【佐敦】《阿芳上海餛飩》－家的感覺

二零一八年十一月二十一日

夏日炎炎，往返公司那道路沒遮沒掩，很多時未抵餐廳已汗流浹背，所以一般出外午膳的意欲是零。同事們談起近來嚐到的餃子小店味道不錯，趁著天氣稍涼與他們一試。

醉轉彎(跟餐)
認知中的轉彎是雞翼連翼尖，每次吃都要小心不被割傷；點餐後來到的是兩隻雞翼更合心意，吃下略嫌肉質實了一點，但酒香味濃，以此價錢來說有驚喜。

薺菜豬肉餛飩 (大-六隻) $52
餛飩皮滑，餡料切得非常幼細，菜肉比例大約一比一，整體有肉汁不肥膩，薺菜味不算突出，細嚐下有媽媽的味道。餛飩可配上海麵或年糕，麵條屬粗身，不會太軟稔之餘還有陣陣麵粉香，加上豉油麻油湯底絕對是家的感覺。

午餐連一杯微甜暖豆漿，健康飽肚，可以再戰。

《阿芳上海餛飩》
地址：佐敦白加士街20號永富大廈地舖
電話：2395 8897

【西營盤】《Second Street Comfort Food & Bar》－開懷暢談夜

二零一八年十月十九日

大學時期天天在宿舍玩得天昏地暗，上課的日子寥寥可數，能夠成功畢業也算是一大壯舉。本科內朋友不多，還有聯繫的只剩一個。年多沒見，心裡總是記掛著大家，找個晚上摸著酒杯底談近況。

 

第二次光顧此店，氛圍仍舊輕鬆自在。餐廳設有用餐區和酒吧區，周五晚上六時多來到已高朋滿座，有興趣的朋友還是先訂位比較穩陣。

Meatballs $98
肉丸一客五粒，牛味濃郁、肉質鬆軟，配上蕃茄醬汁酸甜開胃。

Linguini Clams $148
蜆肉新鮮大隻、味道鮮甜，扁意粉煮得彈牙，加上蒜頭和洋蔥，十分惹味。

Pork Ribs $198
豬仔骨肉質較嚡，調味有點過鹹，不算出色；伴在旁的薯角新鮮炸起，香脆甘香，一舊一舊吃了不少。

用eatigo訂位(我的個人推薦碼:eati4upl)，18:30入座所有食物半價，價錢合理。笑笑說說，一眨眼便四小時，離別時依依不捨的說再見，祝願大家一切安好。

《Second Street Comfort F& Bar》
地址：西環西營盤第二街15-19號縉城峰1座地下9號至10號地鋪
電話：25033325

【太子】《寿司匠》－變幻原是永恆

二零一八年十月十二日

在職場上找到一班合得來的同事並不容易，萬幸的是大家為自己謀更好出路的同時還願意維繫得來不易的友誼，是晚約了同時期加入的朋輩吃飯，交流近況。

小店座位數十個，採用了感覺和暖的黃光，牆上擺放了不少清酒作裝飾，坐得舒適。

芒果蟹籽沙律 $48
沙律份量足，爽爽脆脆的十分開胃。

蔥吞拿魚腩蓉小卷 $28/牛油果軟殼蟹卷 $40/吉烈炸蝦卷 $28
大愛卷物的我一口氣點上三款，炸物新鮮炸起，當中以吉烈蝦最得我歡心，全部飯量都較多較飽肚。

牛脷串 $18
牛舌肥美燒得合時，不會柴韌。

汁燒鮮白鱔串 $52
白鱔新鮮肥美，肉質爽彈，可惜外層的醬料過於濃鹹，不然更稱心。

芝士玉子燒 $48
剛上桌的玉子燒能做到拉絲效果，蛋香味充足，帶有日式味淋甜甜的味道，加上芝士和紫菜，十分對辦。

匠炸雞 $38
炸雞外皮稔身，調味不足，是晚最失望的一道。

兩個人瘋狂的點，埋單人均一百八十元左右，飽到上心口，連本來想到附近嚐芋圓的胃納也失去。早年還天真的以為可以在同一地方打拼一輩子，原來變幻才是永恆，也許這只是一個短暫的分岔路，期待能再與你一起共事。

《寿司匠》
地址：太子花園街217號地舖
電話：2777 6688

〖首爾。美食〗人人趨之若鶩Isaac Toast

二零一八年十一月七日

提起韓國出名嘅連鎖輕食店，Isaac Toast必定榜上有名，賣三文治可以賣到人人趨之若鶩，的確唔簡單！興左咁耐一次都無食過，嚟到佢發源地韓國梗係要朝朝聖。

烤排骨MVP 3,600Won
落單後即叫即製，拎上手熱辣辣。麵包帶金黃色，牛油香滿滿，加工肉唔過鹹，中間塊蛋煎得嫩仲夾有粟米，加埋椰菜絲同秘製甜醬汁，啖啖餸好豐富，食完感覺大滿足。

整體嚟講的確可以一試，不過我本身唔係好鐘意食汁醬，食到中段有啲膩，如果可以少汁更合意。景福宮附近依間分店設有堂食坐位，食完就出發去扮大長今喇哈哈哈！

〖首爾。美食〗孔德市場，豬腳一條街！

二零一八年十一月四日

同好友由中一識到依家，見證住大家人生高低起跌，好多開心傷心嘅畫面都有佢喺身邊。講左幾年終於可以一齊去旅行，真係未出發先興奮！！第一次去韓國，去到酒店check-in完已經下晝三點，饑腸轆轆，拿拿淋去附近市場醫肚。

