【新蒲崗】《合利潮州粉麵》-簡單輕食之選

二零二一年七月三日

近來四處吃喝食得太多，感覺飽飽滯滯，是日上完堂，喺附近隨便食碗粉做晚餐。星期六六點幾去到有三兩個客人，Menu排版一般，花咗少少時間睇，仲一度懷疑自己有閱讀障礙，好彩之後見到一對年輕情侣同樣有疑問，先放心啲哈哈。

魚皮餃米/ 墨丸米 $30

兩碗麵來到顏色偏白，老實講唔算吸引。無期望底下係有啲驚喜：湯底雖然無色但夠味，墨魚丸大大粒，爽口彈牙；魚皮餃唔腥唔肥膩，真材實料。

食完唔口渴，以質素嚟講價錢佛心，簡單輕食之選。

《合利潮州粉麵》

地址：新蒲崗衍慶街19A號

電話：2321 9179

【將軍澳】《柴石燒》-香噴噴石燒

二零二一年六月二十七日

難得去到將軍澳，決定去早前告急嘅黃色foodcourt度支持一下，第一次去唔熟路，兜咗一大個圈先搵到。一入去煙霧瀰漫，目測有近半人都係食石燒，被香氣迷惑，唔執輸食埋一份。

紐西蘭肉眼扒定食 $88

基本上一叫完都未行到埋位個傳呼器就已經響，牛扒嚟到嘅時候只係輕輕煎封過表面，有一定厚度，食落軟腍又有肉味，配埋湯、沙律同飯，依個價錢嚟講好抵食。

Food court個抽風設備一般，食完個身會有少少燒烤嘅味道，如果可以改善一下就好了！

《柴石燒》

地址：將軍澳唐俊街18號The Parkside1樓日日・食良

電話：從缺

【銅鑼灣】《Around Wellington》-創意Fusion主食

二零二一年四月十四日

疫情反反覆覆，數數手指同好友幾乎年半無見面，諗落都覺得有啲誇張。有感要同疾病共存先係新常態，襯疫情緩和約下朋友見面。

餐廳閒日晚上入座率有八、九成，建議有興趣都係先訂座。

紅菜頭湯拼沙律 (set)

好友不愛紅菜頭，樂得獨享。紅菜頭湯味道天然清淡，甜甜地帶忌廉香。

芝麻單骨雞翼 $48

雞肉肥美多汁，卜卜脆又熱辣辣，惹味非常。

招牌花雕醉雞配冷稻庭烏冬 $138 (set)

雞脾大隻、皮薄肉嫩，去⻣後啖啖肉，食得過癮；沾汁除咗花雕味外仲有一絲清新嘅話梅香，配上彈牙嘅烏冬，製作用心，幾驚喜。

蟹肉蟹膏忌廉意粉 $198 (set)

意粉煮得彈牙入味，忌廉香濃，蟹肉蟹膏份量多，水準之上。

牛油果朱古力窩夫 $88

特意留肚食甜品，窩夫有蛋香但唔脆口，加牛油果感覺有少少膩唔太夾，只有少量朱古力醬灑在上面，食到兩頭唔到岸咁，未算鍾意。

良久沒見，傾兩三個鐘仍覺意猶未盡，期待再會。

《Around Wellington》

地址：銅鑼灣登龍街28號永光中心21樓

電話：5420 0331

【旺角】《No Money So Lonely》-貧窮是寂寞

二零二一年七月九日

早前經過此餐廳時被門口一大隻老虎頭像圖吸引，裝潢望落有趣，原來係城中以玩味見稱嘅Mamaday創辦人創立嘅另一概念店。

星期五晚上五點半左右嚟到似乎仲係落場時間，喺商場內閒逛一圈六點準時入座。一貫Mamaday嘅作風，NMSL裝飾都好有特色，掛畫、擺設古靈精怪，令人目不暇給。

貧窮是寂寞拼盤(小) $78

拼盤有大有細夠flexible，細嘅可以揀三款小食：炸飯波入面係冬陰功飯，外面炸得脆口唔油膩，好驚喜；腐皮扎肉有少少似食鮮竹卷，香口惹味；秋葵蝦相對肥膩，秋葵炸乾，釀咗少少蝦膠，有心機但一般般。

