二零一七年十月二十日
Kona Island基本上無咩酒店選擇，一係要住大型連鎖集團嘅渡假村，靚係靚但太貴唔啱我地budget，其餘就算叫得做hotel嗰啲都係喺電影入面見到好舊式嗰種，甩皮甩骨咪話唔嚇人，最後決定住Air BnB，感覺貼地啲又舒適啲。
因為時間太緊逼又要就返個行程，有好多地方已經無房，最後搵到一間望落去都幾雅致嘅，唔諗咁多，扑搥！
由機場揸車過去大約一個鐘，連埋泊車位一千蚊一晚。自己一間獨立屋仔，一推門入去對住飯檯，左邊係床，右邊係廚房同廁所，地方好乾淨，麻雀雖小，五臟俱全。
出發之前應承左好友會煮早餐俾佢食，本人講得出做得到，雖然只係煎雙蛋加多士，但都「脆脆地」食住先。
同其他美國鄉郊地方一樣，大部份舖頭都好早關門，第二晚一樣由我操刀：羅勒醬雞扒配薯菜，加支本地啤，大滿足。
住左兩晚瞓得好好，臨行前host仲送左啲橙同香蕉乾俾我地食，開開心心上路去！
二零一七年十月二十日
一開始睇Kona Island有咩玩就俾依度吸引左，山山水水都係我地鐘意嘅嘢。朝早起身食埋早餐施施然出發，大約十一點幾去到，勁好彩咁啱有位泊車，行落少少就係個lookout point，一望，真係好靚，令人屏息咁靚。
除左喺個觀景台度欣賞，旁邊有條路可以深入山谷，我地行到中段拎隻航拍機出嚟玩，原來要駕馭佢唔係想像中容易，心仔都差啲跳埋出嚟，飛左幾飛好淆底都係等無咁大風先再試。
落去又另外一返景象，谷底一邊係海，望住啲浪拍打埋岸，感覺自己係幾咁渺小。另一邊就係去山谷深處，本來想睇埋個瀑布，但行行下途人同我地講封左就無辦法唯有折返，而(嗰排)有做開運動嘅我行返上山都覺得辛苦，幾乎全段路無間斷45度上斜，行左大半個鐘成功返抵起點！
唔經唔覺玩到三點幾，揸返出town center附近搵嘢食。夏威夷其中一樣名物就係poke，方圓十里內有一間食評唔錯嘅就去試下，不過唔知係我地嘴刁定點，三個味道都只屬一般。
醫飽左個肚見時間尚早，一句：不如去海灘游水就出發！雖然依度四面環海，但唔係每個海灘都適合遊水，有啲好大浪，有啲無設施，最後搵左一個酒店入面的，人少少，水清沙幼，同沖繩感覺好似，游完上嚟仲睇住日落食薯片，人生幾何?！
二零一七年十月八日
小時候生日總是想當一天的主角，會為自己安排一整天的節目、去那兒食大餐、想收到什麼禮物……現在人越大，就把生日看得越小，能和家人好友相聚已覺心滿意足。
周日特意駕車出外午餐嚐新，一行五人本想到旁邊的小酒館，不過開口詢問兩次，木口木面的店員都只是沒作聲的指示要我們分開加背對背地坐，有位無位可不可以等也是一句呀，太奇怪，唯有臨時變陣改到隔壁的西餐廳進餐去。
一推開門立即感受到待遇差別，店員友善的歡迎我們，又幫忙拍檯，店子小小放滿了裝飾品，燈光略為昏暗，有點壓迫感，坐得不算舒適。星期日有午市套餐供應，價錢$108至$168不等，包餐湯/沙律、主菜和咖啡/茶。
是日餐湯/田園沙律/烘法包
餐湯是現打的甘筍湯，足料香甜；沙律清新，做頭盆相對開胃無負擔；令人驚喜的是那伴法包同上的牛油，幼滑油香，老爸不客氣的塗完又添。
吞拿魚南瓜意大利飯 $108
意大利飯用上湯燴成，味道濃香，加上香甜南瓜和芝士，吃得滿足，不過意大利飯始終比傳統米飯有咬口，不喜歡的人就自行避免了。
炸海鱸魚柳配薯仔沙律伴他他汁 $128
鱸魚肉質結實嫩滑，蘸上匹配的他他醬，味道不錯但整體份量偏少，有到喉唔到肺之感。
澳洲西冷牛扒伴燒薯配砵酒汁 $148
本屬意豬扒的我被告知該款已售罄，有點失望。這價錢也不期望太多，牛肉肉質和肉味一般，不過不失。
香蕉拿破崙 +$30
生日嘛，當然要放縱一點，起初還怕香蕉口味會很古怪，吃下倒覺得不錯。與其說是拿破崙，不如稱之為香蕉酥，兩塊薄酥皮中間夾著吉士，面頭的香蕉片略略燒過，香甜味美。
蘋果金寶 +$30
蘋果金寶即點即焗，牛油脆脆只有薄薄一層，配上的吉士醬煉奶味重，整體甜膩，如採雪糕球做出冰火效果會更為出色。
Creme Brulee +$30
輕輕敲碎面頭卜卜脆的焦糖，窩在下層的燉蛋雲呢拿味香濃，質感滑溜，令人幸福。
綜觀整頓某些地方確是令人驚喜，但同時又有不少可以改善的地方，小店要在這黃金地段站穩住腳並不容易，希望下次到來能見到它更上一層樓。大一歲，希望能更有智慧處理任何事，身邊的人平安幸福。
《Haven》
地址：灣仔麥加力歌街17號地下
電話：2891 3710
二零一八年一月二十五日
