［打左喺FB唔好嘥，留個紀錄都好］
二零一六年八月十三日
早幾年突然興起去摸蜆，我依啲反叛少女對於人人一窩蜂去做嘅嘢只會採取隔岸觀火嘅態度，等到熱潮淡卻左先去試，起碼伏唔伏都有個知字丫(話雖如此，因為無睇清楚喺邊落車又太依賴個原來壞左嘅GPS，足足過左四個站先知，行返轉頭都要45分鐘，未掘已經消耗左一半體力💩)
每年七月至十月係摸蜆嘅最佳季節，而香港都有幾個熱門嘅摸蜆勝地，我地近近地揀左去東涌水口，由東涌地鐵站搭11號巴士喺水口東村落車，車程大約30分鐘，落車後附近有一間士多可以租借摸蜆用具，$20包一個耙一張櫈仔同一個大水樽，店主仲好好人地搭左個架俾遊人擺袋(唔係locker)，唔洗揹住一袋二袋咁lei hea，但記住帶個袋仔貴重嘢跟身👍
我幻想中嘅摸蜆活動應該係輕鬆同得來全不費工夫，而實情就梗係唔係啦：泥地啜到寸步難行仲彈晒D污水上身、好辛苦先掘到D好似一蚊銀咁上下大嘅BB蜆、要留意住潮漲潮退小心沖走對拖鞋...... 玩左兩個鐘個人都散晒🌅
至於嗰D好用心好努力先掘到返黎嘅蜆係成肚沙不適合食用嘅，少年別太年輕😂
沒有留言:
張貼留言