二零一八年十一月七日
十一月去韓國咁啱追趕到紅葉季尾，就入插一日行程去賞楓。Day tour我平時join開KKDay，可以喺網上預訂夠方便，有時仲會有discount code，價錢合理。
有明洞、首爾車站、弘大、東大門四個pick up points，喺車上會派發一個好味版檸檬忌廉bun同一支水，中途有個小休站俾大家舒展下筋骨，全程四個鐘頭左右。
早喺十一點已經到達內藏山附近，不過遊人太多，排隊入內泊車都用左唔少時間，真正落車嗰一刻已經差不多十二點，喺嗰度快快手食埋午飯就出發。
沿路一直行已經好靚，又黃又綠又紅咁，根本喺邊影都只會不斷讚嘆大自然的美。
真正逗留喺山內大約三個鐘左右，本來以為一定夠，點知依到停下嗰度笑下，最後幾乎要跑返去車先無遲到。
總括嚟講依個團安排唔錯，司機手車穩定感覺安全，導遊亦妥貼，個團無話要俾小費，不過覺得人哋跟左成日照顧周到，象徵式俾少少夠飲杯嘢囉。
另外團費本身係包埋一張纜車飛但條隊超級長，排得嚟絕對無時間去其他地方遊覽，印象中有其他平少少無車飛嘅選擇，大家可以比較下。
二零一八年十一月八日
抱住一個購物心情去首爾真係唔會令你失望！同好友朝早去完觀光，夜晚必定要狂行街。話說我仲特登帶左運動衫諗住落gym，但每一日都早出晚歸沖完涼都已經攰到趴喺度，只可以講少年我真係太年輕了哈哈。
韓國襪仔款式多又可愛，著得舒服，基本上經過見到睇啱就買，送禮自用皆宜。
鐘意生活百貨、文具貼紙就推薦Daiso，明洞分店樓高五六層，每一樣都睇到我心心眼，尋寶咁行到人哋關門都唔願走。
喺風雨下托到我哋死加hand carry嘅水果原來唔好食，明明同一抽香印，但唔係粒粒都有嗰種獨特香味，內藏山柿嚡嚡澀澀，喺酒店出面買嗰啲柑叫做唔錯；不過整體韓國水果都係伏。
少不了唔同零食，薯片呀餅呀曲奇呀，食得同事們好開心。
仲有衫褲耳環首飾面膜化妝品等等，梨大弘大比較合意，東大門就似香工，用心睇實有啱，見好友買得開心我又買埋一份，買買買好開心呢！
二零一八年十一月七日
出發前得知友想食人蔘雞，二話不說上網爬文睇下大家有咩推薦，發現大大小小嘅食店可其多，配合行程就試依間喺弘大米芝蓮推薦嘅。
平日夜晚七點半左右嚟到大約等二十分鐘，期間見到唔少旅行團嚟依到食(唔係大團)，初初都有啲擔心會唔會伏，不過一場嚟到，一試無妨。
人蔘土雞湯 14,000Won
雞入面釀入糯米、紅棗、同一條小人蔘，雖然好似煲左好耐但雞肉神奇地都一啲都唔韌，湯底清香唔肥膩，平時唔特別好依味嘅我都密密食，天寒地凍呷一口寧舍滿足。
脆皮炸雞 13,000Won
雖然依度最出名係食人蔘雞，但自己食曬一大碗又好似有啲悶，見佢有其他嘢食就叫嚟試下。大大籃炸雞皮脆肉嫩，肉質結實彈牙，新鮮炸起熱辣辣，無上脆漿食起嚟唔膩，調味得宜，好食，仲惹嚟唔少艷羨目光。
食完個人暖笠笠，戰鬥力滿滿再摶殺過，YEAH！
二零一八年十一月七日
覺得嚟到首爾其中一樣要做嘅嘢就係著韓服扮大長今，網上有好多唔同舖頭嘅review，最後揀左一間開幕大概半年左右嘅日月韓服，貪佢啲衫新淨啲。
小店位於景福宮附近，地方唔算好大但企理，有獨立locker放個人物品。無心水想著咩色可以叫老闆娘俾啲意見，如果十一月嚟建議著件淺色薄長袖打底，有裙擺下半身就唔洗除，唔係咁揚揚下其實幾凍。
