〖自家煮意〗－偽Pizza Hut千島海鮮薄餅

二零二零年五月二十日

之前疫情日日夜夜食屋企飯都有啲悶，見得閒就試下整pizza。媽好鐘意食Pizza Hut個千島海鮮批，投其所好，整個老翻。唔係第一次整pizza，上網搵"thin crust pizza dough"出到好多result，份量做法大同小異，今次跟咗個我幾鍾意嘅youtuber試整。

食譜參考：成波之路

批底材料：
高筋粉 70g
鹽 1茶匙
糖 1茶匙
酵母 1茶匙
水 50ml
油 1湯匙

餡料：
中蝦 5隻
魷魚 適量
蟹柳 2條
洋蔥 1/8個
芝士 適量
千島醬 1湯匙

做法：
1. 高筋粉篤三個窿，分別倒入鹽、糖、酵母
2. 先將糖和酵母拌勻，再將鹽和粉拌勻，然後全部拌勻
3. 混合物中間做一個如火山的大窿，倒水，由內而外慢慢將水和材料混合
4. 成團後轉用手搓，約搓五分鐘至所有粉被吸收，麵團會有少少黏手
5. 拿起麵團，在碗內倒入油，用麵團把油在碗中塗抹開
6. 麵團放回碗中，翻動至麵團表面都沾上油，蓋上濕布或保鮮紙，發酵一小時至兩倍大
7. 蝦、魷魚炒熟以鹽黑椒調味，蟹柳切粒，洋蔥切絲
8. 取出麵團，放在牛油紙上壓平整型
9. 依次序舖上千島醬、蝦、魷魚、蟹柳、洋蔥、芝士
10. 入爐180度焗10分鐘，200度焗油分鐘至金黃即成

Sharing tips
- 以上份量做到一個八至九吋薄批，兩個人食加個沙律剛好
- 唔想煩可以買急凍海鮮雜錦，加鹽烚熟索乾水就可以用
- 唔想特登買千島醬可以用意粉醬甚至係茄汁做底，鍾意落咩就落咩啦，最緊要唔好太多水份，避免影響批質感
- 依家睇返上次個外型先知原來咁肉酸哈哈哈哈

〖自家煮意〗－早午晚都啱食！香滑牛油果醬

二零二零年四月十四日

本身鐘意食nachos，喺出面成日都得嗰少少牛油果醬，就算加錢都係唔夠過癮，一於自己整食返夠本。

我諗大家整Guacamole最困擾嘅係點先買到個靚嘅牛油果，我一般會買返屋企留熟，見佢外皮轉左深色，輕輕按落去感覺到淋就ok。試過好多次心急開咗硬到不能搗爛，有時又唔記得咗佢存在最後熟到變啡黑；食牛油果都係要講緣份的，伏過之後你就會學懂。

材料：
牛油果 2個
鹽 少許
黑椒 少許
檸檬汁 1茶匙
橄欖油 1茶匙
蒜蓉 少少少少

做法：
1. 牛油果切皮去核，用叉搗爛
2. 加入調味料攪拌均勻

牛油果醬用途甚廣：搽麵包加隻蛋做早餐，搽法包加芝士放入焗爐做下午茶，Happy Hour點粟米片，晚餐放落個wrap入面等等；另外蒜蓉係精粹，只要好少吊起個味就夠，好食好多㗎！

〖自家煮意〗－百搭黑醋蕃茄沙律

二零二零年四月十四日

近年鐘意請朋友返屋企食飯，唔使限時可以無後顧之憂地暢談/暢飲，咪話唔爽。叫得朋友嚟就梗係唔想自己喺廚房一頭燒，我多數提早整定依味，齋食得，配粟米片得，做前菜得，做配菜亦得，唔少朋友試過都表示清新開胃，每次整都清碟收場！(都有可能係份量太少，一人一啖之後根本唔想再食但都無曬XD)

材料：
車厘茄 15粒
鹽 少許
黑椒 少許
香草 少許
黑醋 1湯匙
蜜糖 1湯匙
橄欖油 1湯匙
蒜蓉 少少少少

做法：
1. 車厘茄洗淨切粒
2. 混入所有調味，醃漬一小時享用

真係簡單方便又好食，仲可以隨個人喜好加洋蔥青瓜做Salsa，邊調味邊試，多除少補，搵啱你最鐘意嘅味道;)

〖自家煮意〗－細緻綿密！人氣Burnt Cheese Cake自己做

二零二零年二月二十九日

美心曾經是我最喜愛的集團，喜歡它形象多變，喜歡它與時俱進，不過自去年某老人說已放棄了香港整代年輕人之後只覺嘔心，再沒光顧。

老爸生日，決定連蛋糕也自己做，找來最火熱又極容易的Basque cheese cake。早上做好晚上作飯後甜品，質感細緻綿密，帶淡淡的焦糖香，好驚喜！一屋五人都讚不絕口，吃完又添，我也忍不住沾沾自喜。

材料：
忌廉芝士 226g
雞蛋 2隻
糖 40g
牛奶 180ml
低筋麵粉 10g

做法：
1. 六吋蛋糕模上舖上牛油紙
2. 忌廉芝士室溫回軟，打發至鬆軟
3. 糖分三次加入，攪拌均勻
4. 蛋分兩次加入，攪拌均勻
5. 倒入牛奶後加低筋麵粉，攪拌後過篩入模具
6. 入爐前稍微震動幾下，200度焗30分鐘，放涼後放入雪櫃8小時，ENJOY!