泰式肉碎豬頸肉Pizza $108

肉碎用上新豬肉肉碎，素食產品但係又有豬頸肉，有點不明所以。Pizza食落超多芝士，蒜頭味道突出，餅底薄身脆口。

酸辣豬肋骨(半份) $116

豬肋骨略略燒過表面，上面淋咗泰式酸辣汁，賣相吸引。滿心期待放入口，面色一沉，嗰陣魚露味真係唔係人人接受到，濃到好似腳味，笑死哈哈。 幸而伴上嘅沙律甜甜酸酸，仲有我至愛嘅紅桑子，可以中和一下。

見網上提及此店主打東南亞fusion菜色，特意揀晒有代表性的，出嚟效果未算令人深刻，或者有機會再試其他。

《No Money So Lonely》

地址：旺角彌敦道700號T.O.P This is Our Place 4樓406-408號舖

電話：5921 2838

【新蒲崗】《窩子》-三顧茅廬

二零二一年四月二十六日

古有劉備三顧茅廬，今有我三訪窩子，之前曾幾次想去，可惜一係太夜一係公休，與其無緣。是日行完山落到黃大仙，特意走到新蒲崗覓食，雖然人多要等但目標明確，決意一試。

星期六下午到來等咗大約二十分鐘，比想像中快，裝潢帶點懷舊味道，本來坐喺出餐通道有少少擠逼，好彩後來調咗檯，爸爸即刻開心返。

自家製喇沙汁炒扁意粉配虎蝦 $118

喇沙汁椰味同香料味皆香濃，意粉炒得入味，雪藏蝦肉味道一般，食到底有啲油，幸而調味對胃，越食越想食。

慢煮手撕豬腩窩夫三文治 $98

有時喺街都怕食手撕豬，因為多數好嚡，依到嘅手撕豬腩做得軟腍，燒烤醬惹味，底下窩夫亦做得出色，有蛋香之餘又脆口，鹹鹹甜甜，食得過癮。

自家製草莓醬梳乎厘鬆餅 $88

嚟依度其中一個原因係有朋友盛讚其梳乎厘鬆餅，講到咁好味一定要叫一客試下。梳乎厘鬆餅震騰騰，軟綿綿又有蛋香，面頭焦糖脆脆香甜，唔使點佢個果醬已夠美味。

整體不俗，但始終未超越到我心目中最好食嘅梳乎厘鬆餅店，可惜其已結業，回憶中嘅美味最難取替。

《窩子》

地址：新蒲崗仁愛街36號地下

電話：2796 0001

【青衣】《Beans The Rambler》-抓緊信念

二零二一年六月二十四日

世界變化之快實在令人始料不及，或者係自己太天真，無諗過失去蘋果依一個會嚟得咁突然。幸運的喺阿布泰遇到報紙返貨，喺最後一個出版日買咗份邊食邊睇。

自從Beans開咗之後成為我同家人食晏首選，喜歡其柔和木系裝潢，採光度十足，令人感覺精神奕奕，不過中午時段多數要等位，要預留少少時間排隊。

黑松露薯條 +$25

薯條新鮮炸起、金黃香脆，落夠鹽，唔點個黑松露沙律醬都好味。

肉醬溫泉蛋長通粉 $62

長通粉份量多、煮得彈牙，汁醬蕃茄味道香濃微酸，放得慷慨，可惜我唔係醬汁愛好者，食到最後剩返碗濃湯咁，好似有少少浪費。

煙燻雞胸紅藜麥意大利飯 $78

面頭煙燻雞胸煎得金黃，加埋少少香草裝飾，望落吸引。意大利飯煮得creamy有奶香，加入紅藜麥自我感覺健康之餘亦更有咬口，另外飯入混入咗雞肉、洋蔥同菇，好豐富好味。

Cheese +$25

餅櫃裡面擺放咗幾款蛋糕，今次試下芝士嗰款，外型夠晒可愛。蛋糕有芝士同檸檬皮嘅清香，唔會過甜，連平日唔多食蛋糕嘅爸爸都分咗一半，不過我都係覺得拿破崙驚艷啲。

黑暗的日子終會過去，在此之前請務必好好照顧自己。

《Beans The Rambler》

地址：青衣城2期2樓222號舖

電話：2690 2222