尤記得中五暑假第一次玩叢林攀爬，要在幾十米高大樹之間穿梭，擒高擒低越過障礙，雖然又攰又驚，但成功挑戰自己後嗰種滿足感不能言喻。
某日上網見到原來香港都有zipline體驗，二話不說去報名。活動分上、下午兩個時段，因另一半有課堂要上關係，我哋搭八點半船，到長洲後先到康蘭餅店買早餐，十點鐘準時喺碼頭等。
沿長洲山頂道行過去攀岩地點大約十五分鐘，海天一色景觀一流。教練簡單講解一下如何穿著安全繩同繩索運用，跟住指示做唔複雜。我哋被安排先玩沿繩下降，完全無經驗一開始就玩沿繩下降的確頗有挑戰性，顧得伸直雙腳嚟又顧不了前後放繩，我玩時唔敢四處張望，專心一意跟隨教練指導，教練好supportive，一直鼓勵大家，最後成功著陸好開心。
之後再試玩飛索，望落比想像中高。原來教練可以略略按制速度，難為我氣都唔敢唞地行出去，點知似放未放，殺我一個措手不及，大笑開懷，最後不消三秒就到地。
因為人多關係，我哋再試多次沿繩下降，諗住第二次玩心裡較踏實，點知教練無端端問我哋想唔想雙人一齊落去，睇吓我哋合拍程度。好難行又睇唔到，基本上我成程挨晒落另一半度，辛苦佢要承托住我，希望係甜蜜嘅負擔哈哈。
最後等多一陣玩埋攀岩，我本住唔好阻人收工嘅心態一鼓作氣向上爬，兩三下手勢就上咗去，比想像中輕鬆，而另一半爬嘅路線較滑，幾番掙扎，仲整損咗少少，我見猶憐。落返去有先前下降經驗，做到直腳挨後，好快就落得返去。
一眨眼就玩到兩點，懷著依依不捨嘅心情離開。
曬咗成日嘅關係都無咩胃口，行返出碼頭附近飲杯嘢，望住個海吹來涼風好舒服，what a day!
沒有留言:
張貼留言