Tips：
- 不想吃到感覺致癌、近黑色的食物，後段自行微調焗爐溫度至180度
- 這是用牛奶製作的輕怡版本，落鮮忌廉更香濃(和肥)

〖自家煮意〗－極豐盛！白汁焗海鮮飯

二零二零年二月二十九日

因受疫症影響，不少計劃都未能如期進行。在家中吃飯的時間多了，要搞搞新意思才不那沉悶，剛好前一晚煮得太多飯，盛起隔天做焗飯最好不過。

焗飯技巧不高，不外乎炒飯、將所有餸菜煮熟調味、煮汁入爐，花的是時間和心思。家人好喜歡這道焗飯，偶爾煮一次大家也吃得很滋味。

材料：
三文魚 2件
大蝦 6隻
墨魚膠 1盒
洋蔥 1個
蛋 4隻
隔夜飯 2-3嘜
白汁意粉醬
芝士碎

做法
1. 煎三文魚、蝦及墨魚膠，用鹽、胡椒調味備用

2. 打發雞蛋，熱鑊下油，倒入一半份量蛋漿轉細火，推開雞蛋

3. 加入隔夜飯，炒鬆後倒入餘下雞蛋，下鹽後盛起

4. 熱鑊下油，炒洋蔥至軟身及傳出香味，加入意粉醬及水，煮至個人喜愛的濃稠度
5. 炒飯上平均地舖上三文魚、大蝦、蟹棒及墨魚餅，再加入洋蔥醬汁

6. 灑上海量芝士，200度焗10分鐘至芝士融化至金黃即成

〖自家煮意〗－簡易美味！豐盛甜甜日式壽喜燒

二零一八年九月十五日

自從出左個post講我煮左餐飯俾140個人食之後，四方八面嘅朋友都好俾面咁話想試下我手勢，真係令我受寵若驚哈哈！相信煮唔煮都係其次，開心係可以見返大家，感覺好有愛。

依兩個月幾乎隔個星期就有一場聚會，我已江郎才盡，嚟嚟去去都係嗰幾味煮到有啲悶，又唔好意思要大家次次都係食Ribs/Nachos/Lasagna，姑且試下未整過嘅日韓主題，第一次未盡如意，多謝大家包涵<3

材料：
牛肉 1盒
紹菜 1/2 棵
芋絲 1盒
豆腐 1盒
雜菇 隨意
丸子 隨意
雞蛋 1隻

調味料：
鰹魚汁 1碗
日本豉油 適量

做法：
1. 所有材料略洗，紹菜、豆腐切成方塊

2. 滾起約600毫升水，倒入調味料

3. 先加紹菜煮至淋身，除牛肉外舖上其餘材料，加蓋煮五分鐘

4. 加入牛肉煮1分鐘，中間打入雞蛋，熄火，加蓋焗五分鐘，完成

＊鰹魚汁可以用醬油味醂糖自行調配，我貪現成方便，平時用嚟煮烏冬都得
＊食材百搭，唔一定要放以上配料，加加減減悉隨尊變
＊作狀人們如我見有時間就幫啲冬菇劃下花，成個感覺即刻提昇曬哈哈
＊個湯底調味要重手啲，或者可以最後喺啲肉面頭倒少少豉油同黑椒，更惹味

〖自家煮意〗－就係咁，我煮左餐飯俾140個人食！

二零一八年八月四日

阿爸不嬲主意多多，六十幾歲人都仲勁有魄力！先係玩左好幾年嘅「短暫回憶農場」，然後上年無端端話覺得同事成日要日曬雨淋搵飯食好淒涼，想整個飯堂等大家有啖安落茶飯。見佢興致勃勃，當然支持！

喺十劃都未有一撇之時：
爸：妹，我個飯堂整好之後你要唔要煮返餐俾啲工人食？
我：Er 好呀！整好再講啦(心諗你個女我何德何能哈哈哈)

明明個零月前先話開始動工，嘜一眨眼就已經開張投入服務。
爸：你幾時嚟參觀下我個飯堂？諗住煮咩嘢呀？
我：⋯⋯

其實一直我都以為阿爸叫我煮餐飯係隨口講下，佢不嬲都無尼認真唔知邊句真邊句假，直至某個晚上......
爸：我同左啲工人講話你會煮餐飯俾佢哋食喇！佢哋好開心，話嗰朝唔食早餐留肚喎！
我：下咁搞笑XD 但係我諗我煮唔到百幾人喎，可唔可以煮少少然後先到先得？
爸：唔得～ 我驚啲人會打交爭食

