【愉景灣】《Koh Tomyums》－完美作結

二零二零年十月七日

朝早食完酒店早餐其實仲好飽，不過一場嚟到都係要扮吓去咗泰國、食吓泰菜先圓滿。由酒店行過嚟大約二十分鐘，沿路樹影婆娑、花木成群，清幽又寧靜。

招牌冬陰公 $75

份量適合二人享用，貌似碗細細但配料多，有蝦、魚、魷魚等海鮮，味道鮮甜，酸辣惹味。

炒金邊粉 $82

金邊粉炒得乾身，調味得宜，明明唔餓都食咗兩碗。

芒果糯米飯 $148

訂座時店員建議訂兩份，上碟時砌成心型狀好驚喜。芒果酸甜，糯米飯軟糯不糊，有椰香但略甜，食到最後有點膩。

多謝你一切悉心安排，所付出的心意無價，令人回味無窮。

《Koh Tomyums》

地址：愉景灣D'Deck 1樓105B號舖

電話：2987 0767

【愉景灣】《Coyote Mexican Cantina》－為生日之旅揭開序幕

二零二零年十月六日

疫情關係無得飛，今年生日決定去愉景灣來趟偽旅行。中午先去商場附近食午餐，揀咗食過幾次嘅墨西哥菜，坐戶外增添渡假感。

Smoked salmon & poached egg salad

水波蛋配煙三文魚，感覺似食egg benedict，前菜嚟講算有心機。

Corn tortilla chips with salsa

粟米片應該係自家製，不過可能放耐咗有少少受潮，當做小食尚可。

Chicken Fajita $98

餅皮用特製器皿盛上，好玩過癮；雞肉用鐵板裝載，下面墊咗啲三色椒同洋蔥，配合軟熟餅皮一齊食惹味可口。

Smoked Pulled Pork Enchilada $98

一上檯已經嚇一嚇，真係超大份。一面飯一面豆，中間有滿滿手撕豬肉嘅捲餅，豬肉入味唔嚡，加上面頭嘅芝士、蕃茄莎莎、牛油果同酸忌廉，食落豐富味美。

午餐包一小件蛋糕同餐飲，價錢相宜，食得滿足，下次再幫襯。

《Coyote Mexican Cantina》
地址：愉景灣D'Deck地下G08A號舖
電話：2987 2848

【中環】《Bouchon Bistro Francais》－讓味蕾來趟法式旅行

二零二零年九月二十六日

上年年尾一早計劃今年飛德國參加啤酒節，然後再去法國探親，點知一個肺炎，令無數計劃泡湯，可惜又可恨。未飛得之前以食物慰藉一下心靈，邀請好友一齊扮去旅行。

中午時段來到Soho區，街道比以往寧靜；小店有歐陸風格，揀咗窗邊位可以望到街外人互動，好不寫意。

Baguette (complementary)

法包微暖，有麵粉香，搽少少牛油好好味。

Onion Soup +$18

洋蔥湯面頭有一層厚厚的Emmental芝士，煙煙韌韌，湯底清甜有牛骨香。

1/2 Doz Escargots

法式田螺肉質軟稔有渣，香草醬味淡，難掩田螺草青味，食咗一件就停手。

Beef Tartare $158 (+$48)

揀依間餐廳主要係因為好友喜歡生牛肉他他，牛肉新鮮、份量足，調味得宜，用薄脆盛載住一齊食好滿足。

Moules & Frites $158

青口鮮甜肥美，忌廉汁香濃；幼薯條金黃卜卜脆，同好友一人一兜，食得過癮。

Dessert of the day +$20

是日甜品係朱古力撻，朱古力味醇香濃滑，加上微酸Rasberry點綴，完美作結。

感覺無幾耐之前先同好友喺巴塞飲酒曬太陽，邊個估到2020會係咁渡過！？期待下次係喺真巴黎鐵塔下食法國菜。

《Bouchon Bistro Francais》

地址：中環蘇豪伊利近街49號地下

電話：25259300

【荃灣】《Honbo》－開懷暢聚

二零二零年十月八日

喜歡閒日去南豐紗廠，人少又有特色。好友放假同我食生日飯，今次揀咗曾被評為全球最佳漢堡、亦係香港唯一一間榜上有名嘅小店，好奇係咪真係咁好食。

Cheese Burger $88

麵包似brioche，軟身鬆軟有牛油香，patty煎得香口，肉味略遜。

Fried Chicken Burger $88

相對下炸雞漢堡更有驚喜，雞肉香脆juicy，入味唔肥膩，加上特製蛋黃醬，惹味高質。

Fries (+$25)