孔德市場最出名嘅食煎餅/豬腳，喺入面求其搵咗一間鋪頭試吓，幾個阿豬媽非常熱情，拉左我去佢帶放豬腳嘅地方，死都要捉住我隻手、隔住一層膠掂下啲暖暖哋嘅豬腳，感覺有啲唔衛生又幾好笑XD 兩個人食得唔多就要一份細嘅試吓。

韓式豬腳 27,000Won (~HK$190)
豬腳一上枱嚇我哋一跳，份量三四個人食都有餘，除豬腳外仲會有一份湯、一份豬雜、小菜數碟同生菜配埋。豬腳帶滷水香，感覺唔肥膩，就咁齋食得，點麵豉醬夾住生菜食又得，再呷啖湯食啲米血糕，本來唔特別好豬腳嘅我都覺得唔錯。

食到飽飽，能量滿滿出發去觀光咯！

地址：首爾市麻浦區孔德洞 256-10
交通：5號或6號線孔德站5號出口，沿右側大路直走700米便能見到孔德市場入口

〖曼谷。美食〗《Baan Phadthai》－裝飾特別味道好，米芝蓮推薦高質金邊粉！

二零一八年九月二十一日

出發前例牌睇下有咩好食，搵搵下見到依間2018年得到米芝蓮推薦為超值餐廳，個樣地道得嚟又decent，鐘意食phadthai嘅我梗係要嚟試下！

小店位於BTS SaphanTaksin站附近，以清新嘅藍色作為主調，加入少少街邊檔風格，雖然無冷氣但有大大把風扇，天氣唔算熱所以體感尚算舒適。

Thai Tea 100B/ Lemongrass & Ginger Tea 100B
泰國飲料一般都比較甜，每次幾乎只能呷一小口，即使冰融左都無咩幫助，有啲食喉糖嘅味道，下次都係叫返水算。

Som Tum Kai Kem 130B
青木瓜沙律口味清怡，蔬菜新鮮爽脆，自家醃製鴨蛋唔過鹹，味道特別得嚟又清新。

Gai Tod 190B
雞翼開邊炸，食起上嚟較方便；雞肉外面卜卜脆，內裡保持嫩滑，醃得入味；其實整體有啲似茶餐廳炸雞，不過港式偏乾柴，惹味得令人忍唔住一件接一件。

Phadthai Gai Yang 190B
雞燒得好香好Juicy，唔覺佢用緊雞胸肉；金邊粉夠鑊氣唔油亦無痴埋一舊，蛋、豆干等配料多，調味得宜，甜甜的超對胃口。

Bua Loy Pueak 120B
依個甜品將我鐘意食嘅嘢集於一身：芋頭、芋圓、鮮椰肉，不過可能期望太高，芋圓軟稔唔夠咬口，而芋頭切得好碎無咩芋頭香，當普通一碗糖水食係ok嘅。

食得超滿足又豐盛，一人港紙一百蚊左右落樓。行開附近推薦大家過嚟試下，食完順便搭船去Asiatique河濱夜市閒逛睇日落，唔錯喎。

《Baan Phadthai》
地址：21-23 Soi Charoen Krung 44, North Sathorn, Bangkok, 10500
營業時間：11:00-22:00

〖曼谷。住宿〗iSanook Residence 乾淨！超值！三星酒店

二零一八年九月十九日

之前幾次去曼谷都係住啲比較好嘅酒店，集團式經營有一定保證，價錢亦唔平。今次同好友兩丁友唔太講究，唔知佢喺邊度搵到依間酒店問我試唔試下，住都係乾淨衛生行先，略略睇過下啲評價好似都可以，無諗太多就訂左。

酒店位於一個local小社區，由機場搭機場快綫到尾站轉MRT，拖住行李費事行，再搭的士過去，全程大概一個鐘頭三個字。

十二點左右抵達，大大個黃色黑色招牌好醒神。雖然無大型酒店嘅冠冕堂皇，但大堂櫃檯都頗為骨子。酒店最高6樓，原本諗住寄住行李先，點知轉個頭話間房就嚟執好，仲upgrade左做studio room，非常驚喜。

拎住匙咭上四樓，一開房門moment of truth: 嘩好大好靚呀！地板用磚有啱啱拖完嘅痕跡，梳化、工作檯、露台、雪櫃、電視、熱水煲、風筒等應有盡有，望落同摸落都好乾淨。

設施方面，有泳池、Gym、會議室等；泳池最深1.2M，旁邊有好多凳俾人曬太陽，唔游水都可以喺池邊放鬆下；而Gym Rm器材唔算多但夠玩，某個早上我踩左二十分鐘Moonwalk機先出去。

酒店由朝早八點開始每個整點都有免費接駁車/Tuktuk去附近MRT/Siam Square/MBK Mall，記得預早訂，額滿即止。

講左咁耐都未交代價錢，可能嚟之前真係毫無期望，住過之後覺得真係抵！到！爆！我哋比入住早兩個月左右訂，連埋所有嘢一晚只係$220，係一間房$220，每人一舊水左右有依個質素配套實在無可挑剔！成個旅程都提住勁開心啊！哈哈！