶 $25/ 蜂蜜橙茶 $25

已經叫咗少冰但仲係好凍好凍，入面有少少熱情果籽，茶味唔突出，味道似包裝飲品，有啲失望。另外好友嗰杯蜂蜜橙茶都係略淡，整體一般。

《菓屋》

地址：葵芳葵富路7號葵涌廣場2樓C76B號舖

電話：6933 3998

【葵芳】《慧食貓》-酥脆豐富手抓餅

二零二一年四月一日

行咗幾個圈，落返一樓見慧食貓終於開門，門口已經有唔少人喺度等外賣。咁多年個哥哥仔都係唔使用筆落單，只要照時間行埋去佢就會遞上你點嘅食物，記憶力實在驚人！

火腿肉鬆蛋手抓餅 $24

手抓餅配料可自選，或者有幾個已配搭好嘅選擇。手抓餅煎得香脆唔油膩，火腿、肉鬆、煎蛋加上沙律醬同生菜，充份表現出簡單就是美依個道理。

食咗三樣飽肚食物，戰鬥力下降至零，是日掃黃行動告終，期待下次再同好友過嚟再試下啲新嘢食。

《慧食貓》

地址：葵芳葵富路7號葵涌廣場1樓B01C號舖

電話：6586 6386

【葵芳】《黑布小巷》-濃厚台式吐司

 二零二一年四月一日

繼續掃街之旅，時間尚早，唔少心儀嘅店舖都未開門，經過三樓見到上星期旺角分店才剛結業嘅黑布小巷分店，之前一直無機會試，即時雙眼發光冒出心心！

台式芝士肉蛋吐司 $53

多士兩面搽咗牛油，烘得香脆；入面夾有豬扒、流心蛋同芝士，加埋秘製醬汁，成個配搭好豐富，個芝士尤其香濃出色，食得滿足。

唔知係咪地方太細又製作需時，小店暫時唔再賣依款食物，有啲可惜，不過亦期待佢將加入嘅新作。臨走再見到佢有賣自家製芋圓，有機會嚟試吓。

《黑布小巷》

地址：葵芳葵涌廣場3樓摩登世界26號舖

【葵芳】《問卷手卷專門店》-眼花繚亂！太卷款式又多又吸引

二零二一年四月一日

疫情以來幾乎無去過掃街，近日心思思想食吓垃圾，相約好友喺閒日去葵廣，大食一番！咁耐無去感覺依舊親切，由底層開始掃返上去，第一站去到問卷手卷專門店，十二點三左右已經有三數個人等緊。

爆脆卷 $35

太卷選擇甚多，有選擇困難症嘅相信都要一段時間先決定到。爆脆卷即點即做，包含三文魚、天婦羅脆脆、青瓜，加上少少醬汁，一口一件、簡單清新。

店主歡迎自備容器餐具，食得更環保開心。

《問卷手卷專門店》

地址：葵芳葵富路7號葵涌廣場地下A48B號舖

電話：9722 3422

【荃灣】《RealT》－偶一為之，令人滿足

二零二一年一月二十九日

路德圍茶飲黃店多，相對其他依一間就比較少人講，行開附近一試。小店招牌大大個"R"字，離遠都望到，無多餘裝飾，望落整潔企理。

芋圓芋泥牛奶 $30

疫情關係我拎咗返屋企先飲，牛奶用明治出品，香濃幼滑，芋泥有淡淡芋香，芋圓煙韌略甜，整體質素唔錯，偶一為之好飽好滿足。

啜啜下忽發其想，打開蓋倒出嚟當糖水食應該仲正，有機會試下。

《RealT》

地址：荃灣荃興徑25號安富大廈地下B號舖

電話：2363 0909

【元朗】《Accro Coffee》－體驗豐富，難怪人龍不絕

二零二零年十月九日

半年前已經嚟過一次，但人太多只好作罷；是日閒日下午兩點幾去到，要等三幾張檯，大約半個鐘先入得。

門外一大幅水泥牆，低調神秘，推開趟門彷彿進入咗另一個世界−右手邊一排到頂櫃放滿唔同咖啡杯同器具，樓底高，配合深啡色嘅檯面，有置身日本嘅感覺。

橙皮朱古力 $38

對於橙味朱古力總係無從抵抗，朱古力味濃香，略甜；偷飲過同伴嘅咖啡真係出色，連平時少飲咖啡嘅我都忍唔住啜多幾啖！

Chicken Breast Panini $50

同一般所認知嘅烘到一坑坑嘅Panini唔同，依度無將麵包夾扁；三文治熱辣辣，千島醬、芝士份量多，加上雞胸肉，簡單好味。

Plan B Waffle (full portion) $90

八字形擺盤花過心思，窩夫外脆內軟有蛋香，配上特濃朱古力雪糕同自家製伯爵茶忌廉，滿足甜牙齒。

坐吧檯闗係可以清晰見到咖啡師手藝，由量度咖啡豆、水量，到控制落水速度、試味，成個過程都好專注認真，睇到我目不暇給！氛圍佳，視覺、嗅覺、味覺都被滿足，難怪人龍不絕。

《Accro Coffee》

地址：元朗安寧路162號金城樓地下D號舖

電話：9430 1433

【葵芳】《茶理史》－清新解渴，茶味回甘

二零二零年六月十五日

平日少喝台式飲料，一般太大杯，飲一杯會吃不下其他東西，而且熱量不低，我寧願吃頓飽足的飯。在樓上吃完三文治後有點渴，經過這家茶飲店，點杯清新的解膩。

熱情果松柏烏龍 $26

飲用前店員有提醒不能上下搖動，飲管都可以啜得到粒粒熱情果肉，微糖超對口味，茶味回甘，夏天來一杯的確解渴，忍不住狂飲，一流。

《茶理史》

地址：葵芳葵富路7號葵涌廣場2樓2007號舖