東涌行入梅窩試過，梅窩行入愉景灣都試過，但東涌直入愉景灣又真係第一次。之前睇到香港愉景灣 Visit Discovery Bay出post話秋風起行山去，諗落都有成年無入愉景灣，今日就同男友試下行老虎頭郊遊徑。
我地朝早九點半到東涌，喺地鐵站附近每人買個包做早餐，男友鐘意Subway，而我見到五年以上無食過嘅餐蛋包忍唔住買左，食落好有回憶嘅味道。
食完行返入東薈城開始，條路前半段同入梅窩係同一條路，喺喜東街油站旁邊有一條小路行入去，右邊望住鐵路軌，左邊望住起得如火如荼嘅港珠澳大橋，之後經過白芒同牛牯塱村後一大段上斜，大約二十分鐘到最高點亞婆塱涼亭，左手面見到個牌寫住老虎頭郊遊徑入去就係去愉景灣，如果唔入直行就係去梅窩。
老虎頭郊遊徑起初山路較窄而旁邊啲樹生得好茂盛，近乎要用手撥開障礙物，唔想刮腳記得著長褲；沿途有少少上上落落，不過好寧靜舒服，望住延綿山脊特別舒暢。
行行下中間發生左段小插曲，明明依幾日天氣好好又無落雨，但中段有大約三米左右都係濕漉漉嘅污泥，其實都無計一定要過，係諗下踩邊度可以接觸少啲無咁污糟，此時男友喺我後面好有信心地講左句「右邊」，我一踩，咦成隻腳唔見左嘅......？！拎返隻腳上嚟見到佢俾啲泥黃色嘅水浸泡過，可憐兮兮，惟有除左對襪用紙巾印一印，光脫脫咁繼續上路。之後某人仲話自己係衷心地俾個建議我，我都好衷心咁「多謝」你哈哈哈哈哈哈。
望到水塘同哥爾夫球場後會開始見到大大小小唔同形狀嘅巨石滿佈山頭，返到黎睇返資料先知佢地係有名好搞笑，「試劍石」、「怪鴨石」、「仙桃石」等等，啲人想像力都幾豐富。行左大約大半個鐘上到山頂，上到去原來未算甘，落山先至係今次旅程最大挑戰！勁斜同勁多碎石，用埋對手加對腳狂震，最後每一步都係咬緊牙關先行到，絕無誇張！
前後行左三個半鐘，落到愉景灣中心嗰一刻好滾動，又熱又渴，快快走入餐廳飲返杯放鬆下，過一個優悠嘅午後。總括嚟講條路係幾靚幾有挑戰性，但唔建議行山初哥去，真係真係咁想行嘅話由愉景灣出發倒轉嚟行啦，輕鬆舒服少少。
對依條路線有興趣嘅朋友可參考依位先生嘅分享，但我落山條路絕對唔係咁樣，終點亦唔一樣，如果搵到佢條路應該好好多，但當時又唔係好覺眼，未必會再行，等你地話我知:D
＊＊＊行山記得帶足夠水同食物，做足防曬或落雨準備，量力而為呀！＊＊＊
可以嘅話嚟依度俾個like、支持下我 <3
沒有留言:
張貼留言