上文提到我會去瑞士投靠好友兩星期，比起搭飛機要提早check-in安檢，然後兩邊機場落返市區都唔算方便，搭火車都不失為一個好選擇。
Gare de Lyon係巴黎一個重要交通樞紐，鐵路穿越不同國家地方，超級繁忙，十一點半嘅火車，大約五分鐘前先喺螢幕見到月台位置，匆匆話別家人就入閘去。
由巴黎搭火車到Basel，車程三個半小時，途中有人查飛；車廂有上下兩層，我坐下層行李唔使托上托落，即使面對面坐都尚算寬敞。
早年試過一次喺火車上差啲俾人拎走個篋，所以自此每次中途停靠我都有警覺性地望住自己嘅行李，好彩無驚無險到達Basel中央車站，比想像中輕鬆渡過。
第一次踏足瑞士領土，拖住兩件行李諗住坐Uber，但好友建議搭電車更便捷，本來擔心要上上落落駕馭不了，但發現佢哋架車同行人路水平幾乎一樣，超級貼心！之前顧慮一掃而空，yeah!
沒有留言:
張貼留言