著左韓服之後總唔能夠披頭散髮，小店提供基本編髮服務，亦可加3,000/5,000Won幫你整個fancy啲嘅髮型，加埋髮飾成個感覺更完整。
收費方面，我哋加左錢整頭，玩足四個鐘每人先係港紙百幾蚊，好抵！同閏蜜/屋企人嚟行下影啲相留念都值得，如果同另一半嘅話就考慮下佢意願，當日目睹無數眼神死嘅男伴超好笑。
Creatrip參考：http://bit.ly/2JMrapK
二零一八年十一月八日
本來無排到依個行程，但早兩日去睇紅葉嘅導遊強烈推薦嚟依度行下買手信，最後一日無特別地方要去，講到咁吸引無理由唔去見識下。
一出地鐵口已經有一間home plus超級市場，地方大人唔多，Lotte Mart有嘅嘢依度大抵都有，餅乾零食即食麵等，可以一次過採購。
麻浦水產市場規模唔算大，地下係賣海產，可以即買即上二樓煮；行入少少就係賣乾貨嘅地方，買左一pack要焗嘅雞泡魚乾，屋企人同朋友都讚好，幾十塊先係百五蚊左右，抵到爛。仲買左啲調左味嘅魚仔送飯，雙親一樣好鐘意，如果有多隻手所有嘢都想買多啲。
經過乾貨區之後就係賣水果同蔬菜嘅區域，有啲似行得舒服乾落乾淨版嘅街市，但量都係比較大同多，似做批發多啲。
另外市場入面亦有一間似佳寶咁嘅超市，感覺貼地，但就燈光較昏暗購物慾降至零，無點留意價錢。
最後離開時落狗屎，十分鐘左右嘅路程好似一個鐘咁遠，大雨到傻一路行一路笑，好希望有人幫我哋影低嗰一刻有幾狼狽哈哈。總括嚟講地點尚算便利，值得過嚟行下買下手信，有機會仲可以試下啲海鮮添！
地址：首爾特别市麻浦區城山洞 533-1
交通：地鐵世界杯體育場站
二零一八年十一月七日
提起韓國出名嘅連鎖輕食店，Isaac Toast必定榜上有名，賣三文治可以賣到人人趨之若鶩，的確唔簡單！興左咁耐一次都無食過，嚟到佢發源地韓國梗係要朝朝聖。
烤排骨MVP 3,600Won
落單後即叫即製，拎上手熱辣辣。麵包帶金黃色，牛油香滿滿，加工肉唔過鹹，中間塊蛋煎得嫩仲夾有粟米，加埋椰菜絲同秘製甜醬汁，啖啖餸好豐富，食完感覺大滿足。
整體嚟講的確可以一試，不過我本身唔係好鐘意食汁醬，食到中段有啲膩，如果可以少汁更合意。景福宮附近依間分店設有堂食坐位，食完就出發去扮大長今喇哈哈哈！
二零一八年十一月四日
同好友由中一識到依家，見證住大家人生高低起跌，好多開心傷心嘅畫面都有佢喺身邊。講左幾年終於可以一齊去旅行，真係未出發先興奮！！第一次去韓國，去到酒店check-in完已經下晝三點，饑腸轆轆，拿拿淋去附近市場醫肚。
孔德市場最出名嘅食煎餅/豬腳，喺入面求其搵咗一間鋪頭試吓，幾個阿豬媽非常熱情，拉左我去佢帶放豬腳嘅地方，死都要捉住我隻手、隔住一層膠掂下啲暖暖哋嘅豬腳，感覺有啲唔衛生又幾好笑XD 兩個人食得唔多就要一份細嘅試吓。
韓式豬腳 27,000Won (~HK$190)
豬腳一上枱嚇我哋一跳，份量三四個人食都有餘，除豬腳外仲會有一份湯、一份豬雜、小菜數碟同生菜配埋。豬腳帶滷水香，感覺唔肥膩，就咁齋食得，點麵豉醬夾住生菜食又得，再呷啖湯食啲米血糕，本來唔特別好豬腳嘅我都覺得唔錯。
食到飽飽，能量滿滿出發去觀光咯！
地址：首爾市麻浦區孔德洞 256-10
交通：5號或6號線孔德站5號出口，沿右側大路直走700米便能見到孔德市場入口
