二零二一年五月四日
偶爾會喺社交平台上都會見到此店踪影，無論食物定地方都好IG-able。某日居然喺訂座app見到，折扣甚為吸引，即刻訂檯試下。
店家裝潢的確花過唔少心思，經門口先行入一條櫻花隧道，右手邊係一大個bar area，中間一大片主餐區，卡位拱型設計，大抵係限聚關係，檯櫈都排得密密麻麻，比較有壓逼感。
海洋鮮奶 $42
見個名咁夢幻就叫嚟試下，杯嘢粉藍色好有少女心，心型拉花工整漂亮；第一次飲白朱古力奶，係同想像中同一個味道，唔算好喜歡。
泰式青木瓜沙律 $98
沙律配料有青木瓜、花生、蝦米仔，撈埋魚露調成嘅醬汁，鹹鹹甜甜，清新開胃。
芒果蝦肉米紙卷 $88
平時食開嘅米紙卷多數用熟蝦製成，依度用生蝦幾特別。米紙卷包住青瓜、芒果、蝦同少少蔬菜，綠色嘅香辣醬汁係依味嘅靈魂，細細件容易食。
珍珠蠔蛋餅 $88
蠔餅大大份，蛋炸得酥脆甘香，蠔仔份量多，雖有少少油膩但好香口，忍唔住狂食。
冬陰公煙三文魚溫泉蛋貓耳朵 $168
嚟到見到隻蛋係烚蛋咁款呆一呆，切開頂盡只可以叫溏心蛋(流心都唔係！)，令人有期望有落差。好彩貓耳朵粉煙韌，兜住少少冬陰公汁，香濃惹味。
享用訂座優惠每人需要點一杯飲品，整體質素不俗，如果正價就覺得有少少太進取，有機會會再嚟。
《Morokok》
地址：旺角登打士街56號家樂坊8樓801號舖
電話：2363 1882
沒有留言:
張貼留言