〖台北〗完美結束！真正做到放鬆食買行！

二零一七年十一月二十八日
 
對於一個好似我咁為食嘅人嚟講，去旅行其中一樣最開心嘅事就係四圍搵好嘢食然後帶返香港同大家分享，望住自己啲戰利品真係勁開心。早兩年都分享過(按我)心儀嘅蛋糕同爆谷，今次有伴一齊買得更開心！

 
旺萊山標榜用台南土鳳梨，買嘅時候有得試食，仲要係微微烘熱過好有心，外皮鬆化有牛油香，餡料味道唔太甜，食完唔膩，試得過。牛軋糖首推淡水滬尾餅舖；圓山站花花邦妮爆谷係翻啅之選；原來焦糖果仁撻亦卜卜脆又香口；仲有水果、蛋糕hand carry上機，為左食可以去到幾盡！？

 
除左嘢食之外買得最開心一定係文具貼紙同咭，如果你同我一樣鐘意依啲小玩意就必去金興發；同房Mami係老師佢每一張貼紙都話送俾Auntie，跟住Uncle開畫室佢又可以買啲好靚嘅咭話俾佢做Sample，條友根本瘋狂滿足自己購物慾=..=好羨慕！

 
一齊住過三年真係唔係浪得虛名，你就下我、我陪下你，無特別需要磨合，四日三夜開開心心渡過，感謝相伴。下年相識十週年(!)，再一起出走好嗎？Wohoooo嬸嬸萬歲！
 
台北之旅整合：：：：
〖台北〗四日三夜，出走放鬆食買行
〖台北。大安〗台北司旅 Chez Nous Hotel
〖台北。大安〗在地台灣人都食：佳佳香鍋貼
〖台北。大安〗＜美好年代＞紅極一時，珍珠奶茶鬆餅塔
〖台北。中正〗＜良品牛肉麵＞老字號！餐點美味份量足！
〖台北。大安〗＜吳留手串燒居酒屋＞我們來乾一杯
〖台北。淡水〗＜源味本舖＞新鮮出爐香噴噴：古早味蛋糕
〖台北。淡水〗＜麻吉奶奶＞必食！驚喜味美鮮奶麻糬
〖台北。松山〗鄰近捷運夠熱鬧：饒河街觀光夜市
〖台北。忠孝復興〗 ＜鼎泰豐＞百吃不厭：食物服務皆出眾

〖台北。大安〗台北司旅 Chez Nous Hotel

二零一七年十一月二十五日

同同房都係爽快嘅人，基本上好順利又好效率已經買好機票訂好酒店。

平時去旅行我多數負責機票酒店仲有去邊度玩，今次同房睇中左某間新開無幾耐嘅精品酒店，問我好唔好我睇都無睇過就話好哈哈，難得有得依賴就依賴下先！

 

酒店位於大安區，因為離捷運都有十分鐘左右腳程，拖住行李費事行，我地搭機場快綫到台北車站之後再打的。去到好似一棟單幢式Service Apartment，只有一個櫃台仔做曬所有嘢，不過我地咁多次基本上都唔洗等。

Check-in之後管家同埋我地一齊上去介紹下間房，一開lift成層得一間房，打開房門更加嘩一聲，地方好大有個偏廳咁嘅物體(不過床相對細)，開檯麻雀都仲綽綽有餘。

廁所有淋浴浴缸同兩個洗手盤，馬桶係日式「免治馬桶」，而沐浴產品係我鐘意嘅天然草本味道，仲有一大塊落地玻璃，用起上嚟稱心自在。

間房咁多空間，有一樣嘢令我地不明所以，就係點解得一張凳咁大把？出完街未沖涼唔會瞓上床，我地其中一個每日都要好可憐咁坐喺床邊睇書/玩電話/休息，諗返都覺得好好笑XD

而酒店都有自己餐廳，採光力強，感覺精神抖擻。

 

