早聞香港有個大峽谷，淨係睇相都覺得幾震撼，唔知原來有個咁特別嘅地方，但要去到屯門良景真係要鼓起莫大勇氣先至得，所以講講下過左成年有多都無去過。
今日難得可以痴住阿哥玩，利誘佢同我一齊去個新地方做下運動。由起點至大峽谷，絕大部份時間都係舖好嘅泥水路，全程上斜唔洗一個鐘去到，尚算輕鬆；建議下午時份三四點先起行，無咁曬又可以較啱時間睇日落。
見到個「此路危險 不得擅進」牌就恭喜你，終於嚟到，不過一睇係有少少失望，可能因為佢個名實在太霸氣，所以唔多唔少有啲期待，原來真實無相片咁壯觀。記得五年前去Grand Canyon每分每秒都嘩嘩聲，不禁讚嘆大自然嘅奧妙，而放眼望去全部都係一個個又高又深嘅峽谷，令人印象深刻，有機會去美國真係要睇下。
講返轉頭，其實依個景喺香港確實少見，不過真係超多人， 條路又有少少窄，大家影還影記得注意安全，命仔要緊。
揸左車關係，我地今次無去到下白泥度睇日落同影天空之鏡，不過沿路折返時一樣見到日落，行下停下欣賞下，都用左成個鐘落山。而成條路嘅風景比想像中靚，有好多影相位，咁啱嗰日又好天，我簡直攝影師上身影左好多好滿意嘅相，值得一去呢！
沒有留言:
張貼留言