【大嶼山】《小隱於野》－一片淨土，難能可貴

二零二零年十月十六日

一直有留意小店，但下長沙依個地點真係令人卻步，無端端特登搭車去又好似太誇張，搵嚟鳳凰徑九、十段，行完再食好西！

由石壁水塘出發，到水口經引水道，四個鐘頭後終於到達。離遠見到棟橙色建築物，五顏綠色好歡欣，每處佈置店主都花過心思，非常可愛。

小食拼盤 $118

小食拼盤薯條金黃香脆薯味濃，一條接一條完全停唔到口；腸仔肉質彈牙唔過鹹，雞翼帶淡淡南乳香，炸得香脆之餘仍保留到肉汁。

Pepperoni Pizza $128

自家製批底薄脆，茄底香濃，同辣肉腸嘅油香相輔相成，簡單美味。

Lemonade $50

檸檬特飲酸甜清新，解渴透心涼。

大鄉里第一次去下長沙，完完全全俾佢吸引住，從來都唔知香港有個咁靚嘅地方！海灘、衝浪、餐廳......勾起上年去巴塞嘅回憶，盤算住下年同朋友嚟曬太陽飲啤酒！Cheers！

P.S. 啱啱得知小店做到十二月被業主收返個舖要暫別一下，實在太可惜了。