早餐一人一份即叫即整，可以揀煎蛋/炒蛋/奄列同埋火腿/腸仔/煙肉，味道正常好味，但連食三日就有啲悶，到最後嗰日連肉都唔要。



總括嚟講酒店地點就靜中帶旺，價錢屬於中價位，性價比唔係特別高，好在人少少，櫃檯人員好helpful，住得舒服。

＜司旅＞
地址：台灣台北市大安區信義路三段147巷18號
網址：http://www.cheznoushotel.com/

〖台北。忠孝復興〗 ＜鼎泰豐＞百吃不厭：食物服務皆出眾

二零一七年十一月二十八日

眨下眼嚟到最後一日，經過百貨公司見到有鼎泰豐，驚覺今趟旅程未食過類似食物，明明早餐都未落格，但唔食就無機會所以都係食！

下晝點幾鐘兩個人等左二十分鐘左右，等嘅同時可以喺附近睇下有咩手信好買，時間都好快過；間舖好大坐得舒服，仲有啲籃俾人擺嘢，非常貼心。

鮮蝦鍋貼 NT190/6隻
鍋貼一客六隻煎得脆口，包入蝦肉更顯鮮甜。

小籠包 NT105/5隻
皮薄餡靚，熱辣辣湯汁慢慢流出嚟，清爽唔油膩。

擔擔麵 NT100
麵條彈牙有咬口，花生味同胡麻味香濃，係我鐘意嘅口味。

雖然香港都有鼎泰豐分店，但成個體驗同味道都唔一樣。除左食物真係有水準之外，亦好佩服侍應們永遠都笑咪咪咁好有禮貌，感受到佢地係由心而發唔做作，加埋價錢合理，難怪門口長期都圍滿人，咁多年喺台灣以致世界各地都能佔一席位，好厲害。

＜鼎泰豐＞
地址：台北市忠孝東路三段300號B2 (SOGO復興館)
營業時間：週日至週四10:00~21:30　週五、六及例假日前夕10:00~22:00
網頁：https://www.dintaifung.com.tw/store.php

〖台北。松山〗鄰近捷運夠熱鬧：饒河街觀光夜市

二零一七年十一月二十七日

出發前兩人興致勃勃話要食麻辣火鍋，但三日以來幾乎無一刻係餓過，食到有啲滯，去完淡水決定skip個正餐，直接去夜市掃街。

台北夜市唔少，上網一查已經有好多「台北十大必去夜市」、「台北夜市美食推薦」、「台北夜市交通整理」等等嘅文章，除左大家熟悉嘅士林/師大/寧夏，今次揀左松山區嘅饒河夜市，成條街左右兩邊都好多嘢食，賣嘢嘅就相對較少。

由捷運站行過去大約十分鐘嘅距離，去夜市最開心就係可以見到咩就買咩，每樣試少少，啱曬心多多嘅我地。

兩個女仔唔食得多，只可以小心翼翼行事，最後食左大阪燒/炸雜菇/藥燉排骨/芋包芋/胡椒餅/木瓜奶/一芳，全部都唔錯但又未至於要再食嘅感覺。

食飽行埋出去彩虹橋附近散步，吹住晚風係幾浪漫哈哈；一眨眼就嚟到最後一晚，唔捨得*^*

饒河街觀光夜市
地址：台北市松山區饒河街

〖台北。淡水〗＜麻吉奶奶＞必食！驚喜味美鮮奶麻糬

二零一七年十一月二十七日

預左一日去淡水之後就例牌搵下有咩嘢食，見到好多人都推薦麻吉奶奶，不嬲都鐘意食麻糬，一於放佢入口袋名單試下。

花生鮮奶麻糬 NT100
嚟到白雪雪一攤嘢咁，要分開佢地都有少少狼狽，依度嘅麻糬賣點係無加糯米粉，所以質地較為軟熟，唔似一般咁煙韌，凍凍地滲出淡淡牛奶香，加埋面頭炒香左嘅花生粉，好好食好有驚喜，兩個人由頭讚到落尾，食完一份仲有啲唔夠喉，可惜唔係度度有，如果唔係一定會狂encore!

另外仲有芝麻/擂茶/椰絲紅豆三個口味，價錢為NT100-NT120不等，全部都好似好正好夾咁啊！值得推薦！

＜麻吉奶奶＞
地址：新北市淡水區中正路220號
營業時間：週二-週日12:00–20:30 (週一公休)

〖台北。淡水〗＜源味本舖＞新鮮出爐香噴噴：古早味蛋糕

二零一七年十一月二十七日

之前上網見到淡水有啲”doin doin doin” 嘅蛋糕一直都想試下，明知好大份兩個人一定食唔曬但任性如我唔理買左先算。同一條街每隔幾間舖都係賣依款古早味蛋糕，揀左一間門面最新潮嘅，光猛啲個盒可愛啲，食都食得開心啲！

古早味蛋糕(原味NT80/芝士味NT100)
蛋糕每一次出爐有五件原味五件芝士，啱啱焗起時脹卜卜，一路睇住師傅將佢切開感覺治癒。一場嚟到當然每樣一舊試試佢，蛋糕蛋味好香濃，質地係鬆軟而濕潤(似好味版紙包蛋糕)，味道唔太甜，芝士味仲有少少鹹香，比原味略勝一籌，以依個價錢嚟講性價比超高！如果我住附近一定成日食，做早餐/下午茶一流。

另：排隊時有個台灣阿媽起勢咁同我地講台語，我聽左兩句之後勁無義氣擰埋一面拍片，難為同房係咁點頭回應，笑鬼死哈哈哈

＜源味本舖＞
地址：新北市淡水區中正路145號
營業時間：平日11:00-19:00/ 假日09:00-20:00
網址：https://www.originalcake.com.tw/