好啦今次都係逃唔過命運嘅安排，洗濕左個頭，唯有開始諗究竟整咩好，要唔太複雜、準備工夫唔太多，好味之餘仲要睇住個budget，喺ban左好多唔同嘅ideas之後，終於俾我諗到！係你喇！咖！哩！雞！

所謂打鐵趁熱，喺飯堂開張後第一個禮拜六，我晨早就返去曬佢冷！

前一晚叫阿爸幫我買好雞全翼同薯仔，去到見到師傅已將四十斤薯仔同二十斤菜洗好切好刨好皮，我就負責洗同醃雞翼，失策嘅係我途手按摩啲雞翼搞左大半個鐘，點知醃埋自己隻手，成個下晝都痕到爆呀陰公！

咖哩薯仔雞翼>>
薯仔走油、落油爆香薑片同咖哩粉、倒曬啲雞翼入去、加水炆一陣、放埋薯仔兜幾兜、調味熄火倒椰汁，搞掂～

啲工人覺得好唔好食我就唔知啦:P（有唔少人拎嘅時候都一臉疑惑，後尾先知原來佢哋無食過咖哩）我自己覺得Ok 同埋最最最重要係阿爸笑到見牙唔見眼，佢開心就一切都值得<3
講到咁大，其實煮依餐飯比想像中輕鬆同容易，因為我根本唔夠力用個人咁高嘅鏟去整，好多時都係靠師傳幫我我得把口㗎咋哈哈哈！多謝大家捧場支持！有緣再會！

〖自家煮意〗－雞肉墨西哥捲餅輕鬆做

二零一六年三月十三日

每天放工都會經過馬莎食品部，由當初常常抵不住內進買東西，到現在直行直過百毒不侵，花了不少銀彈才走到這一步；早兩天經過見到今期以異國菜做推廣，再次抵不住誘惑逛了十分鐘，好忍手的只買了包捲餅皮回家，週末打鐵趁熱來個墨西哥風味晚餐！

餡料材料：
雞肉 1盒
黃椒 1/2個
洋蔥 1/2個
蕃茄 1個
Fajita Seasoning 1包

莎莎材料：
蕃茄 2個
洋蔥 1/4個
溫室青瓜 1/2條
鹽
黑胡椒
橄欖油
青檸/檸檬汁
蕃芫荽 Parsley 1撮 (可省略)

做法：
1. 雞肉、洋蔥、蕃茄、黃椒切粒

2. 燒熱油鑊，爆香洋蔥至微黃傳出香味

3. 倒入雞塊，煎至邊金黃後加Fajita Seasonings及半杯水

4. 兜兩兜後加入蕃茄和黃椒，蓋上蓋煮五分鐘至雞肉全熟收汁，不夠味的話可加些鹽、黑椒和糖，盛起上碟

 

5. 將所有莎莎材料混合，試味
6. 根據包裝指示焗熱Tortilla，組合以上即成
 
＊Fajita Seasoning購自Taste，$9.5；Soft tortilla購自馬莎，$32/8pcs

＊想再豐富一點可預備芝士、Sour cream/ Plain yoghurt、生菜等，我們就再自家製了些Cole slaw，個人認為是整頓的亮點
＊超級快捷又簡便的晚餐，餅皮煙韌有麥香，而在桌上自己動手捲特別好玩好味，整體吃得大家好滿意，已默默盤算下次用什麼作餡料嘩哈哈

 

〖自家煮意〗－Perfect Party Food：越式豬肉米紙卷

二零一六年一月十七日

在越南當地買了不少調味料回來，向來三分鐘熱度的我不得不鞭策自己要好好運用那些材料(感受到我有少少後悔嗎?)。是日邀請朋友上來我家作客，除了某幾樣得意之作外，也可以做些平日較少機會做的餸菜，最後決定將在越南所學的帶回來，來一個米紙卷變奏版。

材料：
豬肉 6片
甘筍 1/2條
溫室青瓜 1條
米紙 6塊

醃料：
黃薑粉 1茶匙
咖哩粉 1茶匙
黑椒 少許
魚露 少許

沾醬：
魚露 1湯匙
水 2湯匙
糖 少許
蒜蓉 1小瓣
指天椒 1/2條

做法：
1. 豬肉解凍，加入所有醃料醃三十分鐘

2. 燒熱油鑊，下油將豬肉煎熟備用

3. 青瓜、甘筍刨絲，倒一淺盤溫水，浸一片米紙入內兩秒然後把它拯救上來放在平面上

4. 排好甘筍絲和青瓜絲，舖一塊豬肉，卷一下然後左右折入，收口完成

＊一條青瓜刨絲出水後份量縮到只剩下一點點，下次用手切算
＊可提早預備，做好以後蓋上濕布保存
＊整體味道有點鹹，基本上不用蘸醬都夠味，個人認為清新點的口味和米紙卷較搭，例如加入白烚蝦或淨素菜也不錯
＊淺黃色伴在旁的是由越南帶回來的芒果，清甜中帶微酸，可是製作時手忙腳亂的忘了卷進米紙卷內，同吃很配
＊米紙在雜貨店或City Super有售，一包可以用到2046，使用時記得不要浸太久，不然一包餡便會爛