【青衣】《三點三冰室》-高下立見

二零二五年一月六日

星期一是我的家務日，整理完家裡已是下午茶時間，和另一半走到青衣城地下的茶記吃個茶餐。三點三剛開幕的時候光顧過一次，印象中味道不賴但價錢偏貴，一個份量普通的常餐都收六十多，想要凍飲更要七十。

公司三文治配紅豆冰 $52

三文治有烘底，炒蛋嫩滑，中間雞扒偏細，有一件根本完全不見其影踪，和我想像中啖啖肉的三文治有少許距離。

雖然坊間的紅豆冰已經好少再用碎冰，但上桌時見到是用原粒冰還是有點失望，成杯也是花奶，紅豆不算綿密，超級甜。

黑椒汁肥牛撈公仔麵 $52

望落好普通，食落也是完全可以想像的味道。

吃罷不禁在想，為何有些茶餐廳可以做得有如此有聲有色大排長龍，為何有些總是浮浮沉沉，高下的確立見。

《三點三冰室》

地址：青衣青敬路31-33號青衣城1地下G24-G25號舖

【荃灣】《ADO 洋食屋》-滑溜無瑕蛋包飯

二零二四年一月十七日

主打日式蛋包飯的店舖不多，小店開業三年左右，早前由大圍搬到荃灣，看樣子活像睇卡通片裡頭會出現的食物，感謝好友陪我一試。

炸雞(四件) $36
新鮮炸起熱辣辣，好入味。

經典牛肉汁蛋包飯 $82 (Set +$25)
切開見著雞蛋緩緩流下的一刻令人興奮！蛋滑溜不膩，茄汁炒飯略嫌乾了一些，配上醬汁同吃更好。

白味噌奶油燉雞腿肉 $86

雞塊有四五件，還有薯仔紅蘿蔔西蘭花做配菜，不知道是否味增也是發酵食品的關係，汁醬吃起來散發著少少blue cheese味，頗有趣。

整體味道不俗，裝修有日系超和風格，有些細節位倒可執整一下，例如飯粒可更軟糯、增添FPS QR code等，有機會也會想試試明太子意粉同布甸🍮

《ADO 洋食屋》
地址：荃灣享成街8號香城大廈地下5A號舖

【青衣】《而打淥滷汁拌粉》- 香噴噴台式滷味

二零二三年八月十九日

自而打淥進駐青衣城二期之後，每次經過該舖位都會聞到陣陣滷水香氣，令人口水直流！疫情時幫襯過一次，味道唔錯但價錢略貴，至近來見到佢轉Menu，星期六搵埋另一半一齊試下。

鹽酥雞

鹽酥雞新鮮炸起，一口一粒，卜卜脆有肉汁。

胡麻醬手撕雞撈冷麵 $46

冷麵一大盒份量十足，配料有雞肉、高麗菜同青瓜，除咗一般嘅麻醬味，醬料仲加入咗五香粉，食落清新，香口惹味。

而打淥豬三樣飯 $68 (連飲品)

