【野餐】要草得草要海有海－西九海濱長廊

二零一六年三月二十四日

話說我有個朋友叫chur姐，叫得依個咁霸氣嘅名就知佢唔簡單，連我出blog慢少少都會特登whatsapp關心我，佢話慣左食早餐時要睇我個blog，近排打得咁疏好不滿，見佢咁支持我簡直有辜負左佢嘅感覺，唔敢怠慢，決定開個新單元黎同大家分享下我平時放假有咩搞，用口語送上，CHUR姐 please enjoy :P

本身份工要喺冷氣地方坐足九個鐘，星期六日唔想再坐喺屋企/行商場，而依排天氣唔太凍唔太熱，去郊外活動一下就最合適不過。香港都有唔少野餐地方，今次近近地揀左西九海濱長廊，貪佢夠就腳，如果揸車黎個停車場仲超近，$12/hr，不過有一個唔好處就係勁多人，我地十二點幾去到，玩到三點走人，啱啱避過左啲人潮，滿意！

我地一行四人，只係簡單整左燒汁牛肉本菇飯糰、煙三文魚豆豆焗蛋同蜜糖芥末子菜絲沙律，加士多啤梨蘋果橙(忍住唔唱下一句)，唔知望住個海係咪特別舒暢，大家都好好胃口，有少少唔夠喉，其實係唔餓之不過想搵嘢塞住把口，下次會預備多啲小食。

食完一輪，大家各自各精彩；媽媽首先自己霸左一張墊出去有太陽曬住嘅草地瞓覺，哥就好chill咁聽住歌睇書同恰下，我就坐喺度咩都無做純放空加影作狀相，不知幾過癮。

臨走先知原來嗰日有個狗狗活動，唔怪得知咁「狗山狗海」啦哈哈哈哈哈哈哈！