【大角咀】《Homeland》-打造七彩繽紛的家園

二零二一年五月十四日

星期五多數外出支持小店，是日六點已經到來大角咀，一試由大埔開出市區嘅Homeland。

離遠見到招牌五顏六色，未入門已覺繽紛歡欣。裝修都係以七彩為主，貼上唔少海報同掛畫，黃色燈光添一份溫暖。

八爪魚藜麥沙律 $58

沙律份量比圖中大份，八爪魚軟腍有焦香，底下蔬菜以黑醋調味，酸酸甜甜好開胃。

酥炸雞翼(明太子醬) $68

六隻炸雞翼外層裹滿明太子醬，味道鹹香，雞翼炸得外脆內軟，略嫌醬汁多咗少少。

德國腸拼盤 $98

拼盤有三款香腸：雷筋斯堡腸最多肉汁但較膩，紐輪堡腸結實、香草味濃，芝士豬肉腸彈牙；最驚喜係個薯蓉，有奶香牛油香之餘薯味濃，好出色！

冬蔭功海蝦闊條麵 $128

意粉擺盤甚為精美，香茅、食用花、青檸等好似砌咗個花園出嚟，未食先加一分。冬蔭功香料味道濃郁，意粉雖手造但係食落結實，口感有待加強。

心太軟 $58

食心太軟全期待係嗰個冰火交融感，上桌時見到無雪糕難掩失望。蛋糕唔太熱但亦流心，朱古力味香濃，甜度適中，不過不失。

約七點半臨行時聽到已經無walk-in，有興趣記得先訂座，費事白行一趟。

《Homeland》

地址：大角咀大角咀道55-65號牡丹大廈北座地下9-12號舖

電話：9160 3680