二零二一年四月二十五日
同好友食過唔太滿足嘅晚餐之後要下場，沿路經過依間食梳乎厘pancake嘅人氣小店，之前一直想試，見今次門口只有三幾個人等，擇日不如撞日，排隊一試。
星期日晚七點半大約等咗十五分鐘，小店有唔少裝飾同留言，黃色燈光更顯溫暖。
雜莓楓糖吐司盒伴士多啤梨雪糕 $65
自從某店歸類為藍色後都好耐無食過多士盒，依度嘅其貌不揚，但每條多士都好厚且烘得香脆，配蜜糖同雪糕一齊食好夾。
特濃朱古力brownie伴朱古力雪糕 $55
蛋糕四四方方，食得出係用高級嘅朱古力，有少少鬆軟蛋糕感，個人比較鍾意質感實在的，同好友不約而同諗起中學時期家政堂嘅作品，比上不足比下有餘。
士多啤梨厚pancake伴粒粒藍莓醬及士多啤梨雪糕 $70
萬眾期待，梳乎厘pancake嚟到仲係震騰騰，食落軟綿綿有蛋香，唔會一陣風咁，味道有少少似中式雞蛋糕，係近來食過比較合意的(中伏太多XD)，開心。
地方細細關係，每人最低消費一項單品；我哋八點鬆啲食完拿拿臨還檯，點知出到去居然唔使排隊，希望只係咁啱得咁橋啦～
《Aroma Dessert Cafe》
地址：荃灣鱟地坊38-46號祐強樓地下42號舖
電話：從缺
沒有留言:
張貼留言