薯條金黃香脆，兩人分享一份剛好。

吃畢覺得的確唔錯，但你問我係咪食過最好味嘅burger又唔敢講，畢竟依樣肥仔comfort food好多地方得整得好食。不必執著，在此再次謝過好友，感激一直有你。

《Honbo》

地址：荃灣白田壩街45號南豐紗廠3樓303號舖

電話：2567 8616

【佐敦】《花樣年華》－In the mood for love

二零二零年十一月十二日

自從搬到附近之後每次唔知食嘜都會去逸東，貪佢同路又多選擇。是日心情係想放鬆一下，揀咗food court內唯一屬於逸東旗下嘅酒吧，摸下酒杯底。

香草烤雞野米雜菜沙律 $68

沙律五顏六色好吸引，有齊雞胸雞蛋野米雜菜，營養均衡，汁醬唔多唔少掛上，清新無負擔。

Veggie Nachos $78

雖然係素食，但配料有紅腰豆、粟米、墨西哥辣椒、芝士、蕃茄莎莎、酸忌廉、牛油果醬，份量又多又豐富，用粟米片兜住嚟食好滿足。

抓住歡樂時光的尾巴，飲返幾杯，盡興而歸。

《花樣年華》

電話：佐敦彌敦道380號香港逸東酒店LG樓逸東美食廣場

地址：2710 1898

【新蒲崗】《思想共鳴》－話不投機半句多

二零二零年十一月十三日

行山過後落到黃大仙，附近黃店唔多，決定去新蒲崗支持同路人。離遠已經見門外有大字報，地方細細但坐得尚算舒適，而小店每個月都會轉menu，相信成日食都唔會悶。

熱伯爵茶

無諗過跟餐會用上原包Twinnings，茶香幼滑，驚喜用心。

脆炸雞軟骨 +$16

無諗過加錢嘅小食都咁大份，雞軟骨新鮮炸起，唧少少檸檬汁，惹味好食。

牛肝菌野菌螺絲粉 $42 (下午茶)

唔想食咁多肉嚟個素食選擇，菇菌份量多，螺絲粉彈牙入味。

Carbonara $42 (下午茶)

