【銅鑼灣】《ZipZip》-What would you zip in your life?

二零二三年十月二十日

另一半近三個月都忙於兼職，趁星期五一齊出去食飯放鬆下。過開海，是日心情又想食啲fusion西菜，就去前身係Mamaday嘅Zipzip試下。

小店同時代廣場一街之隔，靜中帶旺，有露台位，加上燈飾更顯浪漫。

豆漿加豆腐加豆腐雪糕加芝麻沙冰 $58

依度有唔少特式飲品供選擇，天氣熱決定飲杯沙冰解暑。嚟到無即刻飲，有少少融冰感，撈勻後味道突出好多，豆腐一舊舊有咬口，夾埋芝麻味好似食緊糖水，好味。

非常朱時的黑松露烤雞 $158

入座嘅時候聞到隔離檯飄嚟陣陣香味，跟機叫咗個烤雞。三大件連骨雞髀，望落黑漆漆滿滿黑松露醬，雞皮燒到好脆，肉質嫩滑，有淡淡嘅黑松露香；配上酸甜沙律同大大塊卜卜脆蝦片，食得滿足。

以為食緊片皮鴨比薩 $138

鴨肉份量多又嫩，海鮮醬略鹹，薄身餅底加海量芝士，食兩、三塊都唔悶覺得正。

《ZipZip》

地址：銅鑼灣霎西街28號必發商業大廈1樓

電話：2164 0066

【尖沙咀】《Where Buddha Bar》-又飲又食：高質串燒酒吧

二零二三年八月十九日

葡萄牙文課程暫告一段落，可以休息一個月先上再下一期，星期六終於可以優哉悠哉，落堂之後同另一半出尖沙咀慶祝一番。

Coyo Coghurt $128

天氣熱都係想飲啲Refreshing啲嘅，見其中一款Signature用椰子同乳酪主打，甚有熱帶風情，飲落兩者都突出平衡，酒味淡淡的，酸酸甜甜消暑一流。

Heaven Hana $138

另一半一直對花香味嘅產品有特別喜好，杯外黏上玫瑰花瓣，外觀咁靚嘅真係滿足到佢少女心哈哈。調酒以清酒做基底，加入咗櫻花同薰衣草糖漿，但味道最出嘅都係玫瑰，而荔枝同玫瑰係永恆嘅配搭，甜甜地而入口。

七味魚翅 $88

齋飲有少少寡，嗌咗佐酒小食。魚乾鮮香，蘸少少蛋黃醬，一條接一條食唔停口。

牛舌芯 $68

牛舌一串兩件，食落juicy唔韌，好有牛油香，加埋少少洋蔥吊味，相當合襯。

露筍豬腩卷 $48

豬腩薄薄一層，燒烤將其脂肪逼咗出嚟，露筍多汁無渣，食落唔肥膩。

醬燒豆腐 $48@

聽店員講燒豆腐係其招牌，一食果然有啲料到：豆腐熱辣辣、脆卜卜，外皮炸過再上汁燒，調味得宜，相信花咗唔少心機烹調。

原意係嚟飲杯野，點知食物更令人驚喜，what a pleasant surprise!

《Where Buddha Bar》

地址：尖沙咀河內道3-4號世紀商業大廈4樓

電話：2135 9999

【青衣】《而打淥滷汁拌粉》- 香噴噴台式滷味

二零二三年八月十九日

自而打淥進駐青衣城二期之後，每次經過該舖位都會聞到陣陣滷水香氣，令人口水直流！疫情時幫襯過一次，味道唔錯但價錢略貴，至近來見到佢轉Menu，星期六搵埋另一半一齊試下。

鹽酥雞

鹽酥雞新鮮炸起，一口一粒，卜卜脆有肉汁。

胡麻醬手撕雞撈冷麵 $46

冷麵一大盒份量十足，配料有雞肉、高麗菜同青瓜，除咗一般嘅麻醬味，醬料仲加入咗五香粉，食落清新，香口惹味。

而打淥豬三樣飯 $68 (連飲品)