青衣城擴建，除了有不少新食肆進駐外，舊有的也來一個大執位，以往多以孖公仔出現的元氣和丼丼屋，今次終於分道揚鑣，在一期和二期各據一方。搬上二樓的丼丼屋裝潢如一般簡約光猛，木製餐桌、和暖燈光，感覺親切舒適。
滑蛋雞肉丼 (午市送定食及凍荔枝茶) $65
對於滑蛋嘜嘜總有著莫名的喜愛，這裡的半熟蛋十分滑溜，帶點高湯的香氣，甜甜的非常好下飯，可惜雞肉有雪味，扣了少許分數。
唐揚雞肉溫泉玉子丼 (午市送定食及凍荔枝茶) $65
炸雞外層裹上甜酸味的醬料，感覺沒那麼熱氣，雞肉肉質嫰滑，伴一口沾滿蛋汁的白飯同吃甚為滿足。
燒牛肉溫泉玉子丼 $78
燒牛肉有心機地一片疊一片的堆砌在飯外，中間放入半熟蛋，活像一座火山，外型驚喜討好。飯粒是一貫的彈牙有米香，牛肉份量多，不過連口味偏淡的我也覺調味不足，如能灑上些黑胡椒和鹽巴，味道會更上一層樓。
人均消費一百出頭，沒有什麼比冬天時來一碗熱騰騰的飯來得滿足。
《丼丼屋》
地址：新界青衣青敬路33號青衣城2樓212號舖
電話：3904 1613
二零一八年一月二十日
Maki，意指壽司捲，平日在壽司店大多是當上配角一色。某天在飲食社交媒體見到中環開了家以壽司捲做主打的小店，此類型店舖在美加非常盛行，香港則比較少見，甚有興趣，週末去開附近順道一試。
窄長的小店有大約二十個座位，全部採用高桌椅，椅子寬闊，哈比人如我爬到上去後也覺坐得舒適。這兒自助點餐制，點菜後等待叫號便可，製作需時十分鐘左右，保證即點即做。
#2 Beef-Iyaki $68
(照燒牛肉、青瓜、腐皮、牛油果、飛魚籽、炸蒜、自家醬及鰻魚醬)
菜單上有六款店家推薦，選來帶點韓式風味的牛肉卷，看上色菜繽紛令人胃口大開。牛肉份量慷慨，配上甜甜的照燒汁和清新爽脆的青瓜，口感非常豐富，惟炸蒜味濃又有點苦，不是我杯茶。
自選卷物 $68
(蝦天婦羅、沙律菜、牛油果、玉子、飛魚籽、自家醬及辣味蛋黃醬)
除店家搭配好的選擇以外，顧客還可根據自己的口味做出獨一無二的卷物。上桌時才發現點的兩款實在相似，天婦羅味道比較清淡，加上軟滑的牛油果和玉子，同樣豐富。
連一杯麵豉湯，人均消費七十元左右，做午餐也算飽足，熱愛吃Rolls的我表示滿意，已密謀下次再訪要嚐什麼。
《Chotto Maki》
地址：中環利源西街3號地下
電話：未有提供
二零一七年十月十九日
平時去歐美想知道有咩玩都係用Trip Advisor，動態靜態古靈精怪咩都有，資訊比較全面。第一日去到Kona攞埋車買埋Sim Card都四點幾，全日只有一個行程：觀星。
原先諗住幾點去到都無所謂，我地九點半出車，條路黑媽媽又越過高山又越過谷，揸左個半鐘終於去到，原來佢有個Information Center係開到十點，入面有啲簡介同熱飲俾遊客，我地遲左少少水靜鵝飛。
老老實實，咁大個女都未真正去過觀星，睇到我目瞪口呆！成個天都滿佈閃下閃下嘅星星，仲要唔止一次有流星劃過真係好震撼，嗰種感動係深深打入個心入面。
好彩旅伴有先見之明，拎左好多禦寒衣物上去，又羽絨又被又冷帽，兩個拾荒者(如圖)落車睇下影一影上返車，如是者上上落落幾次之後都係太凍頂唔順走人。回程播住Youtube陪住90後長大嘅playlist返歸，無論E-kids定趙仲茹條友都可以一字不漏跟住唱，好鬼癲，勁呀Hahahah!
二零一七年十月十九日
(突然想記返夏威夷之旅，寫得幾多得幾多！)
對於夏威夷嘅印象，一直只停留喺一堆會噴火跳草裙舞嘅土著身上，其餘嘅認識可以話係零。因為旅伴早已買左機票而我係random join，所以睇都唔洗睇就揀左韓亞航空。香港係無機直飛夏威夷，今次喺仁川轉機，機票連稅四千蚊左右，連埋中間三個鐘transfer，全程大約十五六個鐘。
第一次搭Asiana，可能無期望嘅關係，成個體驗都唔錯！Online check in同bag drop順利、空姐全部都又高又靚，永遠笑咪咪咁好有耐性。最令我驚喜係有韓國嘢食，bibimbap有齊辣醬麻油自己撈，用瓦碗盛上超級有質感，食到一粒飯都無剩:9 仲有生菜燒肉包飯，啲菜葉唔止一種好似好正宗，整體都係有新鮮感同好食嘅！不過唔係每次都有得揀韓國嘢食，啲西餐就極伏，睇下你好唔好彩咯=v=
由仁川去夏威夷時坐我飛長途至愛嘅窗邊位，又好好彩隔離無人，食完嘢一瞓就瞓左七個鐘，如果唔係開曬燈同有班阿豬媽喺度高談闊論我仲可以繼續=v=
無驚無險到左Honolulu，伸展下筋骨、買個Cream Cheese Bagel，Meet up埋朋友繼續長征，轉多程內陸機到我地第一個目的地：Kona Island!
