平時去歐美想知道有咩玩都係用Trip Advisor，動態靜態古靈精怪咩都有，資訊比較全面。第一日去到Kona攞埋車買埋Sim Card都四點幾，全日只有一個行程：觀星。
原先諗住幾點去到都無所謂，我地九點半出車，條路黑媽媽又越過高山又越過谷，揸左個半鐘終於去到，原來佢有個Information Center係開到十點，入面有啲簡介同熱飲俾遊客，我地遲左少少水靜鵝飛。
老老實實，咁大個女都未真正去過觀星，睇到我目瞪口呆！成個天都滿佈閃下閃下嘅星星，仲要唔止一次有流星劃過真係好震撼，嗰種感動係深深打入個心入面。
好彩旅伴有先見之明，拎左好多禦寒衣物上去，又羽絨又被又冷帽，兩個拾荒者(如圖)落車睇下影一影上返車，如是者上上落落幾次之後都係太凍頂唔順走人。回程播住Youtube陪住90後長大嘅playlist返歸，無論E-kids定趙仲茹條友都可以一字不漏跟住唱，好鬼癲，勁呀Hahahah!
沒有留言:
張貼留言