金牌滷水豬腳好大隻，有滿滿骨膠原，原隻上好睇不過食時有少少狼狽；豬耳爽脆入味；台南肉燥唔會太肥，有少少豬皮口感黏黏地好正，滷汁帶甜好餸飯。

今次二訪覺得幾有驚喜，飯麵價錢唔算貴又大盒，買外賣食又多個選擇了。

《而打淥滷汁拌粉》

地址：青衣城2期1樓181號舖

電話：2866 6620

【荃灣】《老厝邊》- 大大份抵食台灣菜

二零二三年八月四日

自年初開關後，身邊朋友唔係飛歐洲就是日本，連社交媒體都不停推薦我台灣美食，睇到我心癢癢，即使喺香港都要先食餐好嘅止止癮，平衡一下心情。

芋泥起司蛋餅 $42

蛋餅有好多唔同口味，第一次當然要試吓個招牌；芋泥份量多且綿滑，略嫌有少少自己唔太偏好嘅香精味，好在有海量芝士同肉鬆搭救，再點少少醬汁味道更上一層樓！

好呷炸物拼盤 $50

拼盤有齊花枝丸、甜不辣、四季豆同玉米筍，全部炸得香口乾身，加上味粉，惹味好食。

香噴噴炸雞排便當 $70

一嚟到第一個反應係：超！大！碗！除咗雞排外仲有三款伴菜，分別係蒜蓉西蘭花、肉碎茄子、大豆芽，仲有半隻滷水蛋，食一啖都好豐富，肚餓時食非常滿足。

招牌牛三寶麵 $83

牛肉麵有紅燒湯/麻辣湯/拌麵三款選擇，初嚐還原基本步試紅燒口味，三寶為牛𦟌、牛筋同牛肚，全部滷得入味，不過坊間有唔少專注做麵的比其突出，整體不過不失。

價錢唔貴又大份，難怪人龍不絕。

《老厝邊》

地址：荃灣大壩街25號地舖

電話：2332 8885

【新蒲崗】《合利潮州粉麵》- 至愛潮式墨丸

二零二三年二月十八日

相隔大半年，又回到新蒲崗上課，上課時間剛好落在午飯前，又可以在附近覓食一番，開心

上一次來還花了許多時間閱讀菜單，今次發現菜單轉了，更清楚易明，很快就決定好要吃什麼。

墨丸米+筋腩 $40

喜歡這裡的墨丸，不像現時的花枝丸/滿是肥肉的那些，是小時候的潮式味道，好懷念。

四寶米+牛𦟌 $40

另一半最喜歡吃雜錦，貪其什麼都有，可以試勻全部款式，每款丸都彈牙美味。

油菜

芥蘭大大條，烚得軟淋，健康（起碼自己覺得）之選。

時間預得太緊逼，下次要點上個炸魚皮慢慢吃。

《合利潮州粉麵》

地址：新蒲崗衍慶街19A號

【深水埗】《ohm... Cafe and Bar》-得意趣怪甜品雞尾酒

二零二三年三月十一日

好友由瑞士回港數星期，一早約好要由朝玩到晚；吃畢雞煲後意猶未盡，由西九龍走到另一端的ohm，周六晚上九時多門可羅雀，想不到尚算有名的小店會如此冷清，希望大家留港消費時都多多光顧小店。

Vodka soda $95

食完麻辣想要點清新的清一清味蕾，先來一杯伏特加梳打，青檸味濃好refreshing，正合心意。

豆腐花 $128

翻著其菜單發現有幾款招牌甜品雞尾酒供應，豆腐花本來就是另一半所愛，就點來試試；飲品以伏特加做基底，加上薑味烈酒、豆漿、椰子水和豆腐花，甜甜的易入口，不過略嫌椰水味太搶，還原度差一點。

