因有要事必須飛歐洲一趟，撞正香港第五波疫情高峰時出發，心裡非常之唔踏實：驚中招驚強檢驚圍封，仲要三日唔埋兩日又有啲「消息傳聞」，一日未起飛一日都未能放下心頭大石。出發前兩星期甚至盡量少外出避見朋友，怕增加染病風險，不過後來發現法國連入境檢測都唔使做，又放鬆少少哈哈。
疫情關係得返好少歐洲航班，一係阿聯酋一係土耳其航空，價錢相若但土耳其係凌晨機比較啱我心水，四千蚊左右就飛到法國。
出發當日預早三個半鐘去到機場，離遠已見滿滿人龍，心裡一沉，本來仲奢望有機會可以自己獨佔一行，網上check in仲篤左個中間位添:o) 排到櫃位多口問一句有無窗口位，哥哥好好人的offer咗emergency exit seat俾我，雖然我只係一個哈比人，但可以伸展下隻腳感覺都非常良好。
第一次搭土耳其航空，飛機感覺較舊，電影唔太吸引，整體機上娛樂一般；食物方面只淺嚐了少許早餐，味道不過不失；另外唔知係咪咁啱得咁橋，serve我嗰幾行嘅空中服務員唔算好friendly，隔住口閘都感受到佢唔想撈嘅氣場XP
十個鐘之後去到伊斯坦堡轉機，個機場好大好靚，五光十色，憑passport登記有半個鐘免費wifi，落機行一行又再上機，三個鐘頭好快過，巴黎我終於來了！
沒有留言:
張貼留言