〖巴塞隆拿〗-後記：期待再聚，珍重

二零二一年八月三十日

過去兩年發生太多事，大家都無諗過自己嘅人生會行到依一步，如果有人話我知依個只係一個惡夢有多好。

對於好友們離港，之前一直處於唔相信/唔接受狀態，始終覺得我哋仲有好多時間，好容易可以見面。然後日子一天天過去，有一日我突然醒覺：啊！原來係真㗎！一個歐洲一個美洲一個大洋洲，唔敢想像可以再次相聚嘅日子係會幾遙遠。

依家終於明白點解啲姐姐咁鍾意喺街度FaceTime，當你無辦法底下真係會唔理旁人目光，隔住個Mon都要把握機會見個面。

趁住好友離港前夕，下決心要將我哋上次旅行嘅遊記寫返出嚟，當係送俾大家嘅一份禮物，人在外地時諗起，懷緬一下都開心。一邊打一邊睇返啲相，回憶返返晒嚟，期待我哋下次紐西蘭之旅。珍重。

〖巴塞隆拿。美食〗《Fabrica Moritz》 - 多元新潮啤酒廠

二零一九年六有二十二日

時間真係飛一聲就過，由Sitges返嚟，話咁快就係我哋喺巴塞一齊食嘅最後晚餐。

揀咗一間釀酒歷史悠久嘅Beer Hall，入到去地方好大，一幅幅石牆加不銹鋼大啤酒桶，有時代交替嘅形象，簡潔富現代感。（啲相嘅顏色好肉酸，大家將就一下。）

啤酒

依度出名飲啤酒就當然要試，叫咗好多杯好多款，由IPA到清爽果香型都有，飲得過癮透心涼。

Onion tempura rings 3,95€

炸洋蔥圈唔太油，用嚟送啤酒一流。

Moules & frites 12,75€

青口細細隻鮮甜。

Poussin a la original 13,75€

上菜時雞係直立於啤酒罐上，望一望後店員會幫我哋分上。老實講咁樣嘅煮法係咪特别好味就唔知，不過肉質係幾嫩滑。

燉牛面脥配薯蓉 17€

牛肉炆得好軟腍，肉味濃，gravy少鹹。

仲有一碟唔係係咩，連係雞定魚定嘜嘢都完全忘記哈哈。

飲飽食醉，返到去最後衝刺，飲埋早兩日去Wine Tasting買嘅白酒（題外話，我哋開酒嘅時候遇上阻滯，搞咗好耐LYS無端端好supportive地話「你已經做得好好㗎喇YU！」，笑到我哋痴線），帶住開心又不捨嘅心情執埋啲嘢踏上歸家嘅路途。

〖巴塞隆拿。美食〗《Pizzeria Ristorante Francesco》 - 意式風情

二零一九年六月二十二日

見時間差唔多又有少少肚餓，行返入Town揀咗間食意大利菜嘅舖頭；坐戶外座位望住路上嘅人熙來攘往，好有渡假感。

Salad/ bread (Complimentary)

估唔到送嘅沙律都咁大碟，有橄欖、甜椒、酸瓜等等，好豐富有heart；無叫到Pizza但送嚟嘅麵包暖暖地，新鮮有質素。

Burrata fresca 15,95 €

不嬲鍾意Burrata，切開見半流心，綿滑有奶香，好食。

Spaghetti bolognese 9,9€

食咗咁多西班牙嘢有啲悶，蕃茄酸酸甜甜，剛好開胃。

Risotto nero con seppioline 13,2€

對於黑漆漆嘅食物有莫名好感，不過墨汁只限喺親愛嘅人面前進食。意大利飯creamy鮮味，中間有好多墨魚粒。

Cheese cake 5,5€

如果香港酒水最賺錢，依度就應該係甜品。味道普普通通，淺嚐一、兩啖。

前後叫左五杯啤酒一杯白酒，埋單73 € 見到啲西人一人一個勁大個嘅Pizza根本食唔晒，掉都掉咗成份，好浪費。

〖巴塞隆拿。美食〗《OHLA Rooftop》 - 俯視巴塞美景喝一杯

二零一九年六月二十日

食完麻麻地嘅晚餐之後，尾二一晚決定要搵間吧坐下輕鬆下（話說成個旅程有邊一刻唔係輕鬆緊XD）！

上網搵咗一間酒店內嘅酒吧，剛好安排到角落梳化位，雖然賣點係Rooftop Bar，但同高樓大廈林立嘅香港比，相信唔少香港人自己屋企都高過佢，係叫做無遮無掩仍是Chill。

夏天歐遊有一個好處，就係日照時間長，食完飯上到嚟都仲見到落日晚霞，成件事浪漫不少。

酒店泳池同樣係頂樓，佢有一半係透明的，我哋研究咗好耐如果有人喺度游水都幾尷尬。

印象中消費相對巴塞其他地方貴，當香港價錢埋單～Enjoy完返Air B&B休息，第二日去隔離市鎮郊遊去。

〖巴塞隆拿。觀光〗-近郊小鎮半日遊：美麗浪漫的Sitges

二零一九年六月二十二日

喺巴塞玩咗幾日，景點都行得七七八八，好友推薦我哋去近郊海邊行下，由巴塞出發都係四十分鐘左右就到，算好方便。

上網一查原來Sitges係有名嘅同志小鎮，西班牙本地人都好喜歡去，同巴塞相比，依度多咗一份慵懶感，望住一大片藍天一大片藍海，心情隨即而舒暢起來。

小鎮唔大，慢慢行大約兩個鐘都可以行完。我哋穿梭喺巷弄內，四圍影下相，基本上每一度都係好好嘅背景，鍾意影相嘅可能成日都唔夠。

停下又坐下，行到個沙灘感覺好似去咗赤柱/離島，水清沙幼，啲人一家大細一齊好溫馨。

玩到差唔多五點搭車返去，覺得有時間留半日過嚟行下都唔錯，家中長老應該都會喜歡。返到嚟先知道原來有個天體沙灘，可惜當初無為意，唔係都想去見識下:P

〖巴塞隆拿。美食〗《Cervecería Catalana》 - 極繁忙！名過於實Tapas店

二零一九年六月二十一日

話說第一日食嗰間餐廳實在令人念念不忘，嚟到佢嘅姐妹店睇下係咪一樣咁正。餐廳喺Trip Advisor上面有好高評分，我哋夜晚六點幾去到已經人山人海要等位，目測咩國籍都有，好受歡迎。

坐低同隔離檯好近，感覺比較逼，環境有少少似麥當勞，而店員都好忙碌無人得閒理我哋。

Ham and chicken croquettes 1,95€@

Frying: squid, cuttlefish, fish... padron 6,80€

"CABREAOS" Egg 6,70€

Grilled Galician clams 12,45€

Grilled razor clams 10,80€

Cod with honey alioli 10,95€

Fried hot green peppers 5,10€

Mixed asparagus and mushrooms 5,90€

唔知係咪太繁忙，所有食物唔夠熱，感覺無嘜heart，食完拿拿臨離開了，無論味道同氛圍都同佢姐妹店差一截，有少少失望呢。