【佐敦】《Cafe Revol》-意粉咖啡皆出色

二零二四年十二月十五日

好友提議到佐敦小店吃意粉，大意的沒預先留檯，到達始知已滿；轉戰附近的Cafe，下午一時左右人也不多，正好讓我們有個舒適的空間暢所欲言。

Hojicha Latte

咖啡拉花漂亮，入口順滑，茶味香濃又不過甜。

Cafe Revol Breakfast

炒蛋、酸種多士、蕃茄、煙三文魚、鮮果乳酪，美味簡單的早午餐組合。

虎蝦青口魷魚圈．風乾花枝茄醬意粉

8週年期間限定推出的意粉，一食好有驚喜，濃郁的海鮮味衝擊著味蕾，超級惹味！

吃飽後散步到朗豪坊，沿途一直聊有夠過癮，要順利喔<3

《Cafe Revol》

地址：佐敦德成街4-16號富裕臺地下5號舖

【尖沙咀】《Puff Bake》-酥脆奶滑酸種蛋撻

二零二四年十二月十七日

早前在網上看過一段全港蛋撻大比拼的片段後，勾起我對吃蛋撻的慾望；當中嫂推薦我的蛋撻店也受推崇，必須一試。

興致勃勃出到尖沙咀，原來要吃到這蛋撻也非易事，有時候未出爐，有時太晚已售罄，前後來了三次才成功購入。

原味酸種蛋撻 $16

千層酥皮看上去有點過火，但吃下超級脆，牛油香之餘沒有絲毫苦味，中間餡料奶滑，有蛋香忌廉香，出色！

開心果醬酸種蛋撻 $30

撻皮同樣酥脆，內餡開心果醬味突出，不過個人認為和蛋撻不算合拍，沒有令其加分，考慮上價錢會寧願吃兩個原味XD

《Puff Bake》

地址：尖沙咀堪富利士道3號地舖

【長沙灣】《Lungo》-清新素食貝果

二零二二年二月四日

年初四相約好友上獅子山，寓意來年步步高陞，迎來好運。由樂富起步，輕輕鬆鬆經畢架山落長沙灣。抵達時已近三點；本屬意另一間咖啡店，但被人龍嚇怕，轉場到一直都想試嘅Lungo，人少少唔使排，自覺幸運。

小店樓底高，木系裝潢令人感覺溫暖。

Flat White $39

拉花勻稱，好香濃，喜歡。

Avocado and guacamole bagel $58

Bagel上檯時已切開兩份，牛油果醬與牛油果份量剛好，幼滑之餘帶少許辣勁，最神奇係即使啲菜塞到滿滿都唔會跌到四圍係，食落清新無負擔，討喜。

在此寄語好友：新一年要堅信自己，你值得擁有。

《Lungo》

地址：長沙灣福華街571號曉悅地下2號舖

電話：2697 8028

【深水埗】《順流精品咖啡》-Go with the flow

二零二一年十一月九日

近年深水埗悄悄地蛻變，大大小小唔同Coffee Shops/Cafes進駐，書店、手作、藝術、慢活等等，似乎成為咗一處文青小天地。是日約咗好友去深水埗食輕食catch up一下，隨便喺網上揀咗一間小店，樓高兩層，人少少坐得舒服自在。

Hojicha Latte $45

咖啡拉花精美，茶味香濃之餘不苦澀，上品。

牛油果炒蛋手工貝果 $68

作為bagel愛好者，見有得叫亦不作他選；bagel用上油浸蕃茄口味，帶韌勁，菜單上係話配上檸檬忌廉芝士，我用心地細嚐都唔係好覺；而牛油果同炒蛋則正常發揮，係唔會錯嘅組合，食得滿足。

喜歡小店嘅名字，有時計劃總趕不上變化，祝大家一切順心。

《順流精品咖啡》

地址：深水埗黃竹街2C號地舖

電話：從缺

【深水埗】《Will's Coffee》-香甜幸福之芋泥西多

二零二一年十一月二十三日

同好友都係愛芋頭之人，早前喺IG度見到有芋泥西多販售已相約要一齊去試，最近得知佢唔使再被混亂嘅資訊玩到氹氹轉，決定賀一賀佢。

小店大約只能容納三至四人，只做外賣，同好友急不及待，買完行去附近嘅公園一路望住啲細路跑跑跳跳一路食。

Flat White $34 (Set)