火腿煙肉鹹香，汁醬有點多，幸好唔算太creamy所以唔會膩，意粉煮得啱啱好，唔錯。

常言道：話不投機半句多，願大家身邊都係同你思想共鳴嘅人。

《思想共鳴》

地址：新蒲崗寧遠街3-23號越秀廣場地下G01號舖

電話：6175 6118

【旺角】《丸十あぶり牧場》－久違的堂食

二零二零年九月十一日

限聚令加晚市禁堂食規例放寬後嘅第一個星期五，商場內四圍都係人，本來想打邊爐，太早拎飛未放工就過咗，四圍行下睇下邊間唔使等就食邊間。

海鮮刺身沙律 $88
三文魚、呑拿魚、油甘魚粒粒份量唔少，感覺新鮮，配上柚子味沙律汁清新開胃。

辣鮪魚米餅 $58
Menu入面張圖係切粒嘅吞拿魚，嚟到係呑拿魚醬，果然圖片只供參考。握成長方形嘅飯糰燒過微暖，面頭吞拿魚少少辣，幾惹味。

鐵板燒日本南部地雞 $88

鐵板吱吱聲飄來陣陣香氣，未食先加一分。雞肉有焦香感，有肉味唔嚡口，唔算好出色但及格有餘。

燒牛舌丼 $118

牛舌薄身軟腍，燒得香口，牛油滲透落飯度好好味。

唔知係咪太耐無出街食飯，心情愉快，食咩都自動加分啦！

《丸十あぶり牧場》

地址：旺角太子道西192號旺角新世紀廣場3樓342D舖

電話：3619 1768

【元朗】《Accro Coffee》－體驗豐富，難怪人龍不絕

二零二零年十月九日

半年前已經嚟過一次，但人太多只好作罷；是日閒日下午兩點幾去到，要等三幾張檯，大約半個鐘先入得。

門外一大幅水泥牆，低調神秘，推開趟門彷彿進入咗另一個世界−右手邊一排到頂櫃放滿唔同咖啡杯同器具，樓底高，配合深啡色嘅檯面，有置身日本嘅感覺。

橙皮朱古力 $38

對於橙味朱古力總係無從抵抗，朱古力味濃香，略甜；偷飲過同伴嘅咖啡真係出色，連平時少飲咖啡嘅我都忍唔住啜多幾啖！

Chicken Breast Panini $50

同一般所認知嘅烘到一坑坑嘅Panini唔同，依度無將麵包夾扁；三文治熱辣辣，千島醬、芝士份量多，加上雞胸肉，簡單好味。

Plan B Waffle (full portion) $90

八字形擺盤花過心思，窩夫外脆內軟有蛋香，配上特濃朱古力雪糕同自家製伯爵茶忌廉，滿足甜牙齒。

坐吧檯闗係可以清晰見到咖啡師手藝，由量度咖啡豆、水量，到控制落水速度、試味，成個過程都好專注認真，睇到我目不暇給！氛圍佳，視覺、嗅覺、味覺都被滿足，難怪人龍不絕。

《Accro Coffee》

地址：元朗安寧路162號金城樓地下D號舖

電話：9430 1433

【荔枝角】《Have a Good Day》－貝果咖啡，輕鬆愉快

二零二零年十一月十九日

某日行經荔枝角，見到商業中心內有間小小咖啡店，差唔多兩點都仲好熱鬧，應該唔錯，幾日後決定同朋友嚟試吓。

是日同樣兩點鬆少少去到，剛好有個四人座位，裝修以淺木色為主，配合白色石紋餐檯，加上富質感餐盤，以開放式小店嚟講算好有誠意。

Mocha

心形拉花對稱，入口唔會太甜，帶濃郁朱古力香，係高級可可嘅味道，甜蜜幸福。

Thai Latte

偷飲咗好友一啖，味道唔錯，本來以為會有啲香料味，但感覺同平時啲咖啡無咩分別。

流心芝士蛋貝果 $40

作為一個貝果愛好者，去到邊有貝果都想試下。貝果大大個，搽咗少少茄汁/Mayo，中間夾咗芝士炒蛋，包體似台式bagel口感，唔算好有韌勁，當三文治食仍然豐富。

椰香冬陰功忌廉汁大蝦意粉 $55

冬陰功汁醬creamy，唔多唔少咁掛喺意粉上，酸辣惹味；大蝦大隻，肉質爽彈鮮甜，無諗過午餐會食到依個質素嘅蝦，驚喜美味，幾十蚊嚟講超水準。

食物用心製作，價錢相宜，如果我喺附近返工都會常幫襯呢！

《Have a Good Day》

地址：荔枝角青山道483A號卓匯中心地舖

電話：9545 7040

【灣仔】《Flagship》－用心西式料理

二零二零年十一月十二日

灣仔船街出名多嘢食，西班牙Tapas、正宗拿玻里薄餅、意大利大扒、本土雞翼等等應有盡有。今次行到街尾嘅小館，門口掛咗啲燈飾，有幾張戶外座位，可以邊飲邊呼吸。

入到去又係另一片天，地方細細，白色牆身放咗啲酒做裝飾，餐具花紋特別，感覺精緻用心。

Daily Soup $78

是日餐湯為蕃茄忌廉湯，新鮮足料，細嚐下仲有啲芝士味點綴，濃郁豐富。

Beet & Feta Salad $128

紅菜頭切到一粒粒容易入口，配合上面嘅Feta同果仁，清新開胃。

Daily Fish Market Papillote $178

魚用上新鮮盲鰽，魚皮上舖咗一層麵包糠同少量芥辣，食起嚟脆卜卜；配菜方面加入韮菜，同條魚又幾夾，中西合壁感覺有趣。

Steak & Egg $198

牛扒肉味濃，腍身，蘸些燒汁食好惹味；燶邊太陽蛋有流心效果，令到牛扒質地更滑溜。

Homemade Lemon Tart $68

面頭忌廉奶香幼滑，lemon curd酸味十足，帶檸檬清香，加埋脆身撻皮，驚喜好味。

整體水準以上，上至醬汁配菜配搭，下至擺盤裝飾都睇得出有放過心機，如果湯/前菜份量多返少少更完美。

《Flagship》

地址：灣仔船街35號地舖

電話：6486 5686