同幾個朋友都係好酒之徒，咁啱喺Air B&B網頁見到有啲Wine Tour可以參加，幾舊水由朝玩到晚，好似幾過癮，問完大家意見就報名。只需要輸入日期、人數、名就俾錢，之後會收到確認電郵，個host可能會聯絡下你，無亦唔需要擔心，主動同佢傾談下亦可。
當日九點鐘準時去到meet up point，去到先知原來係一間旅行社承辦，我地參加嘅係單車品酒之旅，當日只得我地幾個包團，想幾時停就停又唔使等人，諗返都覺得好幸運。
戴好頭盔拎左單車，導遊首先帶我地去空地度略作練習。因為係電動單車嘅關係，初初踩真係好唔慣，因每大力踩一下都會有被人推嘅感覺，不過踩踩下就覺得幾正，唔使力咁就會向前標，好過癮！
不過估唔到我地最adventurous嘅朋友居然最淆叫苦連天，包底喺後面睇到我一額汗，仲要俾佢呼喝，我覺得自己真係真朋友XD
一路沿住海邊踩，景色優美怡人，唔太曬唔太熱，一眨眼就踩咗兩個鐘頭去到目的地。抵達前我地喺市集度略行一趟，頭一轉A已經自己買左杯啤酒坐喺度嘆緊，最後買咗少少chips、橄欖同蛋糕仔就再出發。
酒莊屬家族經營，近幾年靠後代搞返起，所以產量唔多地方亦唔大，但保養得宜，居高臨下望返落個市鎮好正。
試左兩紅兩白，品酒師教我地試酒時可以觀其色、嗅其味，再分析下個味道，帶花香？果香？Earthy？可以分左大類之後再細味當中不同。
話雖如此，我自己就未至於去到依個境界，況且口味好個人，只覺得四支都係屬於相對易入口款式，加上鄺神逗號logo加持，一場嚟到都買返兩支先走。
個tour仲包一個light lunch，係喺酒莊度picnic，食地道嘅蕃茄包加cheese同ham，自己落手落腳做特別好味，可以食住嘢飲住酒聽住歌望住咁靚嘅景，仲有一班好友喺隔離一齊享受，夫復何求？
最後我地踩返車落車站搭火車返Barcelona，大約四點半完成旅程。總結成個tour輕鬆愉快，比起一般坐車去到目的地有更多involvement同睇到更多，導遊亦會照顧我地需要，搞到我都心思思想自己搞個香港experience XD
沒有留言:
張貼留言