識我嘅人都知我鐘意行山，如果要追溯返，依粒種子大概係中六七嘅時候種落，嗰時成班同學圍威喂學人參加AYP，要考章就要完成一個三日兩夜嘅露營，事前反覆行過好多山做練習，點知咁啱遇上左個好惡好嚴嘅阿Sir，入晒黑行錯晒啲路已經夠驚，仲大大聲咁問我地知唔知自己喺邊度，心諗知就唔洗搞到咁啦LOL 向來受軟唔受硬嘅我覺得你有咩咁巴閉，嗰次之後覺得無癮，最後成件事就不了了之。
上星期好友講開佢發完燒兩日後被逼行麥理浩徑，唔舒服加上路段長真係好辛苦，諗起自己上年都因為太遲出發而只係行左二段一半左右，即刻約男友挑戰多一次。
為左唔再重蹈覆轍，我地九點半喺采頤花園等，搭1A小巴入到去食埋早餐十點九啟程，由西貢總站搭94巴士到上窰，落車之後就一直向前行，微微斜好輕鬆，大約二十分鐘去到迴旋轉右邊就入西灣，左邊就入東壩萬宜水庫，之前見人地成日去東壩影相，終於可以緊貼一下潮流。由落車至到香港地質公園全程係舖得好好嘅石屎車路，無咩樹蔭不過好好行，沿路望住水庫景，寧靜舒服。
行行行兩個鐘左右到傳說中嘅地質公園，入面有一條萬宜步道睇六角柱石、海蝕洞、破邊洲、防波堤等等，想更加深入地認識仲可以參加佢啲導賞團，好老土不過真係不禁讚嘆大自然係幾咁奇妙！
離開香港地質公園後就開始入浪茄，過左福音戒毒中心後不停上上落落，加上早幾日都仲落緊雨，跨過無數個水氹之餘對腳長期同泥濘做朋友，漿住漿住咁其實幾嘔心，而上斜同落斜都要花更大力氣等自己唔好跌落去，諗返都幾辛苦。
行到西灣山已經超級攰，男友個樣直頭謝晒好可憐，諗住落到大浪西灣搭船出去，去吹筒坳轉右，之前知道要八十定唔知一百蚊一位已經覺得好貴，點知今次仲加左價要成百五蚊，男友霸氣地拋下一句「用黎買牛扒唔好！？」，就係咁我地休息左大概半個鐘又默默行返上去西灣亭(平時有私人小巴搭出市中心，但我地行嗰時因怕山泥傾瀉封左路唔俾車過)，沿住西灣路走出去，五點三終於返到開波嗰個迴旋處，極度感動開心！
全程六個半鐘，除左個早餐之外我地只係靠住一盒青瓜卷黎吊命，但唔知點解又唔係好餓，最後攰到坐左喺路邊等的士，雙腳已經唔屬於我架喇，但今日旅程仲未完...... (續)
對依條路線有興趣嘅朋友可參考：麥理浩徑一段、麥理浩徑二段
＊＊＊行山記得帶足夠水同食物，做足防曬或落雨準備，量力而為呀！＊＊＊
沒有留言:
張貼留言