二零二一年五月二日
十幾年前會考後鼓起勇氣去另一間學校繼續學業，幸運地喺嗰度認識咗幾個知心朋友，一路走來，順心的、揪心的都有大家相伴。少時大概無諗過長大後我哋居然會各散東西，歐美紐都將會有大家嘅足跡，每每諗起都戚戚焉。
是日歡送好友，揀咗由蘇豪搬到蘭桂芳嘅何蘭正。新舖比舊時寬敞好多，有好幾幅落地玻璃添上朝氣，被安排至角落四人檯，坐得舒服自在。
黃金脆炸雞 $78
雞肉金黃香脆，醃得入味，保持肉汁又唔油膩，出色！
24小時慢烤伊比利亞叉燒 $178
嚟之前對依味最有期望，不過主角叉燒調味略鹹，肉稔但較肥羶，自己唔太鍾意；底下白飯用豬油撈過，面頭仲有煎蛋同韓國紫菜，好餸飯。
烤三文魚柳 $138
三文魚肉質嫩滑，以楓糖醬油烹調有日式調理感，加埋食落卜卜聲嘅蟹籽甜酸汁，口感好得意；而配上嘅炸本地薯仔亦甘香有薯味，簡單討喜。
焗金文畢芝士 $148
第一次食焗芝士做甜品，Camembert表面淋上薑汁黑糖，甜甜地中和芝士鹹香；而炸蕃薯仔同薑味雪糕一齊食會變到似食中式糖水，成個甜品都好有心思，驚喜好食。
兩點傾到五點，時間飛一般的過去，心入裡帶著萬般不捨道別。在此祝願好友事事順利、開開心心。「約定 未知那遠路裡 同看著時代飛舞」，未來見！
《何蘭正》
地址：中環雲咸街29號東方有色大廈2樓
電話：2342 2224
