【灣仔】《Flagship》－用心西式料理

二零二零年十一月十二日

灣仔船街出名多嘢食，西班牙Tapas、正宗拿玻里薄餅、意大利大扒、本土雞翼等等應有盡有。今次行到街尾嘅小館，門口掛咗啲燈飾，有幾張戶外座位，可以邊飲邊呼吸。

入到去又係另一片天，地方細細，白色牆身放咗啲酒做裝飾，餐具花紋特別，感覺精緻用心。

Daily Soup $78

是日餐湯為蕃茄忌廉湯，新鮮足料，細嚐下仲有啲芝士味點綴，濃郁豐富。

Beet & Feta Salad $128

紅菜頭切到一粒粒容易入口，配合上面嘅Feta同果仁，清新開胃。

Daily Fish Market Papillote $178

魚用上新鮮盲鰽，魚皮上舖咗一層麵包糠同少量芥辣，食起嚟脆卜卜；配菜方面加入韮菜，同條魚又幾夾，中西合壁感覺有趣。

Steak & Egg $198

牛扒肉味濃，腍身，蘸些燒汁食好惹味；燶邊太陽蛋有流心效果，令到牛扒質地更滑溜。

Homemade Lemon Tart $68

面頭忌廉奶香幼滑，lemon curd酸味十足，帶檸檬清香，加埋脆身撻皮，驚喜好味。

整體水準以上，上至醬汁配菜配搭，下至擺盤裝飾都睇得出有放過心機，如果湯/前菜份量多返少少更完美。

《Flagship》

地址：灣仔船街35號地舖

電話：6486 5686

【荃灣】《古今二》－創意特色卷物和食

二零二零年十一月七日

由細到大都好鍾意食卷物，加洲卷、軟殼蟹卷、三文魚卷等都係檯面常客，炸蝦卷嘅話一家人起碼叫要五、六碟先夠。

是日嚟到千色匯新開嘅創意卷物店，白色加淺木色裝修簡潔，坐位半開放式感覺無咁有壓逼感。除咗卷物外仲有唔少和食供選擇，款式多元化。

日本溫室南瓜沙律 $55

南瓜綿密味濃，加上蛋黃醬，簡單開胃嘅小食。

火山 $88

蟹柳帶子混入沙律醬，面頭輕輕火灸過，堆喺係牛油果蟹柳卷物上，一啖食晒滿足。

網燒牛舌 $48

六塊牛舌軟稔帶牛油香，麻油汁醬惹味。

三文魚頭湯鍋 $88

湯頭頗為鮮甜，魚頭大大個，多肉滑溜，底下墊咗娃娃菜同豆腐，其實以佢價錢嚟講算係抵食，不過鍋太大好空虛，魚頭浮浮沉沉咁，如多放多少少蔬菜/紅蘿蔔加啲顏色，會更吸引。

新張期間晚市有九折優惠，網上訂座更有八五折。整體食物味道唔錯，其實仲有其他卷物想試，不過叫一份都近百好似有啲進取，無折嘅話要考慮:P

《古今二》

地址：荃灣眾安街68號荃灣千色匯1期3樓3013號舖

電話：3480 1384

【荃灣】《滿屋日本料理》－久違了的放題

二零二零年十月二十八日

曾幾何時香港掀起過一陣放題熱潮，吉壽、大喜屋等，無不不需一個月前預約，不過時移勢易加上疫情，依家基本上早一日book位甚至walk in都有得食。

是日嚟到食店林立嘅大鴻輝中心，以往剩係排隊上樓都要十五分鐘，今日幸運地直達食店。除一般劃紙以外，店內仲有其他熟食、海鮮、飲品同甜品等任君選擇，都算多元化。

刺身

刺身質素唔錯，帶子幾鮮甜，油甘魚滲出淡淡油香。個人就唔好希靈魚，不過係朋友至愛。

創作精選

海膽帆立貝個外型麻麻，同幅相差好遠，海膽量少，好彩粒鮮甜嘅帆立貝追返唔少分；海苔帆立貝伴吞拿魚蓉賣相討好，紫菜脆口，不過吞拿魚蓉無乜味，啲味都係俾帆立貝搶晒。

天婦羅

唔算油，不過天婦羅漿偏厚，虎蝦同蕃薯仔都唔錯。

串燒

牛舌惹而不韌，蕃薯仔好甜好味。

炸物

見佢個貓山皇榴槤炸彈話必食就試下，外皮似鹹水角，榴槤味濃郁，偏甜，有啲似榴槤雪糕。吉列蠔幾多汁，不過無乜蠔味。芝麻雞翼出色，皮脆有肉汁，之後再追加兩隻先夠過癮。

年紀漸長唔可以再好似以前咁瘋狂，最後以雪糕作結，有movenpick同haagendaz等揀，滿足。

《滿屋日本料理》

地址：荃灣眾安街55號大鴻輝(荃灣)中心10樓

電話：3622 1388