【青衣】《樂天皇朝》-半價品嚐美味滬菜

二零二四年十一月二十九日

自以為口味西化，但人在外地吃中菜的機會少之又少，偶爾還是會想念家的味道。外出吃飯都盡量選擇亞洲菜或湯麵之類，是日下午在山頂吃了個下午茶，和家人決定享用App半價優惠，九時才吃晚餐。

上海媽媽烤麩 $62

製作烤麩是心機菜，這兒甜甜的有五香味，加上木耳、筍絲和金針，開胃美味。

淮揚春卷 $48/3件

可能時間較晚的關係，春卷在我們吃飽了九成後才送上。新鮮炸起熱辣辣，金黃脆口，不過吃下有點油膩。

招牌小籠包 $78/6粒

雖然這兒的八色小籠包甚有名，但我們還是喜歡原味的樸實；巧手所作的小籠包摺位分明，一口一個，湯汁在口中爆發，好味道。

無錫鮮肉鍋貼 $45/3粒

鍋貼來到樣子白白的，感覺趕收工火力不足地半煎炸而成，幸好肉汁還是滿滿，若皮能做得更脆更好。

紅油抄手 $68/6粒

一客六個的菜肉餃裹上帶有花椒香氣的醬油內，外皮滑溜，菜肉內餡清淡。

菠蘿咕嚕肉 $118

咕嚕肉是我家的最愛，上桌時小小的一碟，如以正價計算有點不划算；肉剛炸起脆身，汁醬酸甜，不過不失。

擔擔麵 $75

湯底濃稠，帶有滿滿的花生和麻醬的香味。

驢打滾 $50

煙韌的糯米糰與黃豆粉微甜搭配，包夾紅豆蓉，吃畢一餐濃油赤醬的食物，最後來一點甜來清一清味蕾。

半價埋單後近四百元，味道不俗，但感覺只是吃了些點心，有折扣優惠時才會再臨。

《樂天皇朝》
地址：青衣青敬路33號青衣城3樓310B號舖 
電話：2177 8777

【荃灣】《ADO 洋食屋》-滑溜無瑕蛋包飯

二零二四年一月十七日

主打日式蛋包飯的店舖不多，小店開業三年左右，早前由大圍搬到荃灣，看樣子活像睇卡通片裡頭會出現的食物，感謝好友陪我一試。

炸雞(四件) $36
新鮮炸起熱辣辣，好入味。

經典牛肉汁蛋包飯 $82 (Set +$25)
切開見著雞蛋緩緩流下的一刻令人興奮！蛋滑溜不膩，茄汁炒飯略嫌乾了一些，配上醬汁同吃更好。

白味噌奶油燉雞腿肉 $86

雞塊有四五件，還有薯仔紅蘿蔔西蘭花做配菜，不知道是否味增也是發酵食品的關係，汁醬吃起來散發著少少blue cheese味，頗有趣。

整體味道不俗，裝修有日系超和風格，有些細節位倒可執整一下，例如飯粒可更軟糯、增添FPS QR code等，有機會也會想試試明太子意粉同布甸🍮

《ADO 洋食屋》
地址：荃灣享成街8號香城大廈地下5A號舖

【山頂】《阿甘蝦餐廳》-屹立不倒的秘密

二零二四年十一月二十九日

人越大，時間好像過得越快，忙這忙那，再次坐下來正正經經記錄著自己的食記已是一年過後的事。身份轉變了，生活環境也不一樣了，執筆時有點生疏，又有點熟悉，還幸這仍是自己喜愛做的事。

另一半是個很有行動力的人，他訂立了目標後無論多辛苦也會盡力完成。是日他難得放假，我們睡到自然醒後往山頂走走，享受一下久違了的二人世界。

一心想著來吃薄餅，怎料門口圍上圍板重新翻新，另外有近三分一的餐廳都在裝修當中，打爛我的如意算盤，那就光顧開業多年的阿甘蝦餐廳嚐嚐看。

阿甘海鮮薈 $208

到達餐廳之時正值下午茶時間，吃些小食就好；點了一盤招牌炸物，有炸蝦、炸魚薯條和海鮮球，每樣數件，吃得過癮。全部炸物皆新鮮熱辣，炸蝦爽口，炸魚滑溜不腥，海鮮球口感彈牙，頗有驚喜。

凱薩沙律 (side) $55

怕炸物吃太多會膩，來一客沙律清新一下；羅馬生菜脆身帶少許甜味，雖然是配菜但也有滿滿的一碟，份量比想像中多。

先待食物期間見隔壁的食客到來慶祝生日，奉上甜品之時全部侍應也會圍著他們唱歌助慶，主角開心之餘又有點尷尬，看起來歡樂好玩，加上無敵的維多利亞港風景，能多年來在山頂也屹立不倒果然有其過人之處。

《阿甘蝦餐廳》

地址：山頂山頂道128號凌霄閣3樓304-305號舖

電話：2849 2867

【銅鑼灣】《ZipZip》-What would you zip in your life?