金牌滷水豬腳好大隻，有滿滿骨膠原，原隻上好睇不過食時有少少狼狽；豬耳爽脆入味；台南肉燥唔會太肥，有少少豬皮口感黏黏地好正，滷汁帶甜好餸飯。

今次二訪覺得幾有驚喜，飯麵價錢唔算貴又大盒，買外賣食又多個選擇了。

《而打淥滷汁拌粉》

地址：青衣城2期1樓181號舖

電話：2866 6620

【荃灣】《老厝邊》- 大大份抵食台灣菜

二零二三年八月四日

自年初開關後，身邊朋友唔係飛歐洲就是日本，連社交媒體都不停推薦我台灣美食，睇到我心癢癢，即使喺香港都要先食餐好嘅止止癮，平衡一下心情。

芋泥起司蛋餅 $42

蛋餅有好多唔同口味，第一次當然要試吓個招牌；芋泥份量多且綿滑，略嫌有少少自己唔太偏好嘅香精味，好在有海量芝士同肉鬆搭救，再點少少醬汁味道更上一層樓！

好呷炸物拼盤 $50

拼盤有齊花枝丸、甜不辣、四季豆同玉米筍，全部炸得香口乾身，加上味粉，惹味好食。

香噴噴炸雞排便當 $70

一嚟到第一個反應係：超！大！碗！除咗雞排外仲有三款伴菜，分別係蒜蓉西蘭花、肉碎茄子、大豆芽，仲有半隻滷水蛋，食一啖都好豐富，肚餓時食非常滿足。

招牌牛三寶麵 $83

牛肉麵有紅燒湯/麻辣湯/拌麵三款選擇，初嚐還原基本步試紅燒口味，三寶為牛𦟌、牛筋同牛肚，全部滷得入味，不過坊間有唔少專注做麵的比其突出，整體不過不失。

價錢唔貴又大份，難怪人龍不絕。

《老厝邊》

地址：荃灣大壩街25號地舖

電話：2332 8885

【西貢】《白鬚旗艦店》-嗅嗅峇里海洋氣息

二零二二年九月二十五日

秋高氣爽，是日選了一條輕鬆路線，由大水坑行到西貢，午飯時間剛好回到西貢市中心，幸運的遇上上一輪客人離開，可以即時入座。

小店樓高兩層，下層座位十餘個，一行四人被安排至水吧旁的長檯，十分闊落。

印尼沙律 $78

蔬菜切絲白烚，五顏六色營養均衡。另上的醬汁濃稠要花點心機撈勻，花生沙嗲味濃，甜甜辣辣，惹味得來又健康。

小食拼盤 $100

薯條、薯角、春卷、泰式魚餅、紫菜雞卷，炸物香口不油膩，可惜魚餅和雞卷超深色炸得過火，怕太熱氣放棄了。

印尼雞湯粉$65

雖然望落細細碗，但夾起上來亦分到四份；淡黃色的湯底味如喇沙，有咖哩和椰汁香。

白鬚印尼牛丸粉$70

深褐色的湯底清甜，自家製牛丸不是走彈牙路線，比一般的結實有肉味。

白鬚牛骨湯飯 $95

湯底胡椒味濃，帶牛骨牛油香氣；牛腩坟得軟稔，有點像吃清湯腩的感覺，好餸飯。

《白鬚旗艦店》

地址：西貢灣景街9號地舖

電話：2720 3168

【將軍澳】《柴石燒》-香噴噴石燒

二零二一年六月二十七日

難得去到將軍澳，決定去早前告急嘅黃色foodcourt度支持一下，第一次去唔熟路，兜咗一大個圈先搵到。一入去煙霧瀰漫，目測有近半人都係食石燒，被香氣迷惑，唔執輸食埋一份。

紐西蘭肉眼扒定食 $88

基本上一叫完都未行到埋位個傳呼器就已經響，牛扒嚟到嘅時候只係輕輕煎封過表面，有一定厚度，食落軟腍又有肉味，配埋湯、沙律同飯，依個價錢嚟講好抵食。

Food court個抽風設備一般，食完個身會有少少燒烤嘅味道，如果可以改善一下就好了！

《柴石燒》

地址：將軍澳唐俊街18號The Parkside1樓日日・食良

電話：從缺

【荃灣】《老闆娘米線》-與眾不同

二零二一年四月七日

一直以嚟都久仰老闆娘大名，星期一中午十二點半去到，一點入座，店員交待話外賣單較多可能要等耐少少，最後差唔多兩點先有得食，依家諗返都覺得有少少誇張，怕餓嘅真係要打定底先去。

招牌雞球拼豆卜蝦膠 $55

好友推薦我食蒙古湯底，有肉碎、芽菜等配料，重孜然味，在外面的確無食過依個味道，幾特別。雞肉啖啖肉，炸得乾身香口之餘仲有肉汁，不愧為招牌。豆卜蝦膠同樣卜卜脆唔油膩，用心製作。

Overall餸菜款式特別，仲有其他自製嘅產品想試，不過大熱天時要等令人更卻步，都係留待冬天再戰。

《老闆娘米線》

地址：荃灣曹公街8號香車街熟食中心3樓28-29號舖

電話：9842 1971

【荃灣】《Bamboo Thai》-泰國風情

二零二一年五月十一日

好耐無同媽媽兩個人出去食嘢，趁住母親節嚟個母女約會。

自從發現屋企行路去荃灣只喺需要半個鐘之後，我哋成日過去當散步。中午時份行到大汗疊細汗，一到如心廣場就覓食去。揀咗電梯上去就望到嘅泰國菜，閒日近兩點唔使等，仲安排到卡位，坐得舒適。

熱帶風情 $42

天氣熱辣辣，連平日少飲凍飲嘅媽媽都要咗杯沙冰。沙冰芒果味濃，唔會太假/太甜，大大杯飲極都有。

洛神花黑糖薑茶 $42

洛神花略帶酸，有黑糖中和，加上新鮮薑嘅辣勁，討喜。

泰香魚餅 $68

魚餅一客四件，似自家手打，加入檸檬葉等香料，食到鯪魚味。

清新柚子蝦沙律 $72

柚子肉多汁，蝦大隻爽彈，薄荷葉有如神來之筆，清新開胃。

火山排骨(小) $118

店員捧上時個感覺好有派頭，三、四舊骨疊得高高，肉質似腍滑嘅煲湯肉，全靠底下嘅蒜頭、魚露、汁醬調味，細份份量都好多，建議四人以上先好叫。

泰式臘腸蟹肉炒飯 $128

飯炒得乾身有蛋香，蟹肉主要散落在上，加埋半肥瘦臘腸、露筍，食落好惹味。

兩個人飽到晚飯都幾乎食唔落，媽話下次再一齊搵食，你開心我就開心，約定你。

《Bamboo Thai》

地址：荃灣楊屋道8號如心廣場一期1樓105-107號舖

電話：2662 0062

【荃灣】《段純貞牛肉麵》－寶島滋味

二零二一年三月十日

那天和好友說起，復飛後會想到那兒。我想念居於歐美的家人，想念東南亞的陽光與海灘，還有一個個心儀但未曾踏足過的國度⋯⋯想著想著真的好想出走一下，唯有靠美食來慰藉心靈。

如心廣場店是段純貞台灣以外的第一家海外分店，近來在網上頗為火紅，閒日兩點到來都要排上十至十五分鐘。店家裝潢古色古香，幸運的被安排至卡座，坐得舒適。

金橘蜂蜜綠茶 $28

一般對麵店的飲品沒甚期望，想不到這兒的茶飲也做得絕不馬虎。綠茶味清回甘，酸酸甜甜、醒胃解渴。

三寶麵 $92

呈深啡色的湯底帶有滿滿的藥材和滷味香，手工麵粗身有咬口，牛筋滑溜，牛肚軟腍無渣，腱心肉真的比平日吃到的更嫩滑，好驚喜。

鹽酥雞 $48

排隊時見人食得津津有味，不執輸亦來一客。雞肉大大件厚切，肉質嫩滑，脆口惹味，惟胡椒粉重手了少許，略帶辛辣。

沒期望的情況下來到，覺得各方面也做得挺到位，招牌牛肉麵尤其出色，可以一戰，不過以此格局如免加一更合適。

《段純貞牛肉麵》

地址：荃灣楊屋道8號如心廣場1期1樓105-107號舖

電話：2662 0065