【深水埗】《順流精品咖啡》-Go with the flow

二零二一年十一月九日

近年深水埗悄悄地蛻變，大大小小唔同Coffee Shops/Cafes進駐，書店、手作、藝術、慢活等等，似乎成為咗一處文青小天地。是日約咗好友去深水埗食輕食catch up一下，隨便喺網上揀咗一間小店，樓高兩層，人少少坐得舒服自在。

Hojicha Latte $45

咖啡拉花精美，茶味香濃之餘不苦澀，上品。

牛油果炒蛋手工貝果 $68

作為bagel愛好者，見有得叫亦不作他選；bagel用上油浸蕃茄口味，帶韌勁，菜單上係話配上檸檬忌廉芝士，我用心地細嚐都唔係好覺；而牛油果同炒蛋則正常發揮，係唔會錯嘅組合，食得滿足。

喜歡小店嘅名字，有時計劃總趕不上變化，祝大家一切順心。

《順流精品咖啡》

地址：深水埗黃竹街2C號地舖

電話：從缺

【油麻地】《麵屋神匠》-鮮味濃厚蝦湯底

二零二一年十二月十日

時時經過碧街與登打士街中間嘅巷弄，多年來都係以潮舖做主打，某日見到裝修咗無耐嘅舖頭將會開一間拉麵店，感覺新奇有趣，擇日一試。

小店地埋位置極便，入到去頭頂掛起好多燈籠，黃色燈光營造溫暖，加上一大幅柴犬壁畫，七彩繽紛好有氣氛。

辛辣蝦湯麵 $88

有四款湯麵供選擇，第一次幫趁試試其辣味湯底。湯底一開始比想像中淡，攪攪個底後鮮味同辣味出返晒嚟；慢煮叉燒軟腍，麵質彈牙，份量十足。

神匠蕃茄蝦湯沾麵 $128

比起湯麵，我更喜歡沾麵嘅香濃。沾麵湯底加入蕃茄，蝦鮮味更突出，配料同樣有筍、蔥、溏心蛋、紫菜同慢煮叉燒，麵質較硬身，掛湯力強。本來覺得個法包配羅勒醬格格不入，但原來個pesto係自己打，唔油膩之餘又有香草香，用嚟點沾麵似西餐，有另一番味道幾驚喜，如果多士烘得更脆更好。

