二零二零年五月二十一日
是日學車過後吃過晚餐才回家，想起良久沒吃越南粉，而曾經最愛的Brass Spoon不復當年勇(加上七時便關門)，遂到早年甚多好評的Pho Bar嚐新。
小店隱身在排檔後，水泥牆上的招牌低調，一不小心便錯過。入內先見一排吧檯，加上兩張四人桌，坐位十餘，牆身有一大片花花壁畫，簡單沒花巧。
青檸梳打 +$20
天氣炎熱，來一杯清爽酸咪咪的梳打，特別透心涼。
至尊 $98
此乃心多多之選，有齊生熟牛肉、牛栢葉、牛腩、牛丸、扎肉等配料，當中的牛腩軟稔帶滿滿脂香，甚得我歡心。
生熟牛肉 $88
湯底同樣呈深褐色，濃郁得來不過鹹，牛肉肉質嫩滑且味濃，高質之作。
爆炸雞 $48
嘴饞的點來兩個小食分享。炸雞佐以三款沾醬，分別是酸瓜蛋黃、蟹籽蛋黃和公司秘製醬，感覺精美。雞肉本身醃得入味，炸得卜卜脆，光吃已很滿足，沾醬是錦上添花。
炸春卷 $35
原以為是越式包生菜的那種，端來的是網皮春卷，其貌不揚，不過不油膩又鬆化，芋頭肉餡惹味，沾些紅蘿蔔醬汁更顯味美。
到來前沒特別期望，吃畢後覺得小店製作用心，光是預備那不同的醬汁想必已相當費時，表示欣賞。
《Pho Bar》
地址：中環利源西街24號地舖
電話：2109 2028
二零二零年四月二十六日
出去食飯見到豬鞍有時都會叫嚟食，因為自己比較少整，平時連豬排都整得嚡，豬鞍咁厚應該駕馭不了。
某日喺HKTVMall買嘢依盒有追加優惠，之前喺AEON見個樣幾霸氣已經想試，有好多口味選擇，最後㨂咗最穩陣又大眾化嘅BBQ味。
根據包裝指示先煎香兩面，佢表面有海量醃料，好容易煎燶，已經細火同不停反都黑曬，要剪走啲燶先可以繼續下一步。封鎖表面肉汁後就可以入焗爐，160度焗45分鐘。
萬眾期待，切開唔算話好多汁，食落少少嚡但絕對可接受，肉質肉味都唔錯，唔會太鹹，調味重parika香料味。
無伏，但烹調時間頗長，未至於好食到要再買。購自HKTVMall，追加優惠$69.9。
二零二零年四月二十六日
好多年前喺大昌買過一款韓國出嘅Pizza餃，茄醬香濃仲做到拉絲效果，不過好快就無入貨，去過唔同超市凍肉舖想搵返都無。
偶然喺HKTVMall見到有Pizza餃賣，喚起咗我心入面久遠嘅記憶，立即買包試下。
打開一包12隻，大約麻將大少少咁上下size，三角形白雪雪咁。後面包裝指示將啲餃放入水煮7分鐘，睇到我黑人問號.jpg，明明我係想食幅圖嗰種香噴噴煎餃，唔理佢自己煎返熱佢算。一邊煎一邊煮其他嘢食，一不留神就煎到炭咁黑XD 下次會試下用焗爐焗，應該都可以。
依隻餃餡料包有海量芝士，唔太鹹，真係好似食咁Pizza，感覺好豐富，食得滿足。
非常推薦大家買又未至於，一試無妨啦。
*購自HKTVMall，星期二閃購價 $40
二零二零年四月二十六日
某日碌開IG，見到有人推薦阿信屋一款雞肉漢堡，覺得幾吸引，點知去到得返同系列嘅海鮮煎餅，無理由兩手空空而回，姑且買包試下。
打開包裝整返熱就食得，一包13件，食落彈牙，好似八爪丸嘅味道。同想像中嘅煎餅唔太一樣，不過幾特別，連我奄尖嘅媽媽都話唔錯，如果見到個漢堡都會試下。
購自阿信屋，折後約$28。
二零二零年五月七日
天氣熱真係無咩胃口，唔想食飯，既然整咗個無蟹籽嘅蟹籽沙律，加個炒烏冬配合一下。
材料：
烏冬 4包
洋蔥 1個
肥牛 1包
蝦 12隻
蛋 4隻
菇 1包
黃椒 1個
做法：
1. 打蛋，落少少鹽，熱鑊落油，煎成蛋皮，剪條備用
2. 洋蔥、黃椒切絲，菇洗淨瀝乾
3. 熱鑊落油，炒洋蔥至傳出香味，落黃椒，略軟後加入菇，炒熟盛起備用
4. 蝦剝殻挑腸，用鹽同生粉捽至起潺，沖水瀝乾
5. 熱鑊落油，放蝦，炒熟盛起備用
6. 熱鑊落油，加入肥牛，落少少鹽同黑椒，炒熟盛起備用
7. 烏冬剪開包裝，略略弄散，熱鑊落油，倒入烏冬
8. 炒開後加入所有配料，落烏冬汁、豉油、XO醬調味，試味上碟
Sharing tips:
- 此乃清雪櫃之作，有咩落咩，最緊要夠多餸
- 基本上係將所有嘢整熟再撈埋一碟
- 烏冬用唔使雪個啲，太濕炒唔到，我求奇買咗依隻，$13.9四包好抵
二零二零年五月七日
近來天晴酷熱，行完山想食啲清新啲嘅嘢，本來想整蟹籽沙律但返到屋企先醒起唔記得買蟹籽，咁都有XD 好在唔落都唔會話好影響個味道，秒速清碟。
材料：
溫室青瓜 4條
牛油果 1個
蟹柳 4條
鹽 2茶匙
蛋黃醬 適量
做法：
1. 青瓜洗淨切，一開二去囊，切薄條
2. 青瓜放鹽，撈勻靜置15分鐘，倒水抺乾
3. 蟹柳煲熟，放涼撕成幼條
4. 牛油果切粒，加入蛋黃醬，撈勻所有材料即成
Sharing tips
- 青瓜去囊同放鹽係想抽乾水份，令佢更爽口
- 鐘意仲可落芒果、蟹籽等等，豐富味道
- 即整即食可以防止出水同避免牛油果發黑
二零二零年四月二十四日
不嬲都鐘意食羊架，不過屋企真係好少買好少整，偶然喺HKTVmall見到佢做promotion，買一pack試下。整完發現無咩skill，但又幾好味，最重要係捧出嚟嗰下好勁好有氣派，用作節日慶祝好適合。
材料：
羊架 (共14-16支骨) 700克
鹽 適量
黑椒 適量
香草 適量
做法：
1. 羊架解凍，洗淨抺乾，所有調味料搽勻羊架內外
2. 熱鑊落油，中大火煎至羊架外皮金黃盛起
3. 預熱焗爐，160度焗25分鐘，220度焗5分鐘
4. 出爐靜止10分鐘切開上碟
Sharing Tips:
- 遷就唔食得太生嘅媽咪整到7成熟，自己食的話鐘意生啲
- 依家咁整真係原汁原味，再整的話會落啲孜然或配沾醬豐富個味道
- 食唔曬第二日整返熱入面都係粉紅色好神奇
