【油麻地】《越發地道河內料理》－香港少見，正宗地道越南菜

二零二一年一月三日

留意到砵蘭街有一小店，幾乎不論任何時間經過也有一條人龍，是日下午近兩點只有兩個人等位，擇日不如撞日，決定一探究竟。

越南法式三文治 $72

法包烘得香脆，配料味道不算突出，論價錢味道都與我最愛的第一郡有尚一段距離。

地道碳燒豬肉伴越南檬粉 (奧巴馬粉) $76

以沾麵形式呈現，豬肉帶少少肥，滿有炭燒香氣又軟腍；檬粉已塑成一口大小，浸一浸酸甜有蒜香的湯底，好特別亦好好食，有驚喜。

招牌河內牛柳牛丸粉 $95

牛柳新鮮腍身，牛丸彈牙味濃又有肉汁，另外有兩件油炸鬼配上，沾些濃得來清甜的湯底同吃，有趣美味。

回家後略做資料搜集，原來小店屢獲不同雜誌推介，實在有眼不識泰山，失敬！見隔離位個春卷相當吸引，留待下次再試。

《越發地道河內料理》

地址：旺角砵蘭街99號地舖

電話：6884 8898

【旺角】《元洲牛肉麵》－勁豐富！霸氣豪食牛肉麵

二零二一年一月二十二日

閒日行過黃店林立嘅女人街，街上小貓三四隻，多得政苦禁晚市堂食，五點半食晚飯真係第一次。成日忙住處理瑣事未食過嘢，決定點菜單上最貴的兩款試試。

行政總裁牛肉麵 $92

湯底香濃，粗麵有咬口，配料全部大大件又超級多，牛肉鬆化入味，牛筋軟腍，牛舌煎香過，牛丸多汁彈牙，食得滿足。

滿漢全席牛肉麵 $90

湯底同樣香濃，配料有牛筋、牛肉、去骨雞脾，牛筋牛肉評語同上不贅，雞脾原隻上有氣勢，肉質滑溜有雞味，幼麵相對對淋身，整體仍是水準以上。

好多時食一碗拉麵都動輒過百，這兒的極豐富也是九十左右，有時可以轉轉口味支持一下小店吧！

《元洲牛肉麵》

地址：旺角通菜街80號地舖

電話：2806 1717

【荃灣】《RealT》－偶一為之，令人滿足

二零二一年一月二十九日

路德圍茶飲黃店多，相對其他依一間就比較少人講，行開附近一試。小店招牌大大個"R"字，離遠都望到，無多餘裝飾，望落整潔企理。

芋圓芋泥牛奶 $30

疫情關係我拎咗返屋企先飲，牛奶用明治出品，香濃幼滑，芋泥有淡淡芋香，芋圓煙韌略甜，整體質素唔錯，偶一為之好飽好滿足。

啜啜下忽發其想，打開蓋倒出嚟當糖水食應該仲正，有機會試下。

《RealT》

地址：荃灣荃興徑25號安富大廈地下B號舖

電話：2363 0909

【旺角】《Donut's Baba》－抵食良心雪糕店

二零二一年一月二十二日

食完晚餐有少少意猶未盡，醒起附近有間雪糕店，由前年講到依家都未幫襯過，的起心肝去試吓。小店坐落黃金地段，除雪糕外亦有少量精品可供購買。

三球雪糕 $15 (+$6)

波子汽水(+$3)藍色外貌吸睛，雪葩冰感較重，味道神還原；tiramisu(+$3)有少少餅乾，似食咖啡糖，香濃；而豆腐最清新，好味唔會太甜。

雖然有啲特别口味要加錢，但加完都仲係好相宜，非常佛心，值得大家支持。

《Donut's Baba》

地址：旺角西洋菜南街2A號銀城廣場地庫B78號舖

電話：6477 2009

【大角咀】《芋圓一》－大大碗台式糖水

二零二一年一月三十日

行完山想食個甜品，星期六下午四點全場爆滿，一方面戥小店開心，一方面覺得政苦無謂，六點禁堂食唔知扼殺咗幾多小店生存機會。

黑糖薑汁芋圓湯圓 $38

糖水大大碗，一個人要食晒一碗有難度。薑汁香濃唔太甜，有齊蕃薯、紫薯、芋頭，當中以芋頭味最為突出，不過質感略嫌未夠咬口，未係我心中最出色嘅口感。

沿路途經唔少舖頭都關門大吉，希望同路人頂得住，一齊捱過去。

《芋圓一》

地址：大角咀角祥街48號地舖

電話：3618 9974