日式唐揚炸雞 $38

一咬開炸雞就有好多肉汁流出，肉質嫩滑，食到薑調味，外脆內軟又唔油，好食。

白桃梳打汽水 $26

對於汽水不太熱衷，淺嚐了伴侶的一口，食完濃味嘢飲返一啖甜甜的，感覺圓滿。

《麵屋神匠》

地址：旺角彌敦道562號地下B號舖

電話：6891 6786

【觀塘】《Coffee Art》-即點即做美味意粉

二零二一年八月八日

星期日早上邀請老爸一齊扒龍船，之後順便去APM辦事，就一齊嚟到東廣場食想試好耐嘅意粉，運動過後好好慰勞一番。

買票後店員會安排入座，三個人大約等咗二十分鐘，環境較擠逼，旁邊人們熙來攘往。

薯條 +$35

薯條炸得金黃香脆，過下口癮。

蕃茄羅勒海鮮意粉 $78

海鮮唔係用急凍雜錦，青口、蝦仁同帶子食落有鮮味，汁醬帶大蒜香，意粉煮得彈牙入味，的確有水準，榮登我是日最愛。

澳洲牛柳粒露筍松子羅勒汁米形意粉 $86

街外比較少見米形粉，羅勒汁調味得宜，唔知係咪方便用湯匙一口過，牛柳同露筍皆切得細細粒。

溫泉蛋日本黑豚肉醬米形意粉 $86

落單時睇漏咗個「醬」字，嚟到係有少少期望落差。肉醬酸酸甜甜，老實講佢係咪用日本黑豚肉真係食唔出，不過味道係唔錯，加上面頭溫泉蛋更濃稠。

價錢包湯/沙律同一杯普通餐飲，有機會再來的話會避開繁忙時間，食得更舒服。

《Coffee Art》

地址：觀塘成業街7號東廣場地下G46-G48舖

電話：5403 7883

【荃灣】《Expresso Alchemy》-清新Coffee shop：鹹食有驚喜

二零二一年十二月一日

唔知大家有無同感，自從COVID之後時間好似飛一般流逝，唔知做咗啲咩又年尾。感覺啱啱先去完百貨公司半年一度大減價，一眨眼又有週年慶。是日同媽媽去八卦有咩優惠前先喺附近醫肚。

經過依間咖啡店不下數十次，今日終於一試。一大片落地玻璃有天然採光，幸運地坐到窗邊位，心情隨之豁然開朗。

伯爵茶鮮奶朱古力 Set+$10

店員小心翼翼奉上，見到個拉花已令人心花怒放。飲落伯爵茶味突出，配上朱古力牛奶頗為特別，順滑香濃。

宇治抺茶鮮奶 Set+$10

見其外表翠綠偷呷媽媽的一口，牛奶厚醇，抺茶味清香。

牛肉雜菌三文治伴沙律配檸檬醋醬 $88

麵包上有格仔坑紋，中間餡料份量澎湃，望落非常吸引。雜菇洋蔥炒肥牛肉夾，有少少日式感覺，頭半份好好味，之後感覺較為肥膩同略鹹，好彩沙律份量俾得極足，用嚟間場最好不過。

香煎虎蝦配露荀辣蕃茄汁意粉 $118

三隻雪藏蝦大隻彈牙，蕃茄味醬汁帶甜，意粉燴得入味又不過軟，偶爾有少少辣勁，整體惹味開胃。

藍莓蛋糕 $30

俾錢之際見到餅櫃有幾條其貌不揚嘅自家製蛋糕，興之所至要咗一件。蛋糕有手掌般大，望落同食落都好乾，目到藍莓但無味，感覺唔太新鮮，唯一可取之處就係甜度適中。

帶住滿滿戰鬥力，出發購物去。

《Expresso Alchemy》

地址：荃灣楊屋道8號如心廣場一期地下G02號舖

電話：2703 7188

【大圍】《E For Egg》-超人氣盒子吐司

二零二一年九月四日

好友新居入伙，探望佢前先醫肚。星期六下晝兩點三去到，無食嘢情況下等咗一個鐘，附近又無商場，大熱天時都幾辛苦。

煙三文魚芝士滑蛋盒子吐司 $65

多士烘得香脆，有牛油香，蛋炒得滑溜，加上不過鹹嘅煙三文魚同蜜糖芥末汁，口感豐富，食得滿足。

香蒜黑松露雜菌拉絲芝士滑蛋盒子吐司 $65

吐司端上之際黑松露味已湧出，菇菌有蒜香，多士同樣高質；另外配上嘅洋蔥圈雖然只得兩件，但炸得香脆，過下口癮。

食物品質的確唔錯又唔算貴，都想一試其招牌甜吐司，有機會再嚟。

《E For Egg》

地址：大圍城河道19-25號城河樓地舖

電話：5347 0262

【深水埗】《Will's Coffee》-香甜幸福之芋泥西多

二零二一年十一月二十三日

同好友都係愛芋頭之人，早前喺IG度見到有芋泥西多販售已相約要一齊去試，最近得知佢唔使再被混亂嘅資訊玩到氹氹轉，決定賀一賀佢。

小店大約只能容納三至四人，只做外賣，同好友急不及待，買完行去附近嘅公園一路望住啲細路跑跑跳跳一路食。

Flat White $34 (Set)

撇除其專業機器設備，估唔到店小小都有賣手沖出品，店主應該對咖啡有要求之人。Flat White咖啡香濃，拉花勻稱，喜歡。

韓式泡菜豬肉Bagel $62 (Set $86)

