天氣好，心癢癢，出門吸收新鮮空氣去。由石門站D出口出發，行到碧濤花園對出迴旋處，橋底有條樓梯跨越大老山公路，到亞公角街落樓梯左轉過一小隧道，登山入口就喺右手邊。
因為條路唔係官方路線，並無舖好嘅路段，所以我哋一開波先戴上手套方開始上斜。行咗大約十五分鐘就到達第一個景點：心型石，的的骰骰，確係可愛；靠右行多兩步就見到三兄弟石，其中要攀爬上去先睇到嗰舊最似人樣，瞓喺度晒太陽好過癮。
初嚐甜頭後以為好快會到達是日重點，點知之後無間斷的向上行維持咗成個鐘，全程跟住絲帶爆林，後段無遮掩曝曬，加上斜度十足，小腿長期頻臨抽筋邊緣，咪話唔辛苦。
經過豆腐石、小龜石，梅鑽後，終於行到最想見識嘅陽元石，一柱擎天果然神似，非常壯觀有趣，大自然真係奇妙。
沿路落山經花心坑村落廣源買汽水，再搭巴士離開，全程無咩點休息，行咗三個鐘左右。
可能天氣熱加上閒日，我哋到落到花心坑梅子林路口先見到唯一兩個遊人，行嘅時候主要跟絲帶，但有時分岔路兩邊都有指示，最好喺地圖加咗條路線熟讀一下先，唔係都有機會迷路。有興趣前往記得戴手套同著長褲，新手不宜！
＊＊＊行山記得帶足夠水同食物，做足防曬或落雨準備，量力而為呀！＊＊＊
沒有留言:
張貼留言