撇除其專業機器設備，估唔到店小小都有賣手沖出品，店主應該對咖啡有要求之人。Flat White咖啡香濃，拉花勻稱，喜歡。

韓式泡菜豬肉Bagel $62 (Set $86)

食物到手嘅時候不禁讚嘆咗一下，賣相色彩繽紛鮮豔，非常吸引。Bagel用上Blendit出品，揀口味嘅時候純粹以拍攝角度作考慮，估唔到個包居然真係有紅菜頭獨有嘅青草味，仲要幾突出下，怕者慎選；泡菜豬肉微酸微辣，份量慷慨，惹味又有飽足感，食完好滿足。

手工芋泥西多士 $42

輪到是日重點：西多士！西多士即叫即做，要等大約十分鐘。麵包用煎取代炸，食落的確無咁油膩。芋泥綿滑，保留少少夥粒，味道天然微甜，蘸少少煉奶幸福感倍增！

小店雖然地方細細，但上至裝飾擺設下至餐具手挽袋都見其費盡心思，食物質素加係水準以上，可惜無堂食令人有少許卻步，如果有天可以見證佢搬大舖就好了。

《Will's Coffee》

地址：深水埗大埔道75號威信大廈地下2號舖

電話：5403 9751

【油麻地】《Liberty Coffee & Wine》-大雨下的早午餐

二零二一年六月二十日

落大雨費事四圍去，搵咗附近一間一直想試嘅coffee shop食 brunch，一點左右幸運地唔使等，剛好坐到Bar檯位置，有少少自然光，望住窗外風景進食甚寫意。

Latte

咖啡拉花均稱，綿滑順喉。

英式早餐 $108

食All Day Breakfast就係想要大堆頭嘅豐盛感，依度嘅全部都細細件比較精緻，視覺上未能震撼到我。食材全部NMIC，質素的確唔錯，係牛角包唔算好鬆化，整體食得出有心機做。

鮮茄全素肉醬扁意粉 $88

份量偏少，蕃茄甜甜酸酸，感覺清爽，用上素肉無咁膩，中我口味。

見有唔少人都因無訂座而摸門釘，有興趣到訪可以先留毎位，免得白行一趟。

《Liberty Coffee & Wine》

地址：油麻地窩打老道33號翠園大廈地舖

電話：6608 5231

【大角咀】《Black Sugar Coffee》-商場綠洲：食輕食、嘆咖啡

二零二一年八月

三年前同好友飛韓國，十一月十幾度嘅氣溫底下佢都成日拎個風扇仔出嚟吹。依家炎炎夏日，搵個盡量唔使暴露於室外嘅地方，chill chill地食個lunch。

思前想後諗起早幾年食過嘅Black Coffee Sugar喺奧海城開咗分店，閒日十二點左右嚟到唔使等位，小店樓底高，天然採光， 木色黃燈加半開房式設計令人感覺溫暖。

Pesto Chicken Penne $128

香草醬味香濃，雞胸肉嫩滑，最後凍咗再食都唔覺油膩。

Avocado and Egg Toast $98

蛋炒得滑身，牛油果醬份量慷慨，伴上嘅沙律亦新鮮，感覺健康無負擔。

Homemade Waffle with Ice-cream $88

窩夫炮製時已飄來陣陣烘焙香氣，外觀無太花巧，窩夫係美式質感，微暖狀態下蛋香味突出；而雪糕用上Movenpick，香濃幼滑，不過略嫌楓糖合桃味太甜，有少少膩。

《Black Sugar Coffee》

地址：大角咀海庭道18號奧海城二期地下G16號舖

電話：3162 8229

【油麻地】《嘉多利天然酵母手作麵包店》-超人氣布甸包

二零二一年八月四日

自從得知嘉多利係良心小店後，間唔中都會幫襯支持一下。無論鬆餅、鳳梨酥定迷你麵包系列，全部有水準，食得出師傳嘅用心。是日早早食完晚餐，途經嘉多利見門外依舊有條長長嘅人龍，見距離布甸包開賣時間不遠，就湊湊熱鬧，最後等咗差不多四十分鐘先到手。

