CKM。飲飲食食。記: 10月 2022

2022年10月31日星期一

〖法葡瑞〗隔離酒店：Ovolo Southside食啲咩？Day 6

二零二二年四月十五日

Coconut chia pudding

同好友傾電話傾咗兩個鐘，早餐最後當飯後甜品食😜 質感係布甸，味道似甄沾記椰子糖，略甜，唔算好鍾意

Eggplant Parmigiana

茄子切到薄薄扮pasta，撈埋超入味嘅蕃茄醬同芝士，濃郁美味

Grilled fish w/ ratatouille sauce

又係依個酸咪咪汁，魚柳藏喺汁醬底下，嫩滑唔腥，好餸飯

2022年10月27日星期四

〖法葡瑞〗隔離酒店：Ovolo Southside食啲咩？Day 5

二零二二年四月十四日

Broccoli tomato quiche

批皮牛油味香濃，內餡質感少少實，茄汁應該自己調教過，點完好味勁多

Caesar Salad with pulled chicken

平時都鍾意食呢個沙律，略嫌多汁略鹹，雞胸仲juicy，唔錯；甜品巴斯克蛋糕有少少blue cheese味好特別，好食！

Empanadas

冇諗過會有西班牙餃子選擇，個皮好鬆化脆口，入面菠菜芝士餡creamy，食落唔油膩，又一驚喜之作

P.S. 多謝另一半山長水遠拎第一個郡過嚟，喺樓下同我揮手，甜入心<3

2022年10月26日星期三

〖法葡瑞〗隔離酒店：Ovolo Southside食啲咩？Day 4

二零二二年四月十三日

Yoghurt w/ house-made granola

點菜時俾「自家製」三個字吸引咗，不過我習慣十一點後先食嘢，食嘅時候已經浸到淋晒唔脆，係有啲腰果咬吓都幾好；個牛角包就有陣假牛油味唔討好

Buddha bowl

懶健康揀咗沙律選項，望落唔算吸引；豆腐原來係用豆腐卜，有啲怪；大陸富士蘋果得個爽字；番薯亦都唔係我鍾意食嘅綿密口感，頭兩舊仲以為係紅蘿蔔，好彩個汁較得清新，我有食晒

Herby pesto pasta w/ grilled chicken

青醬 basil味略淡，勝在唔太油膩，加埋Parmesan有更上一層樓

〖法葡瑞〗隔離酒店：Ovolo Southside食啲咩？Day 3

二零二二年四月十二日

Three scrambled eggs w/ mozzarella

三隻蛋份量有啲多食到好飽，正常發揮

Healthy falafel bowl

不嬲鍾意食鷹嘴豆，但嗰三粒falafel味道同質感都好古怪，食咗半粒就冇再食，好彩個紅菜頭沙律夠清新，滿足嘅

鬼佬炆豬肉飯

見到個樣咁乾唔係好開胃，吖食落有驚喜！豬肉入味唔嚡，唔知用咩調味但係好flavourful ，加埋白酒同veggie samosas w/ mint yoghurt sauce，食到我舔舔脷👅

2022年10月24日星期一

〖法葡瑞〗隔離酒店：Ovolo Southside食啲咩？Day 2

二零二二年四月十一日

Chocolate oatmeal

朱古力味香濃，迷你朱古力牛角酥表面仲脆脆地，而蜜糖就有少少多餘，不過個味係高級嘅

Crispy buffalo style cauliflower, blue cheese dip, chips and salsa

令人驚艷！椰菜花唔油膩，汁醬調味酸甜，帶有辣勁，不多不少地掛喺外面，加少少blue cheese醬，味道更上一層樓，食到好滿意

Shrimp and scallop w/ rice in tomato and green peas sauce

喺外國少食海鮮，見到蝦同埋帶子即刻狗衝，點知原來咁迷你哈哈。好彩味道唔錯，有意式燴海鮮嘅感覺。另外依度每日都有Happy hour，有酒同小食，個春卷留到夜晚食都仲有少少脆，開心。