食物到手嘅時候不禁讚嘆咗一下，賣相色彩繽紛鮮豔，非常吸引。Bagel用上Blendit出品，揀口味嘅時候純粹以拍攝角度作考慮，估唔到個包居然真係有紅菜頭獨有嘅青草味，仲要幾突出下，怕者慎選；泡菜豬肉微酸微辣，份量慷慨，惹味又有飽足感，食完好滿足。

手工芋泥西多士 $42

輪到是日重點：西多士！西多士即叫即做，要等大約十分鐘。麵包用煎取代炸，食落的確無咁油膩。芋泥綿滑，保留少少夥粒，味道天然微甜，蘸少少煉奶幸福感倍增！

小店雖然地方細細，但上至裝飾擺設下至餐具手挽袋都見其費盡心思，食物質素加係水準以上，可惜無堂食令人有少許卻步，如果有天可以見證佢搬大舖就好了。

《Will's Coffee》

地址：深水埗大埔道75號威信大廈地下2號舖

電話：5403 9751

【佐敦】《逸東軒》-嘆米芝連一盅兩件

二零二一年六月三十日

逸東軒曾經係老闆至愛，早年有幸跟過老闆去飲茶，但酒樓位於地庫樓底矮，印象中頗有壓逼感。翻新過後同父母幫襯過，裝潢型格得嚟又保留少少中國特色，檯與檯之間闊落了，坐得舒服。趁著點心做特價再次訂座，品嚐一盅兩件。

海鮮芋角 $38

芋泥滑身，混入少許臘味夠惹味。

京蔥和牛生煎包 $48

內餡比想像中普通，較鬆散油膩，未有留下深刻印象。

春風得意腸 $48

腸粉入面卷春卷，香口之餘相對無咁熱氣。

婆參瑤柱菜苗餃 $48

菜苗餃大大隻，蝦肉又多又彈牙，加上帶甜嘅菜苗，討喜。

金瓜海皇水晶粿 $48

出面少見依個點心，外皮晶瑩，透出橙黃色嘅南瓜，鮮甜吸引。

沙爹金錢肚 $48

牛肚厚身，大件入味。

蠔皇叉燒包 $38

叉燒唔會碎濕濕，包如棉花般鬆軟，未食過依個口感，幾得意。

逸東小籠包 $48

最後加嘅小籠包肉汁豐盈，熱辣辣放入口好滿足。

茶芥$28@，食到捧住個肚走。留意返午市分兩輪入座時間，如果想坐下慢慢嘆就未必啱你。

《逸東軒》

地址：佐敦彌敦道380號香港逸東酒店B2樓層

電話：2710 1093

【新蒲崗】《Wanna Eat》-出色拔絲咕嚕肉

二零二一年七月四日

又到一星期一次嘅學外語時間，上次想試但無訂位與其無緣，今次醒目一早經OpenRice訂座，晚上七時準時到達，店員帶領我們至店盡頭，有一陣陣難聞嘅氣味，唔太舒適。

拔絲咕嚕肉(定食) 配麻辣雲耳、蓮藕 $92

經拔絲處理嘅咕嚕肉外層卜卜脆，豬肉半肥瘦有肉汁，甜甜酸酸的討喜。

想食。柚子雞(定食) 配麻辣雲耳、蓮藕 $88

柚子汁酸甜開胃，雞扒份量足，味道唔錯但無驚喜。配菜雲耳同蓮藕調味帶麻香，幾惹味。

焦糖香蕉配朱古力雪糕窩夫 $68

唔知有無機會再食，決定試埋甜品。窩夫即點即做，疊得高高的賣相吸引。滿心期待地切一件入口，脆係脆但味道好油，似塗過多油喺模具上面嗰種感覺，好彩焦糖香蕉香甜，黑糖啫喱Q彈，朱古力味雪糕亦幼滑，扳回唔少分數。

《Wanna Eat》

地址：新蒲崗彩虹道16號地下

電話：9883 3678