紫米露 $128

另一款同樣是以香港傳統糖水做概念，用Bacardi 8 years冧酒做底，面頭甜薯泡沫令整杯更滑溜順喉，像真度高，有趣。

日式柚子芝士蛋糕 $58

菜單上的兩款芝士蛋糕皆點上，芝士香濃滑溜，個人較喜歡柚子的清新感，焙茶口味其實也好吃，但留在午後享受也許更合襯。

可能因為客人不多，可以和店員有傾有講，氣氛愉快融洽，過了一個盡興的晚上。

《ohm... Cafe and Bar》

地址：深水埗汝州街152號地舖

電話：6146 7930

【中環】《The Pizza Project》-熱辣辣、香噴噴：新鮮手造薄餅

二零二三年三月三日

感激另一半總是遷就著我的口味，是日心情想吃薄餅，經過Pizza project二話不說即拉著我內進。

兩個人雖不太餓，但散點不如叫Tasting Menu，每人$220，價錢貴少許但可以吃得更豐富，何樂而不為？

Mozzarella Fritta $95
一客兩條的芝士條卜卜脆超拉絲，又食又玩好過癮。

Beef tartare $120
牛肉他他肉味相對淡，調味也不算突出，不過不失。

Carbonara $160
每件Pizza上都有一隻鵪鶉蛋和火腿，口感濕潤juicy，茄醬新鮮香濃，鹹香十足，批皮是我喜歡的拿玻里style，少少煙韌帶麵粉香，不愧為招牌。

Tartufa $180
薄餅以白醬為基底，配上火腿帶出鹹香味，質素同樣上乘，如蘑菇/松露味可以更濃一點更出色。

Panna Cotta $65 /Tiramisu $65
每次在Pirata旗下的餐廳用餐，甜點總離不開有名的Tiramisu；Tiramisu奶味濃香幼滑，所有成份恰到好處，而意式布甸同樣是我所愛，唯獨略嫌甜了一點。

一如所料，吃到後段真的再撐不下，不過絕無浪費全外帶回家，隔天用焗爐翻熱質素也幾乎如初，還得到母親的讚許哈哈。

《The Pizza Project》

地址：G/F, 26 Peel Street, Central

電話：6215 2808

【北角】《Le 188° 餐廳及酒廊》-270度無敵維港景：高檔食材聖誕夜

二零二二年十二月二十五日

感謝另一半的心思，早早預備好聖誕節目和安排聖誕大餐，在酒店內舒舒服服玩兩日，好放鬆。

我們訂的房間包含黃昏雞尾酒時段，餐廳歡迎我們攜帶Lounge的酒水入內，望著270度無敵維港景摸著酒杯底聊天，好不浪漫。

香煎法國鴨肝配無花果醬、黑松露、紅酒汁

鴨肝油潤，為美好的一頓揭開序幕。

阿根廷紅蝦剌身薄片卷水牛芝士配青蘋果、迷你大蒜汁及精選魚子醬

紅蝦剌身鮮甜，蝦肉彈牙又有少少黏性，配上清淡的水牛芝士，非常好食。

耶路撒冷雅枝竹忌廉湯配波士頓龍蝦、蘭度豆、開心果及松露酸忌廉

湯在席前倒出，飲落creamy順滑，雅枝竹味比想像中淡，中間已去殻的龍蝦啖啖肉，鮮甜。

北極紅鱒魚及北海道帶子配煙燻斯卡莫札芝士藍莓意大利飯

平日對水果入饌的菜式並無好感，但深紫色的意大利飯煮得恰到好處，芝士味濃又不膩，配上煎得剛熟的海鮮，頗為驚喜。

伏特加檸檬雪葩

吃主菜前先清一清味蕾，雪葩酒味極輕，檸檬酸酸甜甜。

澳洲M9和牛西冷配薯蓉、芹菜頭蓉、甘筍及松露蘑菇汁

其實吃至此已有飽足感，牛肉食落不算牛味濃，油香也不足，反而伴上的千層薯批忌廉味突出，有少少喧賓奪主。

加拿大龍蝦配淡辣醬及蔬菜

西式做法的原隻焗龍蝦一般不是我所愛，點上其中一部份是為了拍照之用:P 龍蝦食落肉少不太鮮甜，似波士頓多過加拿大的出產；應節的火雞卷、栗子蓉及羊乳忌廉芝士，味道一般般，有少少嚡口，不過不失。

紅絲絨覆盆子芝士蛋糕

聖誕老人衣服造型有夠可愛，蛋糕偏甜，味道有點像自助餐裡嚐到的，不算精緻。

回想整頓飯用上不少高級食材，一大片落地玻璃配以醉人景色，幾杯到肚，一切感覺好不真實。謝謝你，我的愛，聖誕快樂！

《Le 188° 餐廳及酒廊》

地址：北角油街23號港島海逸君綽酒店41樓

電話：2121 2693