上星期六想去做運動但男友要返工無人陪，即興約男友一樣忙嘅朋友行山，估唔到一約就約到勁驚喜，佢話本來諗住睇足成日電視，好鬼毒。
因為我五點鐘要返到市區而佢又一點半先得閒，所以最後揀左一條近市區、快靚正嘅路線：中環上山頂落上環；出發前食返杯我最愛嘅Pret A Manger Banana, Honey & Granola Yoghurt，香甜又夠飽肚，好食過兩大咖啡連鎖店多多聲，可惜佢大部份分店都集中喺港島或者商業區，如果唔係我一定會成日買黎食。
食飽之後由IFC行返去雲咸街，沿藝穗會、蘭桂芳一直上，途經細細個成日去嘅動植物公園，唔再黎都唔記得入面其實有好多得意動物，例如長臂猿、婆羅洲猩猩等等，連優獸大都會最紅嘅樹懶都有，慢吞吞咁郁超好笑，有時間推薦大家睇下，重拾返兒時快樂回憶。
再往上行經過晒啲豪宅黎到舊山頂道山徑，成條路都係舖得好好嘅石屎路，可以Ziczac地上到凌霄閣。由中環開始計，快的話45分鐘抵達，不過全程上斜，無做開運動嘅可能會覺得少少辛苦
去到山頂可以飲返杯食下嘢，稍作休息過後由盧吉道落薄扶林行返上環，平路加落斜需時個半鐘左右，唔想行咁遠嘅話可以揀係薄扶林搭車，依家地鐵通車之後方便左好多，不過我地越行越過癮，下次再約:)
沒有留言:
張貼留言