2022年10月20日星期四

〖法葡瑞〗隔離酒店：Ovolo Southside食啲咩？Day 1

二零二二年四月十七日

雖然我中午12:30已抵港，但係要處理嗰啲煩人無謂手續，最後五點先返到酒店房。

晚餐隨便揀咗Classic Italian lasagne bolognese, sour dough w/ parmesan served on side

本來已經好攰，諗住快手食完休息吓，點知一食，咦肉醬入味濃郁，意粉唔會一pat pat，加埋香濃芝士，似出面百幾蚊嗰啲質素🤩 最後以一件唔甜又香嘅香蕉蛋糕作結，驚喜滿足！

2022年10月19日星期三

〖法葡瑞〗隔離酒店：Ovolo Southside 間房係點樣？

二零二二年四月十七日

當全世界已陸續回復正常生活，四月返香港時仲要去酒店隔離，見識過入境手續嘅真係得啖笑：勁多著晒全套PPE嘅工作人員，去到每一個位都被狂噴消毒劑，坐車去酒店時聽到每個抵港嘅外國人都話ridiculous，當下真係想搵窿捐，覺得好醜。

第二次隔離，心裏面大概有個概念會係點，7日同21日比真係濕濕碎。

住嘅時候好有心機記低各種Pros and cons，大家有興趣可以睇吓：：：
✅注重環保，預備可重用餐具，食物用紙嘅器皿盛載放喺門口張凳，冇特別再用膠袋
✅ Quarantine嘅時間最大期待就係食嘢，食物主要係西式/印度/素食選擇，製作用心味道好好，食得好開心，last quarantine supper真係超乎我想像
✅每日都有happy hour，有紅白酒啤酒仲有小食
✅沖涼水力夠，Rain shower好正
✅主要用WhatsApp通知聯絡，通常都好快回覆
✅有個小掃帚+鏟，尤其女仔啲頭髮成地都係，可以自己清潔下感覺良好
✅日光充足，窗簾電動開關

❌床對住門口，我覺得唔吉利，晚晚打斜個人，瞓得唔係咁好
❌廁所同沖涼佔咗全房面積近四成，放埋張床更冇位，要喺門口開篋
❌無工作枱面，喺電視機前食飯/用電腦，對腳冇位擺
❌床頭冇叉電
❌居然收唔到99台 O_O 職員好努力幫我解決但係換咗三條電線都唔得，對於鍾意睇電視嘅我嚟講十分不便，最後酒店Offer Uber 俾我返屋企

總結：
$880一晚包三餐嚟講算好唔錯，衛生同食物都令人滿意，如果要再住會揀兩張單人床同要求床係唔對住門口，起碼可以有個位放野

《Ovolo Southside》

地址：黃竹坑道64號

2022年10月18日星期二

〖法葡瑞〗土耳其航空初體驗(下)：激心又勞氣

二零二二年三月二十六日

上回提到乘坐土耳其航空抵法國，一切都仲叫順利，點知返嚟真係一場惡夢。

我原定三月尾於法國回香港，不過香港政府三月頭宣布延長多國禁飛令至四月二十一日，唔想到時可能要再等到某年某日，決定去瑞士投靠朋友兩星期，過一過冷河，用咗大約$600改機票由瑞士離開，希望趕及另一半生日前完成隔離。

人算不如天算，起飛前三日土耳其航空被熔斷停飛十四日，第一次遇到依件事有少少不知所措，怕人人湧住復飛後第一班機回港會無位，所以立即改機票，諗住touchwood要再改都係幾百蚊，點知真係無隔離酒店，唯有確認到有酒店房後再改，一噤，吓？！要九千七百蚊？！揉揉眼睛以為自己眼花，張機票原價先係$4,000，之前改過一次收我$600，甚至乎買過一張新先係三千幾，是咪搞笑？

以為系統出錯，決定打上土耳其航空熱線求助。當日打一個香港電話號碼，第一位接線員告知的確要港幣$9,700，我表達唔合理，輾轉聽到第三個接線員，佢回覆$1,240，雖然都仲係有啲貴，不過都不情願地俾咗，諗住睇下到時可否claim返保險。

隔咗一個星期心血來潮看看交易記錄，見到一筆$10,027嘅款項，一查發現原來係來自土耳其航空嘅扣賬，心裡一沉！又再去問，對方堅持自己沒有收到extra payment，叫我有銀行月結單後再同佢哋聯絡。來來回回個多星期，先知佢哋誤以為我話佢哋收咗我兩次錢，天呀！覺得電郵聯絡實在太沒效率，再打上熱線問，自問英語程度可以，一般生活溝通完全沒障礙，但因他們的口音太重請他們稍為說慢一點，他們以一副不耐煩的態度叫我l~i~s~t~e~n c~a~r~e~f~u~l~l~y，然後聲稱自己沒權力去處理，一定要email，依個係咩爛藉口.\/.

