【銅鑼灣】《尚座》-驚喜有水準片皮鴨

二零二三年三月九日

哥哥生日想食片皮鴨，明明只係一個普通嘅星期四，但出名嘅酒店、餐廳全都訂滿，連想排wait list都係第十個之後，經濟復甦定係大家忍得太耐要報復式消費？躊躇之際喺網上發現片皮鴨居然都有關注組，見到一家中菜館好評甚多，別無選擇下一試。

訂咗八點第二輪，餐廳滿座等咗差不多十五分鐘，整體裝潢新潮光猛，餐具都融入鴨子元素，可愛用心。

宮廷煙燻素鵝 $68
素鵝嚟到色彩繽紛，同認知中煎到脆卜卜嘅有少少唔同，食落清新，腐皮帶有淡淡煙薰香氣，頗有驚喜。

楊枝沙律蝦球 $228
蝦球大大隻，炸得乾身，肉質彈牙，裹上酸酸甜甜嘅香芒沙律汁，好夾又好餸飯。

脆皮三支骨 $368
出面中菜少見原條Short Rib上，牛肉經過慢煮過肉質軟淋，再炸咗個皮，肉味香濃，調味略嫌輕手少少，整體還是美味。

酥香烤鴨 $428
因只有一人負責處理鴨肉，其他餸菜食到八八九九，隻鴨才千呼萬喚始出來。上桌時片皮鴨砌成飛天狀，皮烤得脆口鬆化，脂肪被刮走，食落難得沒有膩感，伴上的九格小碟相當精緻，比想像中好食，值得等待！

招牌小籠包 $68
一客六件的小籠包新鮮熱辣，胖呼呼多汁。

紅油抄手 $68
辣汁唔算最惹味有層次，作為點心不過不失。

蟲草花炒翡翠苗
蔬菜炒得翠綠，無令人討厭嘅草青味。

本來光顧前都有少少遲疑，畢竟一面倒嘅好評還是有點不真實，試過後覺得性價比果真不錯，食物質素（尤其片皮鴨）有驚喜，係近來少有想推薦給朋友的餐館。

《尚座》

地址：銅鑼灣新寧道8號中國太平大廈地舖

電話：2116 5519