法式布甸包 $15

布甸包目測比女仔手心還要大，黃色布甸部份非常滑溜，食到雲呢拿香，仲有丁點酸酸地吊起個味。法包有輕微拉扯感，有麵粉香，鹹鹹甜甜非常滋味。見網上有人分享室溫、雪凍同焗熱三種食法，因為唔知會唔會/幾時再食，我三種都試過，個人最鍾意熱食，外層焗到卜卜脆，入面半流心，係幾有驚喜。

大大件又有質素，先賣$15一個，難怪人龍不絕。

《嘉多利天然酵母手作麵包店》

地址：油麻地碧街54號地舖

電話：29888018

【尖沙咀】《Sensory ZERO》-高檔商場內的清新

二零二一年六月十三日

爸生意上有往來嘅朋友喺尖沙咀短租咗一個地方，趁有時間親身去支持一下。出發前先到附近搵咗間良心小店食午餐，小店喺連卡佛入面，星期日下午一點半大約等咗二十至三十分鐘。

小店地方佔地四四方方，檯排得密但係檯面面積大，加上樓底高，坐落唔會覺得壓逼，頭頂海量烏絲燈增添時尚感。

M5+和牛藜麥沙律 $168

牛肉已預先切開一片片，顏色粉嫩，牛肉肉味香濃，加上油花足，腍身有油香；沙律用上柚子味汁醬，甜甜酸酸的好清新開胃。

慢煮雞胸藜麥沙律 $82

雞胸肉味道清淡，幸而不乾柴，蔬菜沙律底同樣清新，健康味美。

蒲燒三層鰻魚滑蛋飯 $128

適逢禁食澱粉質嘅一個星期，只可遠觀不可褻玩，純粹開心分享一下。

食完門口仲有唔少人等緊，趕快還檯出發去，如果想坐耐啲可能要搵過另一個地方嚕。

《Sensory ZERO》

地址：尖沙咀廣東道3號海港城馬哥孛羅香港酒店G樓連卡佛

電話：2118 6090

【新蒲崗】《合利潮州粉麵》-簡單輕食之選

二零二一年七月三日

近來四處吃喝食得太多，感覺飽飽滯滯，是日上完堂，喺附近隨便食碗粉做晚餐。星期六六點幾去到有三兩個客人，Menu排版一般，花咗少少時間睇，仲一度懷疑自己有閱讀障礙，好彩之後見到一對年輕情侣同樣有疑問，先放心啲哈哈。

魚皮餃米/ 墨丸米 $30

兩碗麵來到顏色偏白，老實講唔算吸引。無期望底下係有啲驚喜：湯底雖然無色但夠味，墨魚丸大大粒，爽口彈牙；魚皮餃唔腥唔肥膩，真材實料。

食完唔口渴，以質素嚟講價錢佛心，簡單輕食之選。

《合利潮州粉麵》

地址：新蒲崗衍慶街19A號

電話：2321 9179

【新蒲崗】《窩子》-三顧茅廬

二零二一年四月二十六日

古有劉備三顧茅廬，今有我三訪窩子，之前曾幾次想去，可惜一係太夜一係公休，與其無緣。是日行完山落到黃大仙，特意走到新蒲崗覓食，雖然人多要等但目標明確，決意一試。

星期六下午到來等咗大約二十分鐘，比想像中快，裝潢帶點懷舊味道，本來坐喺出餐通道有少少擠逼，好彩後來調咗檯，爸爸即刻開心返。

自家製喇沙汁炒扁意粉配虎蝦 $118

喇沙汁椰味同香料味皆香濃，意粉炒得入味，雪藏蝦肉味道一般，食到底有啲油，幸而調味對胃，越食越想食。

慢煮手撕豬腩窩夫三文治 $98

有時喺街都怕食手撕豬，因為多數好嚡，依到嘅手撕豬腩做得軟腍，燒烤醬惹味，底下窩夫亦做得出色，有蛋香之餘又脆口，鹹鹹甜甜，食得過癮。

自家製草莓醬梳乎厘鬆餅 $88

嚟依度其中一個原因係有朋友盛讚其梳乎厘鬆餅，講到咁好味一定要叫一客試下。梳乎厘鬆餅震騰騰，軟綿綿又有蛋香，面頭焦糖脆脆香甜，唔使點佢個果醬已夠美味。

整體不俗，但始終未超越到我心目中最好食嘅梳乎厘鬆餅店，可惜其已結業，回憶中嘅美味最難取替。

《窩子》

地址：新蒲崗仁愛街36號地下

電話：2796 0001