因為自己都好肯定當初對方從沒提及付款貨幣，而我亦因為與第一位接線員嘅對話而大意地沒再三確認，都有做得唔好嘅地方，所以我詳盡地列出打電話改期的日期、時間、號碼，請他們務必翻查錄音記錄，希望搵到個大家都同意嘅方案。

如是者又再奮戰三、四星期，玩到我連香港都返到，土耳其航空堅稱自己無地方有問題，話"Although it is your responsibility, we tried to empathize and arranged a discount code to cover some of the amount you paid for the ticket change"，酌情地退返$700港紙嘅coupon已係皇恩造蕩。雖然USDollar 係dollar ，但HKDollar 都係 dollar呀！將成個責任放晒喺消費者身上會唔會太唔公平？咁樣同去搶有咩分別？

當時都打定輸數去埋香港同土耳其消費者委員會投訴，土耳其消委會話會記錄在䅁研究一下，香港消委員亦提醒我佢哋無權力但會試下幫我再聯絡，點知個半月後居然收到消委會轉寄email，入面土耳其航空提到 "Due to call center agent mistake, we have issued your traveler's cheque..."

！！！

我重覆了相同嘅說話，提供了相同嘅資料，由機構開口同自己追討居然有如此大嘅落差，如果當初無做到最後依一步，我都仲係一個俾人㩒住嚟搶嘅受害者，雖然唔係退現金同以後唔想再搭依間航空公司，但依家叫做拎得返八千幾蚊coupon，下返少少啖氣。

有咩不幸過被熔斷？係被熔斷兩次呀！

表姐曾經提醒我最好乘搭復飛後第一機，如果唔係好容易又中招，不過當時無酒店所以安排不了，唯有求神拜佛希望佢頂得住。去到機場排咗個幾鐘到櫃位先通知班機取消咗(一直check住email同app都聲稱如期)，地勤話最快可以幫我轉聽日坐另一間航空，又係企咗喺度，需知道回港係要過五關斬六將，香港凌晨十二點即時麻煩另一半打電話去確認酒店，再跑去再做檢測，好彩趕得切喺間lab關門前到達，前前後後喺機場搞咗三個鐘，嘥咗二十歐泊車費，仲未計前一日特登出巴黎做Test嘅時間同金錢嘅損失.\ /.

第二朝一樣提早時間出門，因太多嘢要檢查，花咗好多時間先做好啲手續，成功拎到張登機證一刻係可其感動。我終於返到香港了。

2022年10月17日星期一

【成峯歷奇】成功挑戰自我的喜悅：攀岩、飛索、沿繩下降

二零二二年九月四日

尤記得中五暑假第一次玩叢林攀爬，要在幾十米高大樹之間穿梭，擒高擒低越過障礙，雖然又攰又驚，但成功挑戰自己後嗰種滿足感不能言喻。

某日上網見到原來香港都有zipline體驗，二話不說去報名。活動分上、下午兩個時段，因另一半有課堂要上關係，我哋搭八點半船，到長洲後先到康蘭餅店買早餐，十點鐘準時喺碼頭等。

沿長洲山頂道行過去攀岩地點大約十五分鐘，海天一色景觀一流。教練簡單講解一下如何穿著安全繩同繩索運用，跟住指示做唔複雜。我哋被安排先玩沿繩下降，完全無經驗一開始就玩沿繩下降的確頗有挑戰性，顧得伸直雙腳嚟又顧不了前後放繩，我玩時唔敢四處張望，專心一意跟隨教練指導，教練好supportive，一直鼓勵大家，最後成功著陸好開心。