二零二三年十月二十日

另一半近三個月都忙於兼職，趁星期五一齊出去食飯放鬆下。過開海，是日心情又想食啲fusion西菜，就去前身係Mamaday嘅Zipzip試下。

小店同時代廣場一街之隔，靜中帶旺，有露台位，加上燈飾更顯浪漫。

豆漿加豆腐加豆腐雪糕加芝麻沙冰 $58

依度有唔少特式飲品供選擇，天氣熱決定飲杯沙冰解暑。嚟到無即刻飲，有少少融冰感，撈勻後味道突出好多，豆腐一舊舊有咬口，夾埋芝麻味好似食緊糖水，好味。

非常朱時的黑松露烤雞 $158

入座嘅時候聞到隔離檯飄嚟陣陣香味，跟機叫咗個烤雞。三大件連骨雞髀，望落黑漆漆滿滿黑松露醬，雞皮燒到好脆，肉質嫩滑，有淡淡嘅黑松露香；配上酸甜沙律同大大塊卜卜脆蝦片，食得滿足。

以為食緊片皮鴨比薩 $138

鴨肉份量多又嫩，海鮮醬略鹹，薄身餅底加海量芝士，食兩、三塊都唔悶覺得正。

《ZipZip》

地址：銅鑼灣霎西街28號必發商業大廈1樓

電話：2164 0066

【尖沙咀】《Where Buddha Bar》-又飲又食：高質串燒酒吧

二零二三年八月十九日

葡萄牙文課程暫告一段落，可以休息一個月先上再下一期，星期六終於可以優哉悠哉，落堂之後同另一半出尖沙咀慶祝一番。

Coyo Coghurt $128

天氣熱都係想飲啲Refreshing啲嘅，見其中一款Signature用椰子同乳酪主打，甚有熱帶風情，飲落兩者都突出平衡，酒味淡淡的，酸酸甜甜消暑一流。

Heaven Hana $138

另一半一直對花香味嘅產品有特別喜好，杯外黏上玫瑰花瓣，外觀咁靚嘅真係滿足到佢少女心哈哈。調酒以清酒做基底，加入咗櫻花同薰衣草糖漿，但味道最出嘅都係玫瑰，而荔枝同玫瑰係永恆嘅配搭，甜甜地而入口。

七味魚翅 $88

齋飲有少少寡，嗌咗佐酒小食。魚乾鮮香，蘸少少蛋黃醬，一條接一條食唔停口。

牛舌芯 $68

牛舌一串兩件，食落juicy唔韌，好有牛油香，加埋少少洋蔥吊味，相當合襯。

露筍豬腩卷 $48

豬腩薄薄一層，燒烤將其脂肪逼咗出嚟，露筍多汁無渣，食落唔肥膩。

醬燒豆腐 $48@

聽店員講燒豆腐係其招牌，一食果然有啲料到：豆腐熱辣辣、脆卜卜，外皮炸過再上汁燒，調味得宜，相信花咗唔少心機烹調。

原意係嚟飲杯野，點知食物更令人驚喜，what a pleasant surprise!

《Where Buddha Bar》

地址：尖沙咀河內道3-4號世紀商業大廈4樓

電話：2135 9999

【青衣】《而打淥滷汁拌粉》- 香噴噴台式滷味

二零二三年八月十九日

自而打淥進駐青衣城二期之後，每次經過該舖位都會聞到陣陣滷水香氣，令人口水直流！疫情時幫襯過一次，味道唔錯但價錢略貴，至近來見到佢轉Menu，星期六搵埋另一半一齊試下。

鹽酥雞

鹽酥雞新鮮炸起，一口一粒，卜卜脆有肉汁。

胡麻醬手撕雞撈冷麵 $46

冷麵一大盒份量十足，配料有雞肉、高麗菜同青瓜，除咗一般嘅麻醬味，醬料仲加入咗五香粉，食落清新，香口惹味。

而打淥豬三樣飯 $68 (連飲品)

金牌滷水豬腳好大隻，有滿滿骨膠原，原隻上好睇不過食時有少少狼狽；豬耳爽脆入味；台南肉燥唔會太肥，有少少豬皮口感黏黏地好正，滷汁帶甜好餸飯。

今次二訪覺得幾有驚喜，飯麵價錢唔算貴又大盒，買外賣食又多個選擇了。

《而打淥滷汁拌粉》

地址：青衣城2期1樓181號舖

電話：2866 6620

【荃灣】《老厝邊》- 大大份抵食台灣菜

二零二三年八月四日

自年初開關後，身邊朋友唔係飛歐洲就是日本，連社交媒體都不停推薦我台灣美食，睇到我心癢癢，即使喺香港都要先食餐好嘅止止癮，平衡一下心情。

芋泥起司蛋餅 $42

蛋餅有好多唔同口味，第一次當然要試吓個招牌；芋泥份量多且綿滑，略嫌有少少自己唔太偏好嘅香精味，好在有海量芝士同肉鬆搭救，再點少少醬汁味道更上一層樓！

好呷炸物拼盤 $50

拼盤有齊花枝丸、甜不辣、四季豆同玉米筍，全部炸得香口乾身，加上味粉，惹味好食。

香噴噴炸雞排便當 $70

一嚟到第一個反應係：超！大！碗！除咗雞排外仲有三款伴菜，分別係蒜蓉西蘭花、肉碎茄子、大豆芽，仲有半隻滷水蛋，食一啖都好豐富，肚餓時食非常滿足。

招牌牛三寶麵 $83

牛肉麵有紅燒湯/麻辣湯/拌麵三款選擇，初嚐還原基本步試紅燒口味，三寶為牛𦟌、牛筋同牛肚，全部滷得入味，不過坊間有唔少專注做麵的比其突出，整體不過不失。

價錢唔貴又大份，難怪人龍不絕。

《老厝邊》

地址：荃灣大壩街25號地舖

電話：2332 8885